Eperu 7–10

Folasaga

Na aoao mai le Aposetolo o Paulo, o Iesu Keriso o le Fautua o le “feagaiga fou ma le aiga o Isaraelu” (Eperu 8:8). Sa ia faamalamalama mai, o le taulaga a le Faaola sa maualuga i taulaga na faatinoina e faitaulaga sili i lalo o le tulafono a Mose. Sa ia faamalamalama mai foi, o sauniga i vaitaimi o Mose sa faasino atu ai tagata i le Faaola ma Lana Togiola.

Eperu 7–8

Na aoao mai Paulo o Iesu Keriso o le Fautua o le feagaiga fou

Ata

ataata o se nofoa, selo, pato

I avanoa na tuuina atu, faailoa mai le mea faitino na maua mai ai ataata taitasi.

Aisea na mafai ai ona e faailoa mai le mea faitino e faavae i lona ataata?

O loo ta’u mai i le Feagaiga Tuai le tele o faaaloaloga ma sauniga na faatusaina ma muai atagia ai le Faaola ma Lana Togiola. Ona sa iloa e Paulo o tagata Kerisiano Iutaia, po o Eperu sa masani ma nei faaaloaloga ma sauniga, sa ia ta’ua ai i latou i lana tusi a o ia aoaoina nei Au Paia e uiga ia Iesu Keriso.

O tusitusiga paia uma e i ai ituaiga, ataata, faatusa ma faatusatusaga o Iesu Keriso. O ituaiga, ataata, faatusa ma faatusatusaga o ni suitulaga o isi meamoni sili atu. O le tele o nei faatusa o loo i le mamanu o se tagata, mea faitino, mea na tutupu, ma tulaga.

O le tulafono a Mose sa faamoemoeina o se ituaiga ma ataata o Iesu Keriso, o se faatusa na faasino atu ai le [fanauga] a Isaraelu ia Iesu Keriso ma Lana taulaga togiola (tagai 2 Nifae 11:4; Iakopo 4:4–5). Na faamalamalama mai e le Aposetolo o Paulo le ala na faia ai e nisi o vaega o le tulafono lenei mea. Sa manao o ia e fesoasoani i le Au Paia Iutaia ia tumau le faamaoni ia Iesu Keriso nai lo o le liliu atu e mulimuli i le tulafono a Mose, e pei ona sa faia ai e nisi.

Ua e faitau i le Eperu 2:17 lea na faatatau atu ai Paulo ia Iesu Keriso o se “faitaulaga sili e alofa ma faamaoni.” Mai aso o Mose e oo i le vaitaimi o Iesu Keriso, o le faitaulaga sili o le taitai pulefaamalumalu o le Perisitua Arona, lea sa ta’ua i nisi o taimi o le Perisitua FaasaLevi, e faatatau atu i le pule o le Perisitua Arona sa umia e tagata o le ituaiga o Levi (tagai Bible Dictionary, “Aaronic Priesthood”).

Sa faauu e Mose ia Arona o se faitaulaga sili o le Perisitua Arona.

Faitau le Eperu 7:1–4, ma vaavaai mo le mea na aoao mai e Paulo e uiga ia Mekisateko. Ia faitau foi le Faaliliuga a Iosefa Samita o le, Eperu 7:3 (i le pito i tua o le Tusi Paia) mo le faamaninoga o le mea na aoao mai e Paulo i le fuaiupu 3.

O Mekisateko sa “o se perofeta ma se taitai lauiloa sa soifua i le pe tusa o le 2000 T.L.M. Na ta’ua o ia o le tupu o Salema (Ierusalema), tupu o le filemu, ma le ‘faitaulaga a le Atua Silisili ese’ [Eperu 7:1]” (Bible Dictionary, “Melchizedek”; tagai foi Faaliliuga a Iosefa Samita, Kenese 14:25–40 [i le pito i tua o le Tusi Paia]). Sa malamalama Paulo i le maoae o Mekisateko ma faaaoga o ia o se ituaiga ma se faaataataga o Iesu Keriso.

I le Eperu 7:15–17 sa faatatau atu ai Paulo i se valoaga i le Feagaiga Tuai e uiga i le oo mai o se faitaulaga “e uiga faatasi ma Mekisateko” (Eperu 7:17; tagai foi Salamo 110:4). Na aoao mai Paulo, o lenei valoaga sa faataunuuina e Iesu Keriso.

“O se tasi o faamoemoega o Paulo i le Eperu 7 o le faaali atu lea o le maualuga o le Perisitua Mekisateko i le faaLevi po o le Perisitua Arona ma ona sauniga e o mai faatasi ai. Afai o le atoatoaga ma le faaeaga e mafai ona maua e ala i le Perisitua sa Levi, aisea la na manaomia ai se suiga i le perisitua maualuga atu? Na aoao mai Paulo, o le atoatoaga, po o le ‘ua faapei o le Alo o le Atua’ (Eperu 7:3), e le oo mai i le Perisitua sa Levi, ae e ala mai ia Iesu Keriso ma Lana faatulagaga o le perisitua. O Iesu Keriso na ‘tupu mai ia Iuta,’ ae le o Levi, o lea na aoao mai ai Paulo o Lana aia tatau i le perisitua o le a le faavae i luga o le tupuaga ae o luga ‘o le mana o le ola e le uma’ (tagai Eperu 7:14–16). I le avea ai ma Ieova i le muai olaga, sa Ia foafoaina ai le lalolagi ma taitaiina ai mea na tutupu o le Feagaiga Tuai i le pule o le perisitua lava lea e tasi o le a Ia umia i le taimi o Lana galuega i le tino” (New Testament Student Manual [Church Educational System manual, 2014], 480).

