Faatomuaga i le 2 Tesalonia
Aisea e Suesue ai Lenei Tusi?
I lana Tusi Lona Lua i Tesalonia, sa tusi ai e Paulo ni upu o fautuaga ma faamaninoga i tagata o le Ekalesia o e sa le malamalama i ni vaega faaptioa o le Afio Mai Faalua o Iesu Keriso. O le suesue i ana aoaoga e mafai ona fesoasoani i le natura o le liliuese lea na tupu, ma auala e saunia lelei ai mo le toe foi mai o le Alii.
O Ai na Tusia Lenei Tusi?
Sa tusia e le Aposetolo o Paulo le 2 Tesalonia (tagai 2 Tesalonia 1:1; tagai foi 2 Tesalonia 2:5; 3:17). O le amataga o le tusi o loo i ai foi se faafeiloaiga mai ia Sila ma Timoteo (2 Tesalonia 1:1).
O Anafea ma o Fea na Tusia ai?
“Sa tusia e Paulo tusi i Tesalonia mai Korinito i le taimi o lana malaga lona lua faafaifeautalai,” pe a o le T.A. 50–51 (Taiala i Tusitusiga Paia, “Pauline Epistles,” scriptures.lds.org).
O Ai na Tusia i Ai ma Aisea?
Sa tusia e Paulo le 2 Tesalonia i tagata o le Ekalesia i Tesalonia. O autu o le 1 Tesalonia ma le 2 Tesalonia e tutusa lava, e faailoa mai ai, sa ia tusia le 2 Tesalonia e faamanino ma faalautele ai le tusi muamua. E foliga mai na maua e tagata Tesalonia se tusi taufaasese na faapea sa aumai ia Paulo, lea sa mafua ai ona talitonu ni isi faapea ua uma ona tupu le Afio Mai Faalua (tagai 2 Tesalonia 2:2).
“I le taimi puupuu i le va o tusi e lua, sa pagatia ai le Ekalesia i sauaga [tagai 2 Tesalonia 1:4]; o le faamoemoe i se toe foi vave mai o le Alii na faaosofia ai se fiafia le lelei [tagai 2 Tesalonia 2:2]” (Bible Dictionary, “Pauline Epistles”). Sa tusia e Paulo le 2 Tesalonia ina ia faamalosia ai le faatuatua o nei tagata o le ekalesia ma faasao ai malamalamaaga sese e uiga i aoaoga faavae.
O A Nisi o Vaaiga Iloga o Lenei Tusi?
O le Tusi Lona Lua i Tesalonia ua tuuina mai ai ni faamatalaga taua e uiga i le Afio Mai Faalua o Iesu Keriso. O nisi o faataitaiga e aofia ai manatu faapea, o le a toe foi mai le Alii i le “afi mumu” ma o e amioleaga o le a “faasalaina i latou lava i le fanoga e faavavau lava, ia tea ma le Alii” (2 Tesalonia 1:8–9).
I le tusi lenei tatou te faitau ai, sa valoia foi e Paulo le Liliu Ese Tele, ma aoao mai o le a oo le Ekalesia i se “liliu ese” mai le talalelei ao lei oo i le Afio Mai Faalua o le Alii (tagai 2 Tesalonia 2:2–12). O aoaoga a Paulo e uiga i le Liliu Ese ua faamanatu mai ai i tagata o le Ekalesia i aso nei le pogai sa alagatatau ai le Toefuataiga o le talalelei i aso e gata ai.
Otootoga
2 Tesalonia 1. Ua faafeiloai ma faafetaia e Paulo le Au Paia i Tesalonia. Ua ia aoao atu o tagata amioleaga o le a oo i ai le toasa o le Alii i le Afio Mai Faalua.
2 Tesalonia 2. Ua faasao e Paulo le manatu sese e faapea, ua uma ona oo mai le Afio Mai Faalua ma valoaga e faapea o le a tupu se liliu ese ao lei toe foi mai le Alii. Ua ia uunaia le Au Paia i Tesalonia ina ia tutumau faamaoni.
2 Tesalonia 3. Ua fautuaina e Paulo tagata o le Ekalesia ia galulue mo le mauaina o mea latou te manaomia faaletino, ma ia aua le faavaivai i le faia o mea lelei.