Na faaaoga e le Faaola ia faataoto e aoao atu ai e uiga i le malo i le lagi, o le toefuataiga ma le tuputupu ae o Lana Ekalesia i aso e gata ai, o le faapotopotoina o e amiotonu, ma le faatafunaga o e amioleaga i Lona Afio Mai Faalua.
Ua aoao atu e Iesu le faataoto i le saito ma le titania
Mafaufau i fesili nei, ma tusi se tali i le fesili mulimuli:
Pe i ai se taimi na e lagona ai le fa′atu po o le le fiafia ona o le tele naua o mea leaga i le lalolagi?
Aisea na le na ona ave′esea ai e le Alii le leaga o loo siomia ai i tatou?
Aisea e tatau ai ona e filifili ia amiotonu ae o loo i ai nisi o loo siomia ai oe e foliga mai ua latou le iloa taunuuga le lelei mai a latou filifiliga amioletonu?
A o e suesueina le Mataio 13:24–30, 36–43, vaavaai mo se upumoni e mafai ona fesoasoani e te maua ai le toafilemu a o e taumafai e ola amiotonu i se lalolagi amioleaga. A uma ona suesue le tala o i le Mataio, fuafua e faitau le Mataupu Faavae ma Feagaiga 86:1–7, lea na tuu mai ai e le Alii se malamalama faaopoopo i le faataoto i le saito ma le titania.
I le Mataio 13:24–30 na aoao mai ai e le Faaola se faataoto e uiga i le saito ma le titania.
Ata
saito, titania
O titania o se ituaiga o vao oona. E foliga tutusa le saito ma le titania pe a totogo a’e ae e mafai ona e iloa le eseesega pe a matutua.
Aisea e te manatu ai na ta’u atu e le lulu saito o le fatu lelei i ana auauna e tuu ai pea le saito ma le titania e “tutupu faatasi seia oo i le taimi o le seleselega” (Mataio 13:30)?
E tusa ai ma le Faaliliuga a Iosefa Samita, o le fea e tatau ona ao muamua—o le saito po o le titania?
Ina ua uma ona tuu atu e le Faaola le faataoto i le saito ma le titania, sa fesili atu Ona soo ia te Ia e faamatala mai lona uiga. Faitau le Mataio 13:36–43, ma vaavaai mo le faamalamalamaga a le Faaola o le faataoto. (Atonu e te manao e tusi ia tali i fesili nei i lau tusi paia.)
O ai na luluina, pe totoina, le fatu lelei?
O ai na luluina, pe totoina le titania?
O le a le mea e faatusa i ai le saito ma titania? (A o e tali i lenei fesili, manatua o e amioleaga o i latou ia ua filifili e le salamo [tagai Mataupu Faavae ma Feagaiga 29:17].)
O le Faaliliuga a Iosefa Samita ua faamanino mai ai le fasifuaitau “o le iuga o le lalolagi” i le fuaiupu 39 e faasino i le faatafunaga o e amioleaga i le Afio Mai Faalua o le Faaola. O le Faaliliuga a Iosefa Samita ua fesoasoani foi tatou te malamalama ai o aso e gata ai o le a auina mai ai e le alii ia agelu ma avefeau e fesoasoani e tuueseese e amiotonu mai e amioleaga (tagai Faaliliuga a Iosefa Samita, Mataio 13:39–44 [i le faaopoopoga i le Tusi Paia]).
O le upu moni e tasi o loo aoao mai e lenei faataoto O le a faapotopoto mai e le Alii e amiotonu i aso e gata ai ona faaumatia lea o e amioleaga i Lona Afio Mai Faalua.)
Mafaufau pe ono mafai faapefea e lenei upumoni ona e maua ai le toafilemu a o ola ai i se lalolagi leaga. E mafai faapefea ona e malamalama pe aisea e tatau ai ona e filifili ia amiotonu ae o i ai nisi tagata o siomia oe e foliga latou te le iloa taunuuga le lelei ona o a latou filifiliga amioletonu?
Ona o a tatou faitalia, ua tatou fuafua ai e ala i a tatou filifiliga pe o le a tatou faapotopoto ma e amiotonu pe pologa ma e amioleaga. Manatua talu ai tatou te faia uma lava mea sese, ua valaaulia i tatou e le Faaola e salamo ina ia mafai ai ona tatou faapotopoto faatasi ma e amiotonu.
Faitau le saunoaga lea a Elder David A. Bednar o le Korama a Aposetolo e Toasefululua, ma vaavaai mo mea sa ia saunoa e tatau ona tatou faia ina ia faapotopotoina ai e le Alii:
Ata
Elder David A. Bednar
“E faapotopoto e le Alii Lona nuu a o latou faaalia le faatuatua ia te Ia ma tausi Ana poloaiga. …
“… E faapotopoto e le Alii Lona nuu e tapuai, e atinae le Ekalesia, mo se puipuiga, ma ia maua fautuaga ma faatonuga. …
”Na ta’utino mai e le Perofeta o Iosefa Samita faapea o tupulaga uma, o le faamoemoega paia o le faapotopotoina o le fausia lea o malumalu ina ia mafai ai e fanau a le Alii ona maua sauniga aupito silisili ma maua ai le ola e faavavau [tagai Aoaoga a Peresitene o le Ekalesia: Iosefa Samita (2007), 416–17]” (“O le Agaga ma le Faamoemoega o le Faapotopotoina” [Brigham Young University–Idaho devotional, Oke. 31, 2006], byui.edu/devotionals).
E tusa ai ma Elder Bednar, o a mea e tatau ona tatou faia ina ia faapotopotoina ai e le Alii?
Mafaufau i faamanuiaga ua oo mai i o outou olaga ona ua faapotopoto mai outou e le Alii.
Vaavaai i ata nei:
Ata
o faifeautalai tamaitai o loo aoaoina se aiga, o alii faifeau o loo aoaoina se alii, o tumutumu o le Malumalu o Sate Leki
Mafaufau pe faapefea e nei ata ona faapupula mai mea e mafai ona tatou fai e fesoasoani ai i le Faaola i le faapotopotoina o fanau a le Tama Faalelagi.
Faitau le saunoaga lenei a Elder Russell M. Nelson o le Korama a Aposetolo a Toasefululua:
Ata
Elder Russell M. Nelson
“O lenei mataupu faavae o le faapotopotoina, o se tasi o aoaoga taua O le Ekalesia a Iesu Keriso o le Au Paia o Aso E Gata Ai. … E le gata ina tatou aoao atu lenei mataupu faavae, ae tatou te auai foi i lona faatinoina. Tatou te faia a o tatou fesoasoani e faapotopoto mai le au filifilia a le Alii i itu uma o le veli. …
“… Tatou te aoina mai pepa o le faasologa o gafa, fai pepa o talafaamaumau o le vaega faaleaiga, ma faia galuega sui mo le malumalu e faapotopoto mai ai tagata taitoatasi i le Alii, ma o latou aiga.
Ua faaaoga e Iesu ia faataoto e aoao atu ai e uiga i le malo o le lagi
Ata
fatu o le sinapi, mea faafefete, oa, penina, upega fagota
I le tele o faataoto eseese sa faatusatusa ai e le Faaola le malo o le lagi (po o Lana Ekalesia ma le talalelei) i se fatu o le sinapi, mea faafefete (mea faafefete, po o le fefete, e faaaoga i kuka ma e faaopoopo i le paluga e fesoasoani ai ia fefete a o lei taoina), oa natia, o se penina ma se upega fagota.
Faitau mau taitasi, ma vaavaai mo mea na aoao atu e le Faaola i Ona soo i lena faataoto. I lau api talaaga mo le suesueina o tusitusiga paia, tusi ai po o a upumoni ua e manatu na aoao mai e le Faaola.
O se upumoni e tasi na aoao mai e le Faaola i faataoto i le fatu o le sinapi ma le mea faafefete o le ekalesia toefuataiina a Iesu Keriso o le a tuputupu ae mai se amataga itiiti e faatumulia ai le lalolagi. Mafaufau e tusi le upumoni lenei i lau tusi paia i autafa o le Mataio 13:31–33.