Faitau le Eperu 7:23–28, ma vaavaai mo le eseesega i le va o Iesu Keriso ma faitaulaga sili sa Levi o e sa taitaiina sauniga o le Perisitua Arona mo tagata. O le fuaitau “faatuina ai tagata o i ai le vaivai” i le fuaiupu 28 o lona uiga e i ai o latou vaivaiga. Ia faitau foi le Faaliliuga a Iosefa Samita, Eperu 7:25–26 (i le faaopoopoga i le Tusi Paia).

I le Eperu 7:25 o le fuaitau “o loo soifua pea ia e fautua mo i latou” o lona uiga o le misiona a Iesu Keriso o le fautua mo i tatou e fesoasoani ai ia tatou toe foi atu i e afioaga o le Atua.

Ata

O Iesu o loo Tatalo i Ketesemane

E faapefea ona e faamatalaina le eseesega i le va o Iesu Keriso ma faitaulaga sili sa Levi?

Faitau le Eperu 8:1–4, ma vaavaai mo le meaalofa, po o le taulaga, na faia e Iesu Keriso. Ia manatua o le Faaliliuga a Iosefa Samita o le Eperu 8:4 e faitauina faapea, “O le mea lea, a o i ai o ia i le lalolagi, sa ia faia mo se taulaga lona lava soifua mo agasala a tagata. Aua e tatau i faitaulaga uma i lalo o le tulafono, ona tuuina atu ni meaalofa, po o ni taulaga, e tusa ai ma le tulafono” (Faaliliuga a Iosefa Samita, Eperu 8:4 [i le Eperu 8:4, vaefaamatalaga a]).

O le a se upumoni e mafai ona tatou aoao mai i le Faaliliuga a Iosefa Samita o le Eperu 8:4 e uiga i le mea sa faia e Iesu Keriso mo i tatou?

Mafaufau loloto po o le a le uiga o le taulaga togiola a Iesu Keriso ia te oe lava ia, ma faauma se tasi o faamatalaga nei i lau api talaaga mo le suesueina o tusitusiga paia. Mafaufau e su’e se taimi talafeagai e faasoa atu ai le mea ua e tusia i se tasi o lou aiga po o se uo.
1. Ou te faafetai i lo’u Faaola ona …
2. Ou te iloa e alofa lo’u Faaola ia te a’u ona …
3. Ua faamanuiaina a’u i le taulaga togiola a Iesu Keriso ona

O se puluvaga o se tasi na te faaleleia ni feeseeseaiga i le va o ni tagata po o ni vaega se lua. O le Togiola a Iesu Keriso ua faalelei ai tagata ola (uma o e agasala) i le Atua le Tama. Ona o Lana taulaga, o Iesu Keriso o “le puluvaga o le feagaiga e sili ona lelei” (Eperu 8:6), o se feagaiga lea na folafola mai e le Alii, “o le a [Ia] tuuina atu [Ana] tulafono i o latou mafaufau, ma [Ia] tusia i o latou loto,” ma “o le a fai foi o [Ia] mo latou Atua, e fai foi i latou ma [Ona] nuu” (Eperu 8:10). O lenei feagaiga, pe afai e taliaina e tagata, o le a fesoasoani ia i latou ia “iloa le Alii” (Eperu 8:11) ma ia faamamaina mai “a latou agasala ma o latou solitulafono” (Eperu 8:12).

Eperu 9–10

Sa faaali mai e Paulo le ala na faasino atu ai sauniga faaMose i le Togiola a Iesu Keriso

Tatou te faitau i le Eperu 9–10 e faapea, na faaauau ona faatusatusa e le Aposetolo o Paulo faitaulaga sili a sa Levi ia Iesu Keriso i le talanoaina o tiute a na faitaulaga sili na faatino i le Aso o le Togiola.

Ata

ata, o le falefetafa’i

E tai tasi i le tausaga i le aso paia faaIutaia sa ta’ua o le Aso o le Togiola (sa ta’ua foi o le Yom Kippur), na faatagaina ai le faitaulaga sili e ulu atu i le Nofoaga Silisili ona Paia (na taua o le Paia o Paia po o le Nofoaga Silisili ona Paia) i le falefetafa’i, pe o lea na ta’ua mulimuli ane o le malumalu i Ierusalema. A o le’i alu atu i totonu, e ositaulaga e le faitaulaga sili se povi po’a ua uma ona faamama o se faatinoga o le togiola “mo ia lava ma lona aiga” ona ositaulaga ai lea o se oti po’a o se faatinoga o le togiola “mo le faapotopotoga o Isaraelu.” Na te sausauina le toto o le manu i ni nofoaga faapitoa ma luga o ni aitema patino i totonu o le Nofoaga e Sili ona Paia e avea ma ni isi faatinoga o le togiola. Ona ia “ta’uta’u atu lea o agasala uma a le nuu o Isaraelu” i luga o se isi oti po’a (na taua o le oti e amoa uma agasala), lea sa tulia i le vao, e faatusa i le aveesea o agasala a tagata. A uma lena ona sui lea o ona lavalava ae “osi atu taulaga mu o ni mamoe po’a e le’i faamamaina e lua mo ia lava ma lona aiga” (Bible Dictionary, “Fasts”; tagai foi Levitiko 16).

Faitau le Eperu 9:11–12, 24, 28 ma le Eperu 10:1, 4, 10–12, ma vaavaai pe faapefea ona avea mea na tutupu i le Aso o le Togiola o ni ituaiga ma ni ataata o le taulaga togiola a Iesu Keriso.

Sa faatagaina faitaulaga sili e ulu atu i le Nofoaga e Sili ona Paia o le falefetafa’i e tasi i le tausaga i le Aso o le Togiola. O le a le “mea paia” (Eperu 9:12) e mafai ona ulu atu i ai le Faaola (faapea foi ma tagata ola uma) ona o Lana Togiola?

O le a le mea e mafai ona fai e le taulaga a Iesu Keriso lea e le mafai ona faia e “le toto o povi po’a ma oti” (Eperu 10:4) ?

E ui lava e le mafai ona togiola moni e toto o manu ia agasala a tagata, ae sa faia e faitaulaga sili a sa Levi nei sauniga e faataitai ai “le ata o mea lelei atali” (Eperu 10:1), pe ina ia faasino atu i le Togiola a le Faaola.

Faitau le Eperu 10:17–20, ma vaavaai mo le mea na mafai ona faia e le taulaga a le Faaola.

E tusa ai ma le Eperu 10:19, e mafai ona tatou ulu atu i le mea “e sili ona paia”, po o le afioaga o le Atua i le malo selesitila, ona o le taulaga a Iesu Keriso. O le fuaitau “ala fou e ola ai” i le Eperu 10:20 e faatatau i le talalelei a Iesu Keriso, po o le fuafuaga lea e mafai ona faamagaloina ai i tatou ma faapaiaina e ala i Lana Togiola ma faapea ai ona agavaa e toe foi atu i le afioaga o le Atua.

Faitau le Eperu 10:22–24, ma vaavaai mo le mea e ao ona tatou faia e ulu atu ai i le malo selesitila. Ona faauma lea o le mataupu faavae lenei: Ona o le Togiola a Iesu Keriso, e mafai ona tatou ulu atu i le malo selesitila pe afai .

O le a lou manatu i le uiga o le ia “taofi mau” (Eperu 10:23) i lo tatou faatuatua ia Iesu Keriso?

Faitau le Eperu 10:35, ma vaavaai mo le fautuaga na tuuina mai e Paulo, e mafai ona fesoasoani ia i tatou e taofi mau ai i lo tatou faatuatua ia Iesu Keriso. Atonu e te manao e faailoga mea e te maua.

O le a lou manatu i le uiga o le, ia “aua le lafoai ai o outou faamalosi”? (Eperu 10:35).

Ata
Elder Jeffrey R. Holland

Sa faamalamalama mai e Elder Jeffrey R. Holland o le Korama a Aposetolo e Toasefululua le uiga o le, ia “aua le lafoai ai o [tatou] faamalosi”: “I le gagana a le Au Paia o Aso e Gata Ai, E moni lava e faigata—[le taimi] ae e te le’i auai i le Ekalesia, a o e taumafai e auai, ma ina ua e auai. O le mea lava lena sa i ai, o le faamatalaga lea a Paulo, ae aua le solomuli ai. Aua le atuatuvale ma solomuli. Aua ne’i aluese lou talitonu. Aua ne’i galo le faalogona sa e lagonaina muamua. Aua e te le talitonuina le aafiaga na e maua. O lena naunautai [mausali] o le mea lena sa laveaiina ai Mose ma Iosefa Samita ina ua faafetaui i laua e le fili, ma o le mea lena o le a laveaiina ai oe” (“Cast Not Away Therefore Your Confidence,” Ensign, Mat. 2000, 8).

I lau api talaaga mo le suesueina o tusitusiga paia, tusi e uiga i se tasi e te iloa, o se faataitaiga lelei o le taofi mau i lona faatuatua ia Iesu Keriso ae le o le lafoaia o lona talitonuga.
Mafaufau i lau tautinoga e taofi mau i lou faatuatua ia Iesu Keriso. I lau api talaaga mo le suesueina o tusitusiga, tusi ai pe o le a faapefea ona faateleina lou tautino ma le gafatia e fai ai lenei mea.
Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

Ua ou suesueina le Eperu 7–10 ma faamaeaina lenei lesona i le (aso).

O fesili, mafaufauga ma manatu faaopoopo ou te fia faasoa atu i lo’u faiaoga: