Na aoao e le Aposetolo o Paulo le Au Paia i Efeso, e mafai ona faaolaina tagata agasala uma e ala i le alofa tunoa o le Atua ma o Iutaia ma Nuuese ua tasi i le aiga o le Atua. Na faamalamalama foi e Paulo o le Ekalesia a Iesu Keriso ua fausia i luga o le faavae o aposetolo ma perofeta, ma faasoa mai lona manao ia tofo le Au Paia i le alofa o Iesu Keriso.
Ua aoao mai Paulo i le ala e faaola ai e le toto o Iesu Keriso le Iutaia ma le Nuuese
Mafaufau i se taimi atonu na e lagona ai le faaesea po o le vavaeeseina o oe mai isi.
I le taimi na tusi ai e le Aposetolo o Paulo lana tusi i Efeso, sa lagona e nisi o tagata Iutaia o le Ekalesia, sa sili atu i latou i tagata liliu mai o nuuese, ona o Iutaia o tagata Isaraelu i le fananau mai ma ua peritomeina ia alii.
Faitau le Efeso 2:1–3, ma vaavaai mo le auala na faamatala ai e Paulo le tulaga faaleagaga o le Au Paia o nuuese (o outou ma na outou i fuaiupu 1–2) ma le Au Paia Iutaia (tatou i le fuaiupu 3) ae latou te lei liliu mai i le Faaola ma Lana Ekalesia. O le fuaitau “taitai o le au faipule i le vanimonimo” i le fuaiupu 2 e faatatau i le tiapolo ma ana faatosinaga i le lalolagi atoa.
E tusa ai ma fuaiupu 1–2, o le a le tulaga faaleagaga o Nuuese ao lei liua?
E tusa ai ma le fuaiupu 3, o le a le tulaga faaleagaga o Paulo ma Iutaia ao lei liua?
Sa faamatalaina e Paulo ia Nuuese ma Iutaia ua feoti faaleagaga, po o le vavaeese mai le Atua, ona o a latou agasala (tagai fuaiupu 1). Sa latou mulimuli atu i ala po o manao o le tino ma faapea ona aumai faamalosi ai i latou lava i le toasa o le Atua.
Faitau le Efeso 2:4–6, ma vaavaai mo le tulaga faaleagaga o le Au Paia nuuese ma Iutaia ina ua uma ona liua. O le upu faaola i le fuaiupu 5 o lona uiga o le ola, ae o le fuaitau “i mea o i le lagi” i le fuaiupu 6 e faatatau i le malo selesitila (tagai Bruce R. McConkie, Doctrinal New Testament Commentary, 3 vols. [1965–73], 2:500).
Ia matau, ina ua mavae lo latou liua, sa faaolaina e le Alii ia Iutaia ma Nuuese, po o le faaola mai le oti faaleagaga ma le tulaga agasala. Tatou te faatatau atu i lenei mea o le toefanau faaleagaga po o le laveai mai a tatou agasala.
Faitau le Efeso 2:7–10, ma vaavaai mo le mea na mafai ai e Nuuese ma Iutaia ona faia lenei suiga.
Ua aoao mai e nei fuaiuipu le upumoni lenei: Ona o le alofa tunoa o le Atua, ua mafai ai ona faaolaina tagata uma lava e ala i le faatuatua ia Iesu Keriso.
O le faatuatua moni ia Iesu Keriso e taitai atu ai i taimi uma i le mulimuli ia te Ia ma fai galuega lelei. Ia matau na faamamafa mai e Paulo e le mafai ona tatou faaolaina i tatou lava, e tusa lava po o le a le lelei o a tatou galuega (tagai Efeso 2:8–9). Na faamalamalama mai e Peresitene Dieter F. Uchtdorf o le Au Peresitene Sili lo tatou manaomia o le alofa tunoa o le Atua:
Ata
Peresitene Dieter F. Uchtdorf
“Ona o i tatou uma ua ‘agasala, ma ua le oo i le mamalu o le Atua’ [Roma 3:23] ma ona ‘e le mafai e se mea eleelea ona ulu atu i le malo o le Atua’ [1 Nephi 15:34], o i tatou uma la ua le agavaa e toe ui atu i le afioaga o le Atua.