Ata
Peresitene Iosefa F. Samita
Na aoao mai e Peresitene Iosefa F. Samita le ala e mafai ai e e mulimuli ia Iesu Keriso ona faapei o le mea faafefete: “E ui e mafai ona faapea, ma i se fuataga e moni, ua na o i tatou o se luutaga pe a faatusatusa i o tatou tagata o i le lalolagi, ae e mafai ona faatusatusa i tatou i le mea faafefete lea na fetalai ai le Faaola, o le a iu ina fefete uma ai le lalolagi atoa” (Mataupu Fa′avae o le Talalelei, 5th ed. [1939], 74).
Ata
Elder Dallin H. Oaks
Na aoao mai Elder Dallin H. Oaks o le Korama a Aposetolo e Toasefululua: “E ao ona tatou ola i le lalolagi ae le o ni o le lalolagi. E tatau ona tatou ola i le lalolagi ona, e pei ona aoao mai Iesu i se faataoto, o Lona malo e “tusa ma le mea faafefete,” o lona faamoemoe ia faafefeteina uma ai i ona aafiaga (tagai Luka 13:21; Mataio 13:33; tagai foi 1 Korinito 5:6–8). E le mafai e e mulimuli ia te Ia ona faia lena mea pe afai latou te mafuta na o i latou o e tutusa o latou talitonuga ma faiga” (“Alolofa i Isi ma Ola ma Eseesega,” Ensign po o le Liahona, Nov. 2014, 25).
Mafaufau po o le a le mea e mafai ona e fai o se Au Paia o Aso e Gata Ai e fesoasoani ai i le Ekalesia a le Faaola ia ola.
O se tasi mataupu faavae na aoao mai e le Faaola i faataoto o le oa na natia i se fanua ma le penina tau tele o le talu ai o faamanuiaga o le talalelei e taua e faavavau, e sili atu lo latou aoga nai lo se isi lava taulaga. Mafaufau e tusi le upumoni lea i lau tusi paia i autafa o le Mataio 13:44–46.
Ina ia fesoasoani ia e malamalama lelei i lenei mataupu faavae, tusi ni koluma se lua i lau api o talaaga mo le suesueina o tusitusiga paia. Faaigoa le tasi koluma Faamanuiaga o le talalelei, ae faaigoa le isi koluma Osigataulaga e maua ai faamanuiaga.
I le koluma o le “Faamanuiaga o le talalelei”, lisi ai ni faamanuiaga o le talalelei (o faataitaiga e ono aofia ai le malamalama mai tusitusiga paia, taitaiga a perofeta soifua, o sauniga faaola, ma le faaipoipoga e faavavau.) Mo faamanuiaga taitasi ua i ai i le lisi, i le koluma o le “Osigataulaga e maua ai faamanuiaga” tusi ai po o a osigataulaga e tatau ona e faia ina ia maua ai lena faamanuiaga. Mo se faataitaiga, ina ia maua le faamanuiaga o le Malamalama mai tusitusiga paia, e manaomia ona tatou Sailiili i tusitusiga paia i aso taitasi.
Mafaufau i faamanuiaga na e lisiina, ma mafaufau pe aisea e aoga atu ai lou maua o na faamanuiaga nai lo se isi lava taulaga e ono manaomia.
Tali fesili nei i lau api talaaga mo le suesueina o tusitusiga paia:
O le a le faamanuiaga o le talalelei na e manao e maua?
Aisea e te manao ai i lena faamanuiaga?
Na mafai faapefea ona e faia lena osigataulaga ia maua ai lena faamanuiaga?
Ua aoao atu Iesu i Nasareta ma ua teena e Ona lava tagata
E pei ona tusia i le Mataio 13:53–58, na teena e tagata o Nasareta le Faaola ma Ana aoaoga. O se taunuuga o lo latou le talitonu, sa le mafai ai e le Faaola ona faia ni vavega se tele ia i latou.
Ata
O Keriso o loo aoao atu i le sunako
Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:
Ua ou suesueina le Mataio 13:24–58 ma faamaeaina lenei lesona i le (aso).
O fesili, mafaufauga ma manatu faaopoopo ou te fia faasoa atu i lo’u faiaoga: