Folasaga i le Galuega
Aisea e Suesue ai Lenei Tusi?
O le Galuega a Aposetolo ua fauina ai se alalaupapa i le va o faamaumauga o le soifuaga o Iesu Keriso ma aoaoga i Evagelia e fa ma tusiga ma galuega a Ana Aposetolo. O le tusi o Galuega o loo faapupula mai ai le ala o loo faaauau ai pea ona taitai e le Faaola Lana Ekalesia e ala i musumusuga a le Agaga Paia ia i latou o e umia ki o le perisitua. Sa faaalia e le Agaga Paia ia upumoni i Aposetolo, o e na latou taitai ma aoao atu i le Ekalesia. Sa faia foi e Aposetolo ia vavega i le suafa o Iesu Keriso. O au suesuega o lenei tusi, o le a e iloa ai le ala na faasalalau ai le Ekalesia a Iesu Keriso mai Ierusalema “i tuluiga o le lalolagi” (Galuega 1:8). O le suesueina o lenei tusi e mafai foi ona fesoasoani e te iloa ai le poto o le mulimuli i perofeta o ona po nei ma aposetolo ma mafai ona musuia ai oe e tu atu ma le lototoa o se molimau a Iesu Keriso.
O Ai na Tusia Lenei Tusi?
O Luka na tusia Galuega a Aposetolo o “le lona lua o se galuega valalua. … O le vaega muamua ua iloga o le Evagelia e Tusa ai ma Luka” (Taiala i Tusitusiga Paia, “Galuega a Aposetolo,” scriptures.lds.org; tagai foi Luka 1:1–4; Galuega 1:1).
O Anafea ma o Fea na Tusia ai?
Na tusia le Galuega e sosoo ma le Evagelia a Luka (tagai Galuega 1:1), lea e peiseai na tusia i le afa lona lua o le seneturi muamua T.A. Tatou te le iloa po o fea na tusia ai.
O Ai Na Tusi I Ai ma Pe Aisea Foi?
Sa faatuatusi atu e Luka le tusi o Galuega i se tagata e igoa ia Teofilo (tagai Galuega 1:1).
O A Nisi o Vaaiga Iloga o Lenei Tusi?
O le tusi o Galuega o loo faamatala ai le tulai ae ma le salalau atu o le faa-Kerisiano, na amata i le itumalo o le laumua o Iutaia o Ierusalema ma faaiu ai i Roma, o le laumua tele o le malo. O mea na tutupu o loo faamatala i le Galuega na tutupu i se vaitau pe tusa ma le 30 tausaga (pe tusa o le T.A. 30–62) ma e taulai faapitoa i galuega a Peteru (tagai Galuega 1–12) ma Paulo (tagai Galuega 13–28). Ana leai le tusi o Galuega, semanu e tapulaa lo tatou iloa i le talafaasolopito anamua o le Ekalesia i si vaega itiiti o loo maua mai i tusi o le Feagaiga Fou. E le gata i lea, o loo aumaia foi i le Galuega se matalalaga taua faasolopito mo tusi a Paulo.
E taua tele i le tuputupu ae o le Ekalesia anamua o le liua o Paulo (tagai Galuega 9) ma ana misiona na sosoo ai, o le faaaliga na maua e Peteru e tusa ai ma le taliaina i le Ekalesia o Nuuese o e sa lei liua muamua i le faa-Iutaia (tagai Galuega 10:9–16, 34–35), ma aoaoga faavae na aoao atu i le fonotele i Ierusalema (tagai Galuega 15).
E pei ona tusia i le Luka 24:49, na faatonuina e le Faaola le Au Aposetolo e amata a latou galuega pe a uma ona “maua le mana mai luga.” O le tusi o Galuega o loo tusia ai le faaeega o lenei mana e le Agaga Paia ma ua faamatala ai ona taunuuga maoae, e amata i le liuaina o le fiaafe i le aso o le Penetekoso (tagai Galuega 2). I le Galuega atoa, sa faamamafaina ai e Luka ia galuega a le Agaga Paia i tagata taitoatasi ma faapotopotoga. O le fasifuaitau “maua le mana mai luga” e peiseai e faauigaina foi e faapea na “maua [e Aposetolo] se malamalama patino, mana, ma faamanuiaga faapitoa, ia e masani e na o le Malumalu o le Alii e tuuina mai ai” (Bruce R. McConkie, Doctrinal New Testament Commentary, 3 vols. [1965–73], 1:859).
1. Otootoga
Galuega 1–2. Ua auauna atu Iesu Keriso i Ona soo mo aso e 40 ina ua mavae Lona Toetu ona afio ae ai lea i le lagi. E ala i musumusuga, ua valaauina e Aposetolo ia Matatia e faatumu le avanoa i le Korama a Aposetolo e Toasefululua. Ua liligi ifo le Agaga Paia i le aso o le Penetekoso. Ua molimau atu Peteru ma le lototoa e uiga i le Faaola toetu, ma pe tusa ma le 3,000 tagata ua faaliliu mai.
Galuega 3–8. Ua faamalolo e Peteru ma Ioane se tagata sa pipili ina o fanau mai. Ua puefaapagotaina Peteru ma Ioane ona o le folafola atu ma faamalolo i le suafa o Iesu Keriso ma ua laveaiina mai i le falepuipui. Ua valaauina e Aposetolo ni alii se toafitu e fesoasoani ia i latou i la latou galuega; o se tasi o nei alii o Setefano, ua molimau atu i luma o le aufono a Iutaia ma sa fasiotia o ia e sui o le aufono. Ua folafola atu Filipi ia Samaria atoa.
Galuega 9–12. Ua liua mai Paulo ma ua amataina lana galuega. E ala i se faaaliga, ua aoao ai e Peteru ua tatau ona folafola atu le talalelei i Nuuese. O Herota Akeripa I na faatonuina le fasiotiga o Iakopo (le uso o Ioane) ma faafalepuipuia ia Peteru.
Galuega 13–15. Ua valaauina ia Saulo ma Panapa e avea ma faifeautalai. Sa fetaiai i laua ma le tetee mai i tagata Iutaia ma ua taliaina e nisi o Nuuese. Ua fono ia taitai o le Ekalesia i Ierusalema ma fuafua ai e faapea e le tau manaomia ona peritomeina tagata o Nuuese e liliu mai, pe tausisia le tulafono a Mose pe a latou auai i le Ekalesia. Ua tuuvaa atu Paulo (lea sa igoa nei ia Saulo) i lana malaga lona lua faafaifeautalai, faatasi ai ma Sila.
Galuega 16–20. Ua faamalolosia e Paulo ma Sila ekalesia eseese (faapotopotoga) ia sa faatuina muamua. I Areopako i Atenai, ua folafola atu ai e Paulo e faapea “o i tatou o fanau a le Atua” Galuega 17:29 Ua faaiu e Paulo lana misiona lona lua ma tuuvaa ese atu i se misiona lona tolu i Asia atoa. Ua tonu ia Paulo e toe foi i Ierusalema.
Galuega 21–28. I Ierusalema, ua puefaapagotaina ai Paulo ma ua faaauau pea ona molimau atu ia Iesu Keriso. Ua toe faaali atu foi le Alii ia Paulo. E toatele Iutaia ua taupulepule e fasiotia ia Paulo. I Kaisareia, ua ia molimau atu i luma o Filiki, Feso, ma Akeripa. Ua afatia Paulo i lana malaga atu i Roma. Ua folafola atu e Paulo le talalelei a o faanofo vaavaaia faafalepuipuia i se fale i Roma.