“E tusa lava pe ao ona tatou auauna atu i le Atua ma o tatou agaga atoa, e le lava lea, aua o le a avea pea i tatou ma ni ‘auauna lē aoga’ [Mosaea 2:21]. E le mafai ona tatou mauaina lo tatou ala i le lagi; o manaoga o le faamasinotonu e tu o se papupuni, lea e leai ai so tatou malosi e faatoilalo ai e i tatou lava ia.
“Ae e le leiloloa tagata uma.
“O le alofa tunoa o le Atua o lo tatou faamoemoe sili ma le faavavau lea.
“E ala i le taulaga a Iesu Keriso, le fuafuaga o le alofa mutimutivale ua faamalieina ai manaoga o le faamasinotonu [tagai Alema 42:15] ‘ma [aumai] ai ala i tagata e mafai ai ona latou maua o le faatuatua e salamo ai’ [Alema 34:15].
“E ui e ‘ulaula a tatou agasala, ae mafai ona sinasina e pei o le kiona [tagai Isaia 1:18]. Ona ‘na foaifuaina e [lo tatou Faaola pele] Ia e fai ma togiola mo tagata uma’ [1 Timoteo 2:6], o lea ua saunia ai mo i tatou se faitotoa e ulu atu ai i Lona malo e faavavau [tagai 2 Peteru 1:11].
“Ua matala le faitotoa! …
“Ina ia mautofi i lenei mamalu, tatou te manaomia atili nai lo o se faitotoa ua matala; e tatau ona tatou ulu atu i lenei faitotoa ma se manao i le loto ina ia sui—o se suiga tele naua lea o loo faamatala e tusitusiga paia o le ‘toe fanauina; ioe, fananauina i le Atua, ma suia mai lo tatou tulaga faalelalolagi ma pa’u, i se tulaga o le amiotonu, ua togiolaina e le Atua, ma avea ma ona atalii ma afafine’ [Mosaea 27:25]. …
“O le alofatunoa o le meaalofa a le Atua, ma o lo tatou manao ina ia usiusitai i poloaiga taitasi a le Atua, o le auala lea tatou te faailoa atu ai i lo tatou Tama Faalelagi tatou te mananao i lenei meaalofa paia” (“O Le Meaalofa o le Alofa Tunoa,” Ensign po o le Liahona, Me 2015, 108, 110).
Tali le fesili lenei, i lau api talaaga mo le suesueina o tusitusiga paia: E faapefea e le faaali o le faatuatua ia Iesu Keriso ma le salamo i a tatou agasala ona fesoasoani tatou te maua ai le meaalofa o le alofa tunoa o le Atua?
Ata
faamatalaga, faataitaiga o le malumalu o Herota
O le ata lenei o loo faaalia ai vaega o se faataitaiga o le malumalu o Herota i Ierusalema. O au o loo faasino atu i le “pa vaeloto” (Efeso 2:14) i lotoa i fafo atu o le malumalu. Ona o tagata Nuuese sa le o ni Isaraelu i le fananau mai, o le ola ai i lalo o le tulafono faa Mose, sa faasaina ai i latou ona o i tua atu o lenei pa i eria e sili atu ona paia o le malumalu. Sa taua i latou o “tagata ese i le sauniga o le malo o Isaraelu, o tagata ese foi i feagaiga ua i ai le mea na folafolaina” (Efeso 2:12). O le pa vaeloto faaletino na faatusaina i le vavaeseina faaleagaga lea sa i ai i le va o Iutaia ma Nuuese ao lei oo le faaaliga ia Peteru e faapea, e tatau ona talaiina atu le talalelei i Nuuese.
Faitau le Efeso 2:12–15, ma vaavaai po o le a le mea na talepeina i lalo le papupuni i le va o Iutaia ma Nuuese. O le upu feitagai i le fuaiupu 15 o lona uiga o le “tetee, inoino, ma le ita” (Guide to the Scriptures, “Enmity,” scriptures.lds.org).
E tusa ai ma nei fuaiupu, o le a le mea na aumaia faatasi ai Nuuese ma Iutaia?
E ala i le toto o Keriso (o le Togiola), na aveesea ai le pa faafaatusa faaleagaga lea sa vavaeeseina ai Iutaia ma Nuuese, ma sa avea i latou ma “tagata fou e tasi” (Efeso 2:15), po o le tino, po o le vaega tuufaatasi e tasi, ia Keriso. Atonu e te manao e tusi pe faailoga le upumoni lenei i talane o le Efeso 2:12–15: Pe a tatou o mai ia Iesu Keriso ma tofi i Lona alofa tunoa, e faapea ona tatou au faatasi ma le Au Paia a le Atua.
Faitau le Efeso 2:16–19, ma vaavaai mo fuaitau e faamamafa ai le upumoni, ao tatou o mai ia Iesu Keriso ma tofo i Lona alofa tunoa, e mafai ona tatou au faatasi ma le Au Paia a le Atua.
Mafaufau pe aisea e te manatu, e taua ai ona tatou malamalama ma faaaoga lenei upumoni i le Ekalesia i aso nei.
Tali fesili nei i lau api talaaga mo le suesueina o tusitusiga paia:
E mafai faapefea ona tatou fesoasoani i isi ia avea pe toe lagona le pei o le “nuu faatasi” (Efeso 2:19) i le Ekalesia nai lo o ni tagata ese?
O le a se taimi na fesoasoani atu ai se tagata ia te oe ia e lagona le pei o se nuu faatasi ma le Au Paia ae le o se tagata ese?
O le a se taimi sa e taumafai ai e fesoasoani i se tagata ia maua lena lava lagona?
Mafaufau i se tagata e te iloa e ono aoga ai le auai mai i se gaoioiga a le Ekalesia. Valaaulia lenei tagata i se gaoioiga o loo loma po o se fonotaga a le Ekalesia, ma ia faia se taumafaiga faifaipea e fesoasoani i lenei tagata ia lagona le taliaina i lau uarota po o le paranesi.
Faitau le Efeso 2:20–22, ma vaavaai mo le mea na aoao atu e Paulo o le faavae o le Ekalesia.
Faauma le upumoni lenei e faavae i aoaoga a Paulo i na fuaiupu: O le Ekalesia a le Alii o loo faavaeina i luga , ma Iesu Keriso o le .
O le maatulimanu o se maa tele e faataatia i le tulimanu o se faavae e tuuina atu le malosiaga ma le mausali i le fale atoa.
Ata
maatulimanu
O a ni auala ua avea ai Iesu Keriso ma “maa tulimau autu” (Efeso 2:20) o le Ekalesia?
Ao e mafaufau i le Efeso 2:21–22, mafaufau i le mea e tupu i le Ekalesia atoa ona o lenei Maatulimanu.
Tali fesili nei i lau api talaaga mo le suesueina o tusitusiga paia:
O a ni auala e fausia ai e aposetolo ma perofeta le vaega e totoe o le faavae o le Ekalesia?
E faapefea ona tuuina atu e lenei faavae le mausali i le Ekalesia ma puipuia ai e faasaga i osofaiga a le tiapolo?
Ua faailoa atu e Paulo ona faanaunauga mo le Au Paia i Efeso
E pei ona tusia i le Efeso 3:1–16, na talai atu le Aposetolo o Paulo e uiga ia Iesu Keriso ma aoao atu, e ala ia te Ia, e mafai ai e Nuuese ona avea ma “suli faatasi” (fuaiupu 6) ma Isaraelu ma tofo i folafolaga a le Atua. O le galuega a Paulo o le talai atu o le talalelei a Iesu Keriso i Nuuese.
Faitau le Efeso 3:17–19, ma vaavaai mo le mea na manao Paulo ia iloa ma lagona e le Au Paia.
E tusa ai ma nei fuaiupu, o le a le mea na manao Paulo ia iloa ma lagona e le Au Paia?
Mai le Efeso 3:1–19 ua tatou aoao ai e saili aposetolo ma perofeta e fesoasoani i fanau a le Atua ia iloa ma lagona le alofa o Iesu Keriso.
Tali fesili nei i lau api talaaga mo le suesueina o tusitusiga paia:
E faapefea ona fesoasoani aposetolo ma perofeta i fanau a le Atua ia malamalama i faamanuiaga o le faaeaga ma lagona le alofa o Iesu Keriso i o tatou aso?
O le a se taimi na fesoasoani ai aoaoga a aposetolo ma perofeta ina ia e malamalama i faamanuiaga o le faaeaga pe lagona le alofa o Iesu Keriso i lou olaga?
Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:
Ua ou suesueina le Efeso 2–3 ma faamaeaina lenei lesona i le (aso).
O fesili, mafaufauga ma manatu faaopoopo ou te fia faasoa atu i lou faiaoga: