Sa tusi atu le Aposetolo o Paulo i le Au Paia i Tesalonia ina ua ia iloa sa latou faamaoni i le talalelei e ui lava i sauaga. Sa ia viia i latou mo lo latou faamaoni ma le naunau e aoao atu le talalelei. Sa aoao foi i latou e Paulo e uiga i le Toetutu o e ua oti i le Afio Mai Faalua o Iesu Keriso, ma sa ia aoaoina i latou i auala e saunia ai mo le Afio Mai Faalua.
Ua viia e Paulo le Au Paia i Tesalonia mo lo latou faamaoni ao i ai i puapuaga
Sue Tesalonia i luga o Faafanua o le Tusi Paia, nu. 13, “O Malaga Faafaifeautalai a le Aposetolo o Paulo,” o loo i le faaiuga o le Tusi Paia. O le Au Paia i Tesalonia o nisi o uluai tagata Europa liliu mai i le Ekalesia. O Paulo, Sila, ma Timoteo sa talai muamua iina i le taimi o le malaga lona lua faafaifeautalai a Paulo, ae sa tutuliese i latou mai le aai e nisi o taitai Iutaia (tagai Galuega 17:5–15). Sa faaauau ona sauaina le Au Paia i Tesalonia e oo lava i le taimi na o ese ai Paulo ma ana soa. Sa tusia mulimuli ane e Paulo lenei tusi i le Au Paia e faamalosiau atu ia i latou ao latou feagai ma sauaga.
Pe sa i ai se taimi sa e taumafai ai e faasoa atu le talalelei i se tasi? I lau api talaaga mo le suesueina o tusitusiga paia, faamatala ai lou aafiaga. Mafaufau i fesili nei: Na faapefea ona tali mai i lau savali? O a ni auala sa faamanuiaina ai oe ona o au taumafaiga e faasoa atu le talalelei? O a nisi o luitau e ono oo ia i tatou ao tatou tauamfai e faasoa atu le talalelei i isi?
Ao e suesue i le 1 Tesalonia 1–2, vaavaai mo upumoni e mafai ona fesoasoani ia te oe ao e faasoa atu le talalelei i isi.
Faitau le 1 Tesalonia 1:5–6, ma vaavaai mo auala sa faasoa atu ai e le Aposetolo o Paulo le talalelei i Tesalonia ao i ai ma i latou. Atonu e te manao e faailoga ia upu upu ma le mana i le fuaiupu 5.
Sa faamatala mai e Elder Bruce R. McConkie o le Korama a Aposetolo e Toasefululua le eseesega i le va o le “upu” ma le “mana” o le talalelei.
Ata
Elder Bruce R. McConkie
“O le talalelei moni e i ai ni mea se lua: O le Upu, ma le Mana. E mafai e soo se tasi ona maua le upu; o tusi o loo tusia ai e maua i le atulaulau atoa. Peitai o le mana e ao ona sau mai le Atua; e ala mai ma e ao ona faaaoga e tusa ai ma lona mafaufau ma lona finagalo ia i latou o e usitaia le tulafono latou te agavaa ai mo le mauaina.
“O le upu o le talalelei o se tala tautalagia pe tusia o mea e ao ona faia e tagata ina ia faaolaina ai. …
“Ae o le faaolataga moni e na o le taimi lava e maua ma faaaogaina ai le mana o le Atua; ma o lenei mana o le mana o le perisitua ma le mana o le Agaga Paia” (Doctrinal New Testament Commentary, 3 vols. [1965–73], 3:42–43).
Mafaufau e faailoga i le 1 Tesalonia 1:6 mea na fai e tagata Tesalonia ina ua uma ona aoaoina i latou i le talalelei e ala i le upu ma le mana o le Atua.
Mai le 1 Tesalonia 1:5–6 e mafai ona tatou aoao ai i le mataupu faavae lenei: Ao tatou aoao i le talalelei a Iesu Keriso e ala i le upu ma le mana o le Atua, e mafai ona tatou fesoasoani i isi ia avea ma soo o le Alii ma Ana auauna.
Faitau le 1 Tesalonia 1:7–9, e vaavaai ai pe na faapefea e faataitaiga a le Au Paia Tesalonia ona aafia ai isi tagata talitonu sa siomia i latou.
Mai le faataitaiga a le Au Paia i Tesalonia, e mafai ona tatou aoao ai i upumoni nei: E mafai ona tatou faasoa atu le talalelei e ala i a tatou faataitaiga.
Ata
Peresitene Dieter F. Uchtdorf
I le faamatalaga o loo i lalo, vase lalo o le saunoaga a Peresitene Dieter F. Uchtdorf o le Au Peresitene Sili, o le auala sili ona lelei e faasoa atu ai le talalelei. “O le auala sili ona lelei e talai atu ai le talalelei, e ala lea i faataitaiga. Afai tatou te ola e tusa ai ma o tatou talitonuga, o le a faapea ona mātau e tagata. Afai e susulu atu foliga o Iesu Keriso i o tatou olaga [tagai Alema 5:14], afai tatou te fiafia ma lelei ma le lalolagi, o le a fia iloa e tagata pe aisea. O se tasi o lauga aupito maoae ua fofogaina e uiga i le galuega faafaifeautalai, o le manatu faatauvaa lenei na faia ia St. Francis o Assisi: ‘Tala’i le talalelei i taimi uma, ma a manaomia, faaaoga upu’ [i le William Fay and Linda Evans Shepherd, Share Jesus without Fear (1999), 22]” (“Faatalitali i le Auala i Tamaseko,” Ensign po o le Liahona, Me 2011, 77).
Mafaufau i se taimi na fesoasoani ai se faataitaiga a se tasi ia te oe, a le o le talia ai o le talalelei po o le ola atoatoa ai i le talalelei.
I le 1 Tesalonia 2:1–13, sa tusi ai Paulo e uiga i lana auaunaga muamua atu i Tesalonia. Sa ia talanoa atu i nisi o le au faitio i Tesalonia o e sa fesiligia lona faamoani ma ona faanaunauga i le taimi o lana auaunaga. Sa puipui e Paulo o ia lava e ala i le faamatalaina o le tulaga faamaoni ma le moni sa latou aoaoina ma auauna atu ai ma ana soa i le Au Paia. O ana upu o le toe faamanatu o upu o loo maua i le Mataupu Faavae ma Feagaiga 12:8: “Ma e leai se tasi e mafai ona fesoasoani i lenei galuega vagana ai ua lotomaualalo o ia ma tumu i le alofa, ua i ai le faatuatua, faamoemoe, ma le alofa mama.”
E lei toe foi atu Paulo i Tesalonia ina ua tuli ese o ia i le taimi o lana malaga lona lua faafaifeautalai (tagai Galuega 17:10). Fai mai o ia, sa le mafai ona toe foi atu ona sa “faalavelave” Satani i le faia o lea mea (1 Tesalonia 2:18). Sa lei tuuina mai e Paulo ni faamatalaga auiliili i le auala na faalavelave ai Satani i lona toe foi atu i Tesalonia, ae e manino lava o sauaga mai tagata Iutaia na faamalosia ai Paulo e aloalo solo i lana malaga (tagai Galuega 17:14–15).
Ua aoao e Paulo le Au Paia i Tesalonia e uiga i le Afio Mai Faalua
Faailoga pe e te manatu o faamatalaga nei e uiga i le Afio Mai Faalua o Iesu Keriso e moni (M) pe sese (S):
____ 1. O le Au Paia faamaoni o e maliliu ao lei oo i le Afio Mai Faalua, o le a le toetutu seia oo i le faaiuga o le Meleniuma.
____ 2. O le Au Paia faamaoni o e ola i le Afio Mai Faalua o le a siiae e faafetaiai Keriso pe a afio mai o Ia.
____ 3. O le Afio Mai Faalua o le a faateia ai tagata uma e pei o se gaoi i le po.
Ao e suesue i le 1 Tesalonia 3–5, vaavaai mo upumoni e uiga i le Afio Mai Faalua o Iesu Keriso, o le a fesoasoani e te iloa ai tali sao i le suega puupuu o le moni–sese (o loo aofia foi tali i le faaiuga o le lesona).
I le 1 Tesalonia 3:1–7 tatou te aoao ai, sa lipoti atu e Timoteo ia Paulo sa tumau le faatuatua o le Au Paia e ui lava ina oo ia i latou sauaga.
Faitau le 1 Tesalonia 3:11–13, ma vaavaai mo le mea sa faamoemoe Paulo o le a fai e le Alii mo le Au Paia latou te saunia ai mo Lona Afio Mai Faalua. Mafaufau e faailoga pe faamanatu i totonu o au tusitusiga paia mea e te maua.
I le 1 Tesalonia 4:1–12 tatou te aoao ai, sa uunaia e Paulo le Au Paia ia faapaiaina, pe ia mama ma atoatoa, e ala i le usiusitai i poloaiga a le Atua, lea na aoao ai i latou e Paulo ma isi.
Ata
O Le Afio Mai Faalua
Sa le malamalama le Au Paia i Tesalonia i nisi o vaega o le Afio Mai Faalua o Iesu Keriso. Sa latou popole e faapea, o tagata o le Ekalesia i Tesalonia o e ua maliliu, o le a le mafai ona maua faamanuiaga o le Afio Mai Faalua.
Faitau le 1 Tesalonia 4:13–14, 16, ma vaavaai mo le mea na aoao atu e Paulo e uiga i le Au Paia faamaoni o e maliliu ao lei oo i le Afio Mai Faalua. Sa ia faaaogaina upu o momoe ma le momoe e faatatau atu ia i latou o e ua maliliu.
Mai nei fuaiupu ua tatou aoao ai le upumoni lenei: O le Au Paia faamaoni o e maliliu ao lei oo i le Afio Mai Faalua o Iesu Keriso o le a toetutu pe a toe afio mai o Ia.
O le fuaitau “e faapea foi ona aumaia e le Atua faatasi ma ia e o momoe ona o Iesu” i le 1 Tesalonia 4:14 o lona uiga, o le Au Paia faamaoni o e toetutu i le Afio Mai Faalua o le a siiae e faafetaiai le Faaola ma o le a o ifo faatasi ma Ia i le mamalu (tagai MF&F 88:97–98).
Mai nei fuaiupu ua tatou aoao ai i le upumoni lenei: O le Au Paia faamaoni o e ola i le taimi o le Afio Mai Faalua o Iesu Keriso, o le a siiae e fetaiai ma Ia pe a afio mai o Ia.
Faitau le 1 Tesalonia 4:18, ma vaavaai mo le mea na faamoemoe Paulo o le a fai e le Au Paia i le uma ai ona aoao o nei upumoni e uiga i le Afio Mai Faalua.
Tali le fesili lenei i lau api talaaga mo le suesueina o tusitusiga paia: O le a le faamafanafanaga e te maua i nei aoaoga faavae e uiga i le Afio Mai Faalua o Iesu Keriso?
Faitau le 1 Tesalonia 5:1–3, ma vaavaai mo tala faatusa e lua na faaaoga e Paulo i le taimi o le Afio Mai Faalua.
O le a lou manatu i le mea ua aoao mai e le tala faatusa a Paulo i le gaoi i le po e uiga i le Afio Mai Faalua?
Ata
Elder Bruce R McConkie
Na faamalamalama mai e Elder Bruce R. McConkie: “O le a afio mai [O le Alii] o se gaoi i le po, e faafuasei ma e aunoa ma se lapataiga, i le lalolagi, ia i latou o e o loo i le pogisa faaleagaga, ia i latou o e e le o faamalamalamaina e le mana o le Agaga” (Doctrinal New Testament Commentary, 3:54; tagai foi Mataio 24:42–43).
Na aoao mai foi e Elder McConkie le mea lenei e faatatau i le tala faatusa i se fafine e faatiga fanau: “Na te le iloa le itula po o le minute e taunuu mai ai le tamaitiiti, ae na te iloa le taimi tonu” (Doctrinal New Testament Commentary, 3:54).
E faavae i lenei tala faatusa, atonu foi tatou te mafaufau i auala e talitutusa ai tofotofoga e taimua i le Afio Mai Faalua i tiga o le faatiga fanau. Ae e pei lava o le matagofie o le taunuu mai o se pepe, o le a faapena foi le matagofie o le Afio Mai Faalua i e amiotonu.
Faitau le 1 Tesalonia 5:4–6, ma vaavaai mo le pogai o le a le faateia ai le Au Paia i le Afio Mai Faalua. Atonu e te manao e faailoga pe manatua mea e te maua.
O le fuaitau “tagata o le malamalama” i le fuaiupu 5 e faatatau o tagata faamaoni o le Ekalesia o e “faatea ese ai galuega o le pogisa” (Roma 13:12) ma i ai le mafutaga a le Agaga Paia ma o le a, faapea, ona saunia ai mo le Afio Mai Faalua (see MF&F 106:4–5).
Tatou te aoaoina le mataupu faavae lenei mai le 1 Tesalonia 5:4–6: Afai tatou te faamoani ma vaavaai mo faailoga e taimua i le Afio Mai Faalua o Iesu Keriso, o le a faapea ona tatou saunia pe a toe afio mai o Ia.
Ata
Peresitene Iosefa Filitia Samita
Na aoao mai Peresitene Iosefa Filitia Samita, o auala e mafai ona tatou saunia ai mo le Afio Mai Faalua o le “o le faalogo ma usitai i afioga a Keriso, i ana aposetolo ma vaavaai” (Doctrines of Salvation, comp. Bruce R. McConkie, 3 vols. [1954–56], 3:53).
Toe faamanatu au tali i le suega puupuu o le moni–sese i le amataga o le lesona lenei. E faavae i upumoni ua e aoaoina, mata e te suia ni au tali?
I le 1 Tesalonia 5:7–22 sa fautuaina ai e le Aposetolo o Paulo le Au Paia i auala e saunia ai mo le Afio Mai Faalua o Iesu Keriso.
Faitau le 1 Tesalonia 5:12–22, ma vaavaai mo le mea na fautuaina e Paulo le Au Paia e fai e saunia ai i latou lava ma isi e feiloai ma le Faaola i Lona Afio Mai Faalua.
Tali fesili nei i lau api talaaga mo le suesueina o tusitusiga paia:
O le a se fautuaga se tasi mai le 1 Tesalonia 5:14–22 e tulaga ese ia te oe?
E mafai faapefea i le ola ai i lenei fautuaga ona fesoasoani ia te oe ma isi ia saunia mo le Afio Mai Faalua?
Faitau le 1 Tesalonia 5:23–24, ma vaavaai mo le mea na tau mai e Paulo o le a fai e le Atua mo Lana Au Paia faamaoni ao latou saunia mo le Afio Mai Faalua.
E faavae i mea ua e aoaoina i le aso, iloilo po o a ni mea o le a e faia e saunia lelei ai oe lava mo le Afio Mai Faalua o Iesu Keriso. Tusi au sini ma fuafuaga i se fasipepa, ona tuu lea o le pepa i se mea o le a fesoasoani e faamanatu atu ai ia te oe na sini ma fuafuaga.
Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:
Ua ou suesueina le 1 Tesalonia ma faamaeaina lenei lesona i le (aso).
O fesili, mafaufauga ma manatu faaopoopo ou te fia faasoa atu i lou faiaoga: