Na tusia e le Aposetolo o Paulo e uiga i meaalofa e tele a le Agaga Paia. Na ia faatusaina le Ekalesia i se tino faaletino ma faamatala e pei lava ona manaomia e le tino o itutino taitasi ina ia galue lelei ai, e faapena foi ona moomia e le Ekalesia o tagata taitasi o le Ekalesia e faaaoga ana lava meaalofa a le Agaga e saofaga ai ma faamalosiaina. Sa fautuaina e Paulo le Au Paia e saili le alofa moni ma le meaalofa faaleagaga o valoaga.
Faitau ia faamatalaga nei, ma lio le tasi e te manatu e sili ona sao:
E maua se molimau pe a galue ai.
O le molimau o se meaalofa.
Faamatala lau tali.
A o e suesueina le 1 Korinito 12, vaavaai mo se mataupu faavae o le a fesoasoani ia te oe e te iloa ai pe faapefea ona maua se molimau patino malosi ia Iesu Keriso ma Lana talalelei.
I le 1 Korinito 12:1–2tatou te faitau ai na manao le Aposetolo o Paulo e aoao tagata o le Ekalesia i Korinito e uiga i meaalofa faaleagaga.
Faitau le 1 Korinito 12:3, ma vaavaai pe mafai faapefea ona tatou iloa mo i tatou lava o Iesu o le Alii ma le Faaola. Ua aoao mai e le Perofeta o Iosefa Samita e faapea ole upu taua i le 1 Korinito 12:3 e ao ina malamalama i ai o le iloa (tagai History of the Church, 4:602–3).
O le faaaogaina o mea sa e aoaoina mai le 1 Korinito 12:3, faamaea le upumoni lea: E na o le e mafai ai ona tatou maua se molimau patino o Iesu Keriso o lo tatou Faaola.
Na aoao mai e Peresitene Dieter F. Uchtdorf o le Au Peresitene Sili e uiga i le manaomia ona maua o sa tatou lava molimau patino:
Ata
Peresitene Dieter F. Uchtdorf
“O se molimau o se oa aupito taua aua e le maua i le na o le faautauta po o le finafinau, e le mafai ona faatauina mai i oa o le lalolagi, ma e le mafai foi ona tuuina atu o se meaalofa pe faasolo mai i o tatou augatama. E le mafai ona tatou faalagolago i molimau a isi tagata. E manaomia ona tatou iloa mo i tatou lava. Na saunoa Peresitene Gordon B. Hinckley, ‘Ua i ai i Au Paia taitasi o Aso e Gata Ai, le matafaioi e iloa ai mo ia lava, faatasi ai ma se mautinoa e aunoa ma se masalosalo, o Iesu o le Alo soifua toetu o le Atua’ (“Aua le Fefe e Faia Mea Lelei,” Liahona, Iulai 1983, 132). …
“Tatou te mauaina lenei molimau pe a saunoa mai le Agaga Paia i le agaga o i totonu ia i tatou. O le a tatou maua se mautinoa toafimalie ma le le maluelue o le a avea ma puanavai o la tatou molimau ma le talitonuga maumaututu” (“O Le Mana o se Molimau Patino,” Ensign po o le Liahona, Nov. 2006, 38).
Tali fesili nei i lau api talaaga mo le suesueina o tusitusiga paia:
Aisea e taua ai le malamalama o le molimau ia Iesu Keriso e na o le Agaga Paia e maua mai ai?
O le a se mea e mafai ona tatou faia e valaaulia ai le Agaga Paia i o tatou olaga ma maua ai lena molimau?
Pei ona tusia i le 1 Korinito 12:4–31, na aoao atu ai e Paulo le Au Paia i Korinito e faapea, e tele meaalofa faaleagaga ua tuuina mai mo le manuia o fanau uma a le Tama Faalelagi ma fesoasoani ai i tagata o le Ekalesia e feauauna ai le tasi i le isi. O meaalofa a le Agaga o faamanuiaga po o tomai e tuuina mai e le Agaga Paia, ma e tuu mai e le Atua e le itiiti ifo ma le tasi le meaalofa i tagata uma o le Ekalesia (tagai MF&F 46:11). Sa faatusatusa e Paulo le Ekalesia i se tino faaletino. E lava ona manaomia o itutino taitasi mo le tino ia galue lelei ai, e mafai foi e tagata taitasi o le Ekalesia ona faaaoga ana meaalofa faaleagaga e saofaga ai i le, ma faamalosi ai i le Ekalesia. Mo lenei faamoemoe, sa fautuaina ai e Paulo le Au Paia ia “naunau [pe saili] o meaalofa e sili” (1 Korinito 12:31).
Ua aoao atu e Paulo le taua o le maua o le alofa moni
Faitau tulaga nei, ma mafaufau pe o a aafiaga faataumaoi e afua mai inei uiga ma amioga.
E tele ina e ita ma le fiafia ona o se amioga a se tasi o ou tei.
E i ai se tasi o lau vasega e faasausili ia te oe, o lea ua e manatu e tauamiotonuina ou faafiasili foi i ai.
Ua e lagonaina le lotoleaga i taleni a se uo ma ana mea ua ausia.
O nisi taimi e faigofie ia te oe ona e faitala ma tautala leaga e uiga i isi i lau korama o le perisitua po o le vasega a Tamaitai Talavou.
A o e suesueina le 1 Korinito 13, vaavaai mo upumoni e mafai ona fesoasoani ia te oe e aloese ai mai uiga ma amioga faaalia ia e mafai ona faalavelaveina ai lou fiafia faaletagata lava ia, ma sootaga lelei ma isi.
Faitau le 1 Korinito 13:1–3, ma vaavaai mo se uiga faaalia ma se meaalofa a le Agaga na maualuga le viia e Paulo.
O le alofa moni, o le ituaiga o alofa e sili ona maualuga, malualii, ma malosi o le alofa, e le na o se uluitino o le alofa(Bible Dictionary, “Charity”).
Matau i fuaiupu nei pe na faapefea ona faamatala e Paulo i latou sa i ai isi meaalofa faaleagaga ae leai se alofa moni (tagai foi MF&F 88:125).
O fasifuaitau “apamemea taalili” ma “sumepalo tagitagi” i le fuaiupu 1 e faatatau i meafaimusika e sili ona leotele leo. I le talaaga o le 1 Korinito 13:1, o nei fasifuaitau e mafai ona tau mai ai upu e tatala ai ia e gaogao pe leai se uiga, pe afai e le faaosofia le failauga e le alofa moni.
Sa faamatala e Paulo ia uiga auaumama ma uiga o le alofa moni e fesoasoani ai i le Au Paia i Korinito e malamalama atili i lenei meaalofa. Faitau le 1 Korinito 13:4–8, ma vaavaai mo le faamatalatalaina e Paulo o le alofa moni. E mafai ona e fuafua e faailoga mea e te mauaina.
Mafaufau i faamatalaga nei o fasifuaitau e ono faigata ona malamalama ai: O le fasifuaitau “e onosai” fuaiupu 4 ua faamatala mai ai se tasi e onosaia tofotofoga. “E le losilosi” fuaiupu 4 ua faamatala ai se tasi e le lotoleaga i isi. “E le mitamitavale” fuaiupu 4 ua faamatala ai se tasi e le gugutu. “E le faafefeteina” fuaiupu 4 ua faamatala ai se tulaga maualuga o le lotomaualalo. “E le amio mataga” (fuaiupu 5), ua faamatala mai ai se tasi e le faafiasili pe le magafagafa. “E le sailia e ia ana lava mea” (fuaiupu 5)ua faamatala mai ai le uiga auaumama o le faamuamua o le Atua ma isi i lo oe lava. “E le faaitaita gofie” (fuaiupu 5) ua faamatala mai ai se tasi e le ita gofie. “E talitonu i mea uma” (fuaiupu 7) ua faamatala mai ai se tasi e taliaina upumoni uma.
O ai e ona le soifua lea ua avea ma faataitaiga o nei uiga faaleatua uma o le alofa na faamatalaina e Paulo?
I le Moronae 7:47 tatou te faitau ai na aoao mai e le perofeta o Mamona e faapea “o le alofa mama o le alofa le pona lea o Keriso.” E mafai ona e fuafua e tusi le faauigaga lenei ma le mau i autafa o le 1 Korinito 13:4–8.
Filifili ni faamatalaga se lua pe tolu o le alofa moni mai le 1 Korinito 13:4–8. I lau api talaaga mo le suesueina o tusitusiga paia, faamatala pe o faapefea ona faamatala ai Iesu Keriso, ma saunia se faataitaiga mai Lona soifuaga mo faamatalaga taitasi na e filifilia.
O le upumoni e tasi e mafai ona tatou aoao mai le 1 Korinito 13:4–8 o le a o tatou saili ia maua le meaalofa faaleagaga o le alofa moni, tatou te avea atili e pei o lo tatou Faaola, o Iesu Keriso.
O le a sou manatu o le a le uiga i le fuaiupu 8faapea “e le uma le alofa”?
Ata
Elder Jeffrey R. Holland
Sa faamatala e Elder Jeffrey R. Holland o le Korama a Aposetolo e Toasefululua se ala e tasi e le uma ai lava le alofa moni: “Ua i ai le sao o le olaga i le fefe ma toilalo. O nisi taimi e i ai mea e faaletonu. O nisi taimi e tuua i tatou e tagata, po o le tamaoaiga po o pisinisi po o faigamalo. Ae o le mea e tasi i le olaga nei po o le faavavau eleaveesea ma i tatou—o le alofa mama lea o Keriso” (O Keriso ma le Feagaiga Fou [1997], 337).
I le 1 Korinito 13:9–12 tatou te faitau ai i mea na aoao mai e Paulo e uiga i le mafuaaga o le a iu ai ina mou atu ia meaalofa faaleagaga o le malamalama ma le valoaga. Sa matau e Paulo o le malamalama e maua i lenei olaga e le atoatoa, ma o le a toe maua se malamalama atoatoa i le faavavau.
Faitau le 1 Korinito13:13, ma vaavaai mo meaalofa e tolu a le Agaga na aoao mai e Paulo o le a tumau, o lona uiga e mausali pe tumau pea lava.
E faavae i le 1 Korinito 13:13, faamaea le upumoni lenei: ____________________ o le meaalofa aupito silisili a le Agaga.
Aisea e te manatu ai o le alofa moni o se meaalofa aupito silisili a le Agaga?
Pei ona tusia i le 1 Korinito 14:1 , na fautua atu Paulo i le Au Paia ia “tau i le alofa.” Faitau le Moronae 7:48, ma vaavaai po o a mea na aoao atu e Moronae i tagata e fai ina ia maua ai le meaalofa o le alofa moni.
E faapefea ona tatou maua lenei meaalofa ma isi meaalofa faaleagaga? E tusa ai ma Mamona, o ai e faaee i ai e le Tama Faalelagi le meaalofa o le alofa moni?
Tali fesili nei i lau api talaaga mo le suesueina o tusitusiga paia:
E mafai faapefea e le maua o le meaalofa o le alofa moni ona faaleleia atili a tatou sootaga ma le aiga, uo, ma paaga?
O anafea na e molimauina ai le alofa moni i le ala na taulima ai oe po o isi e se tasi?
O le fea o uiga faaleatua o le alofa moni o loo lisi i le 1 Korinito 13:4–7ua e manatu e sili ona faigata ona e maua? Aisea? Tusi se sini pe o le a le mea o le a e faia ina ia mulimuli ai ma maua le meaalofa o le alofa moni.
Ua aoao mai Paulo o le meaalofa o le valoaga e sili atu nai lo le meaalofa o gagana.
I le 1 Korinito 14:1–3 sa fautuaina ai e Paulo le Ekalesia e saili i meaalofa o valoaga. Fai mai a ia, o le meaalofa o valoaga e faagaeetia ai, pe aoao ai isi e sili atu nai lo le mea e faia e le meaalofa o gagana.
“O se valoaga e aofia ai upu musuia faalelagi po o tusitusiga, lea e maua e se tagata e ala i faaaliga mai le Agaga Paia. O le molimau ia Iesu o le agaga lea o valoaga ia Iesu” Faaa. 19:10). … Pe a vavalo atu se tagata, e tautala o ia pe tusia mea e finagalo le Atua na te iloa, mo lona lava lelei po o le lelei o isi” (Taiala i Tusitusiga Paia, “Valoaga, Valoia,” scriptures.lds.org).
Mai le 1 Korinito 14:1–3 ua tatou aoao ai a o tatou aoao atu ma molimau atu e ala i musumusuga, e mafai ona tatou fesoasoani e faagaeetia ma faamafanafana isi. O se tasi auala e mafai ai ona tatou apoapoai atu i isi (tagai fuaiupu 3) o le faamalosiau atu lea ia i latou.
Mafaufau pe a faamafanafanaina oe, faamalosiau, faatonu oe e se aoaoga po o se molimau a se tasi.
I le 1 Korinito 14:4–40, na lapataia ai e Paulo le Au Paia i Korinito e uiga i le meaalofa o le tautala i gagana. Sa ia lapatai atu afai e faaaogaina faaletatau, o le a le faagaeetia e le meaalofa o gagana le Ekalesia ma o le a faalavelaveina ai tagata mai le sailia o meaalofa sili atu faaleagaga. Sa aoao atu foi e Paulo e faapea “o le Atua e le o o le Atua ia o le faasoesa” (1 Korinito 14:33) ma o mea uma i le Ekalesia e ao ona faia i le faatulagaga lelei.
Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:
Ua ou suesueina le 1 Korinito 12–14 ma faamaeaina lenei lesona i le (aso).
O fesili, mafaufauga ma manatu faaopoopo ou te fia faasoa atu i lou faiaoga: