Faatomuaga i le Tito
Aisea e Suesue ai Lenei Tusi?
O le tusi a Paulo ia Tito, e pei o ana tusi ia Timoteo, o loo i ai ni fautuaga tumau mai le Aposetolo o Paulo i se taitai o le Ekalesia i le lotoifale. Sa tusia e Paulo e faapea, o le “faamoemoe i le ola e faavavau” sa muai folafola mai e le Atua i le olaga i le muai olaga “talu mai tausaga o le vavau” (Tito 1:2). Sa ia aoao mai e tatau i le Au Paia ona tulimatai atu i “le faatuatuaga e manuia ai” o le faaeaga ma i le Afio Mai Faalua (Tito 2:13). Sa tusi atu foi Paulo ia Tito “i le faataeleina i le toefuataiina” ma le “faafouina e le Agaga Paia” (Tito 3:5), e taua ai le sauniga o le papatisoga ma le taunuuga faamamaina o le mauaina o le meaalofa o le Agaga Paia, o ia mea e lua o ni sauniuniga e “fai ma suli e tusa ma le faamoemoe i le ola e faavavau” (Tito 3:7). O le suesueina o le fautuaga musuia a Paulo ia Tito, e mafai ai ona faateleina lou faatuatua o aoaoga faavae ma sauniga o le talalelei e aumaia ai le faamoemoe mo le ola e faavavau.
O Ai na Tusia Lenei Tusi?
O le tusi a Tito na tusia e Paulo (tagai Tito 1:1)
O Anafea ma o Fea na Tusia ai?
E masalo sa tusia e Paulo le Tusi ia Tito i le va o lana tusiga o le 1 ma le 2 Timoteo, i se vaitaimi o le T.A. 64–65 (tagai Taiala i Tusitusiga Paia, “Pauline Epistles,” scriptures.lds.org). Sa tusia e Paulo le Tusi ia Tito ina ua mavae lona faafalepuipuiina muamua i Roma. Na te lei faailoa mai po o fea sa i ai o ia i le taimi sa ia tusia ai le tusi lenei.
O Ai Na Tusia i Ai ma Aisea?
O lenei tusi sa tusia e Paulo ia Tito, o le sa taua e Paulo o “lou lava atalii i la le faatuatua ua tuu tele” (Tito 1:4). O Tito o se tagata Eleni (tagai Kalatia 2:3) ma sa faaliliuina mai i le talalelei e Paulo lava ia (tagai Bible Dictionary, “Titus”). Ina ua mavae lona liliuga, sa galulue faatasi Tito ma Paulo e faasalalau atu le talalelei ma faatulaga le Ekalesia (tagai Bible Dictionary, “Titus”). Sa fesoasoani o ia e ao mai foai mo e matitiva i Ierusalema (tagai 2 Korinito 8:6, 16–23) ma sa o foi ma Paulo i le fono i Ierusalema (tagai Kalatia 2:1). Sa tuuina atu e Paulo ia Tito le matafaioi o le aveina atu o lana tusi muamua i le Au Paia o loo nonofo i Korinito (tagai 2 Korinito 7:5–15). Sa ia tusi atu ia Tito ina ia faamalosia o ia i lana tofiga e taitai ma tausia le paranesi o le Ekalesia i Kereta e ui lava i le [i ai] o le tetee (tagai Tito 1:5, 10–11; 2:15; 3:10).
O A Nisi o Vaaiga Iloga o Lenei Tusi?
O lenei tusi o se tasi o tusi o mataupu faaleagaga (i se faifeau, po o se taitai, i le Ekalesia), faatasi ai ma le 1 ma le 2 Timoteo (tagai Bible Dictionary, “Pauline Epistles”). O le Tusi a Tito ua tuuina mai ai le faamaoniga muamua na faavaeina le Ekalesia i le motu o Kereta i Eleni i le Sami Metiteriane (tagai Tito 1:5). Sa i ai ia Tito le tiutetauave o le valaauina o epikopo fou i le motu. Sa lisiina e Paulo nisi o agavaa faaleagaga mo epikopo (tagai Tito 1:6–9). Ma le isi, sa ia tuuina atu ni fautuaga maoti i alii, tamaitai, ma auauna i amioga e tatau ai mo le Au Paia (tagai Tito 2:2–10).
Otootoga
Tito 1. Ua faatonu e Paulo ia Tito e faauu taitai o le Ekalesia ona lisi atu lea o nisi o agavaa mo epikopo. Ua ia faatonu Tito e faasao talitonuga sese ma aoai faiaoga pepelo o e “ua tau ane ua latou iloa le Atua, a e faafiti ia te ia i a latou galuega” (Tito 1:16).
Tito 2. Ua uunaia e Paulo ia Tito e faatonu tagata matutua o le Ekalesia ia faia ni faataitaiga mo le Au Paia laiti ifo. Ua ia talosagaina foi Tito e aoao auauna ia usiusitai i o latou matai. Ua faamalamalama atu e Paulo le ala e tatau ona ola ai soo ao latou sauniuni mo le toe foi mai o le Alii. Ua ia faamatalaina le togiola lea e faataunuuina e ala ia Iesu Keriso.
Tito 3. Ua aoao mai Paulo, e tatau i tagata o le Ekalesia ona avea ma ni tagatanuu lelei ma ni soo amiotonu o Iesu Keriso. E ala i le papatisoga, e mafai ai ona tatou maua le ola e faavavau e ala i le alofa tunoa o le Alii.