Roma 12–16

Folasaga

Na aoao atu e le Aposetolo o Paulo tagata o le Ekalesia i Roma e tuuina atu o latou tino o ni taulaga ola i le Atua ma ia usiusitai i poloaiga a le Atua. Na ia aoao atu foi i le Au Paia le ala e aloese ai mai misa ma saili i le filemu pe a tulai mai eseesega ona o mea e faamuamua e le tagata lava ia. Ina ua faaiu lenei tusi, sa lapataia e Paulo i latou o e saili ia faaseseina.

Roma 12–13

Ua fautuaina e Paulo le Au Paia e tuuina atu o latou tino o ni taulaga ola i le Atua ma ia usitai i poloaiga a le Atua

Ata

3 ipu inu eseese siepi

Matau le siepi o le vai i le ipuinu muamua. E faapefea ona ese le suiga o le siepi o le vai pe a e liligiina mai le ipu muamua i le ipu lona lua? E faapefea ona sui lona siepi pe a e liligiina i le ipu lona tolu?

Manatu faapea o lena vai e faatusa i se tagata ma o le ipu e faatusa i talitonuga ma faiga eseese faalelalolagi. O a tulaga matautia e mafai ona oo mai i le usitai atu i talitonuga ma faiga faalelalolagi?

Faitau le Roma 12:1–2, ma vaavaai mo mea na uunaia e Paulo tagata o le Ekalesia i Roma e fai.

I le fautuaina o tagata o le Ekalesia e “tuuina atu [o latou] tino o se taulaga ola … i le Atua” (Roma 12:1), na faia ai e Paulo se faatusatusaga i faiga a le Feagaiga Tuai o le aumaia o manu i le fatafaitaulaga o le malumalu mo taulaga. O nei manu o ni taulaga ua faapaiaina i le Atua. O le mea lea, na aoao atu ai e Paulo tagata o le Ekalesia e faapaiaina o latou olaga—o latou tino faaletino, naunauga, filifiliga, faatinoga, meatotino, ma taimi—i le Atua. E faia lea mea i le lafoai o naunauga agasala ma ia usitai atu i poloaiga a le Atua.

Mai le fautuaga a Paulo i le Roma 12:1–2, ua tatou aoao ai ua faamoemoe mai le Atua ia faapaiaina o tatou ola ia te Ia ma taofia le ustai atu i le lalolagi. Mafaufau e tusi le faamalamalamaga lenei i au tusitusiga paia.

I le Roma 12–13, na aoao atu ai e Paulo ia tagata o le Ekalesia ni mataupu faavae se tele o le a fesoasoani ia i latou e faapaia o latou ola i le Atua ma ia taofia mai le usitai atu i le lalolagi. Ina ia vaili nisi o nei mataupu faavae, fai se siata e tolu koluma i lau api talaaga mo le suesueina o tusitusiga paia. Tusi se tasi o mau nei i le pito i luga o koluma taitasi: Roma 12:9–16; Roma 12:17–21; Roma 13:8–13. Ona faauma lea o galuega nei:
1. Faitau mau taitasi, ona tusi lea o se tasi pe sili atu o aoaoga mai fuaitau taitasi i le koluma talafeagai.
2. Faamatala pe mafai faapefea e le ola ai i se tasi o aoaoga na e faailoa mai ona fesoasoani ia te oe e faapaia lou ola i le Atua ma taofia ai le usitai atu i le lalolagi.

Faitau le Roma 13:14, ma vaavaai mo mea na fautua atu Paulo i le Au Paia e fai.

O le fasifuaitau “ia outou oofu i le Alii o Iesu Keriso” o lona uiga ia avea e faapei o le Faaola i o tatou uiga ma faatinoga. Mafaufau pe mafai faapefea e aoaoga sa e suesueina i le Roma 12–13 ona fesoasoani ia te oe e avea ai faapei o Iesu Keriso.

Roma 13:14 ua fesoasoani tatou te malamalama ai afai tatou te faapaia o tatou ola i le Atua ma taofia le usitai atu i le lalolagi, e mafai ona tatou avea atili e faapei o Iesu Keriso.

O le Faaola o se faataitaiga o le faapaiaina o le ola o se tagata i le Atua ma taofia mai ai le usitai atu i le lalolagi. Mafaufau e uiga i se tasi e te iloa o loo taumafai e faia lenei mea. I lau api talaaga mo le suesueina o tusitusiga paia, tusi ai e uiga i le tagata sa e mafaufau i ai ma mea o loo ia faia e faaalia ai le faapaiaina po o le tuuto atu i le Atua ma taofia ai le usitai atu i le lalolagi. Faamatala pe na faapefea e lenei tagata ona avea atili ai e faapei o le Faaola.

I se isi fasipepa, tusi ai se auala se tasi e mafai ona e faapaia atili ai lou ola i le Atua ma taofia ai mai le usitai atu i le lalolagi. Tuu le pepa lea i se mea o le a fesoasoani e faamanatu atu ai ia te oe lau sini.

Roma 14:1–15:3

Ua aoao atu e Paulo ia tagata o le Ekalesia e aloese mai feteenaiga i mataupu e faamuamua e le tagata lava ia.

Pe taga i se tagata o le Au Paia o Aso e Gata Ai ona (1) ai i aano o manufasi? (2) ai sukalati? (3) ofuvae vaepupuu i nofoaga faitele? (4) faaaoga tekinolosi i le Sapati? (auai i le faatinoga o faafiafiaga o aso malolo e faapogai e isi tulaga ma agaifanua faalelotu po o aganuu?

O le tali i nei fesili uma o le ioe. E ui o nisi o amioga e manaomia moni pe faasa foi e poloaiga mai le Alii, ae o isi ua tuu atu lava i mea e faamuamua pe tusa ai ma le faautautaga a tagata taitasi o le ekalesia. O nei mataupu e mafai ona aofia ai nisi o filifiliga i vaega e pei o faafiafiaga, lavalava, o mea e ai, tausiga o le Sapati, ma tulafono a matua mo le fanau. Ua tuuina mai e le Alii ia poloaiga ma tulaga faatonuina e taiala ai a tatou filifiliga i nisi o nei mataupu, e pei o le ofuina o ofuvae pupuu e talafeagai, ae o nisi o faaiuga ua tuu mai lava i le faautautaga a le tagata lava ia. O tagata o le ekalesia e ono faavae i nisi taimi ia faaiuga i itu faapea i luga o musumusuga mo o latou tulaga po o manaoga patino.

A o e suesueina le Roma 14:1–15:3, vaavaai mo upumoni na aoao atu e Paulo e uiga i le ala e tatau ona tatou taulima ai mataupu e faamuamua e le tagata lava ia i le Ekalesia.

I leRoma 14:1–5 ua tatou aoao ai o le tasi o faamuamua patino na feagai ma tagata o le Ekalesia i ona po o Paulo o mea e ai e se tagata. O nisi tagata e leai ni meaai na faasa. O isi sa lei aai i ni aano o manu ae sa na o fualaau e tutupu mai i le eleele (tagai Roma 14:2, vaefaamatalaga a). E le gata i lea, o nisi tagata o le Ekalesia sa filifili e tausisia agaifanua, faiga, ma aso malolo faa-Iutaia.

O a faafitauli e te manatu atonu na tulai mai i totonu o tagata o le Ekalesia a o faia e tagata ia faaiuga faaletagata lava ia i nei mataupu?

Faitau le Roma 14:3, ma vaavaai mo le fautuaga a Paulo na tuu atu i tagata o le Ekalesia i faamuamua eseese.

Aisea e te manatu ai atonu na le amanaia, pe tauemu, ma faamasino e nisi tagata o le Ekalesia isi sa ese a latou filifiliga mai ia i latou lava?

Faitau le Roma 14:10–13, 15, 21, ma vaavaai mo mea na aoao atu e Paulo i tagata o le Ekalesia e aua nei faia i le mataupu lea o mea e faamuamua e le tagata lava ia.

O le upumoni e tasi e mafai ona tatou aoao mai le aoaoga a Paulo i le Roma 14:13 e faapea i mataupu e le o talanoaina e ni poloaiga patino, e tatau ona taofia lo tatou faamasinoina o filifiliga a isi.

Tali le fesili lenei, i lau api talaaga mo le suesueina o tusitusiga paia: Aisea ua avea ai ma faafitauli le vaai maualalo o tagata o le Ekalesia pe tausalaina isi tagata o le Ekalesia e ese filifiliga latou te fai i mataupu e le o manaomia ai se poloaiga pe faasa ai se amioga patino?

Matau le fasifuaitau “tuu se mea e tausuai ai po o se mea e tautevateva ai” Roma 14:13. E faasino lea i le faatosinaina o se isi tagata ia tautevateva faaleagaga pe pau ia latou taumafaiga e talitonu ia Iesu Keriso ma ola i Lana talalelei. Ia faitau foi se faamatalaga o le Faaliliuga a Iosefa Samita i le Roma 14:15, vaefaamatalaga a.

Sa fautuaina e Paulo tagata o le Ekalesia ia magafagafa i aafiaga o a latou faiga patino i isi ma ia naunau e lafoai faatinoga ia e mafai ona faatosinaina ai isi ia tautevateva faaleagaga. Mai le aoaoga a Paulo ua tatou aoao ai foi faapea i mataupu e le o talanoaina e ni poloaiga patino e ao ina tatou magafagafa pe faapefea ona aafia isi i a tatou filifiliga.

Tomanatu i mataupu e faamuamua e le tagata lava ia o loo taua i le amataga o lenei vaega o le lesona. Mafaufau po o le a le mea e mafai e tagata o le Ekalesia i o tatou aso ona fai e mulimuli ai i le fautuaga a Paulo i mataupu faapea. E faapefea e na filifiliga “ona tausisia le filemu” e tagata o le Ekalesia (tagai Roma 14:19)?

Roma 15:4–16:27

Ua faaiu e Paulo lana Tusi i Roma

I le taufaaiuga o le Tusi a Paulo i Roma, sa ia aoao atu ai se upumoni e uiga i tusitusiga paia. Faitau le Roma 15:4, ma vaavaai mo mea na aoao atu e Paulo i le mafuaaga na tusia ai tusitusiga paia.

E faavae i mea sa e faitauina, faamaea le upumoni lenei: Na tusia tusitusiga paia e .

I lau api talaaga mo le suesueina o tusitusiga paia, tusi ai e uiga i se taimi na e suesue ai tusitusiga paia na e aoao ai, ma maua ai le mafanafana, po o le faamoemoe.

Na faaalia e Paulo le ala e mafai ai e tusi paia ona aoao i tatou ma aumaia le faamoemoe e ala i le sii mai o mau o le Feagaiga Tuai e faapea o le galuega faafaifeautalai i Nuuese sa faia e tusa ma le fuafuaga a le Atua (tagai Roma 15:9–12).

O le vaega o totoe o le Roma 15–16 o loo i ai se isi faamalosiauga ma fautuaga i tagata o le Ekalesia i Roma. Ua aofia ai se lapataiga e uiga ia i latou o e matuaia fevaevaeaiga, aoao atu aoaoga faavae sese, ma saili e taufaasese i isi (tagai Roma 16:17–18).

Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

Ua ou suesueina le Roma 12–16 ma faamaeaina lenei lesona i le (aso).

O fesili, mafaufauga ma manatu faaopoopo ou te fia faasoa atu i lou faiaoga: