Na aoao e le Aposetolo o Paulo tagata o le Ekalesia e uiga i le faatuatua ma le taua o le faaaoga o le faatuatua ia Iesu Keriso. Sa ia ta’ua faataitaiga o ni alii ma ni tamaitai amiotonu mai le Feagaiga Tuai o e sa faaaoga le faatuatua ia Keriso ma faapea ona faatinoina ai vavega, onosaia ai mea faigata, ma maua faamanuiaga e tele.
Ua aoao e Paulo tagata o le Ekalesia i le taua o le faaaoga o le faatuatua ia Iesu Keriso
Faitau le tala lenei, ma maitau le mea na faia e le tamaitai talavou e faaaoga ai le faatuatua:
Sa faamatala e se tamaitai talavou mai Filipaina e faapea, i se tasi o taumafanafana, sa alu ese ai lona tama e faigaluega. A maua lona totogi na te lafoina mai i le fale i lona aiga. I se tasi aso Toonai, sa faaaoga ai e le aiga le tupe uma vagana ai ni tupe pepa se lua e ta’i 20 peso. A o tilotilo le tamaitai talavou i le lisi o aitema na manaomia e lona aiga, sa ia iloaina o le a le lava se latou tupe e faatau ai uma aitema ma totogi ai le pasese a le latou aiga e o ai i le lotu i le aso na sosoo ai. Sa fesili atu o ia i lona tina po o le a le mea e tatau ona ia faia. Sa fai atu lona tina, e faatau ia aitema ma o le a saunia e le Atua le auala mo le pasese.
Sa tatalo le tamaitai talavou ina ia mafai ona ia faatau mai aitema o le lisi, ma ia lava pea se tupe e totogi ai le latou pasese i le lotu i le aso na sosoo ai. Sa manaomia ona ia faatauina muamua ni malala ina ia faavela ai meaai a lona aiga. Sa faateia o ia ina ua ia iloa ua faaluaina le tau o le ato malala mai le 5 peso i le 10 peso. O le iloa sa manaomia e lona aiga le fafie e kuka ai a latou meaai, sa ia faatauina mai ai ni ato malala se lua mo le aofaiga e 20 peso. Sa atili ai ona tatalo faatauanau le tamaitai talavou ina ia mafai pea e lona aiga ona o i le lotu. A o tatalo o ia, sa musumusu atu se mea ia te ia: “Alu, faatau mea tou te manaomia. O le a le afaina.” Sa faaauau ai ona ia alu i le maketi ma le na o le 20 peso na totoe (sii mai i le vitio “Pure and Simple Faith,” LDS.org).
Tali le fesili lenei i lau api talaaga mo le suesueina o tusitusiga paia: O a ni auala na faaalia ai e lenei tamaitai talavou le faatuatua ia Iesu Keriso?
Faitau le Eperu 11:1, ma vaavaai mo le mea na aoao mai e le Aposetolo o Paulo e uiga i le faatuatua. Ia faitau foi le Faaliliuga a Iosefa Samita, Eperu 11:1 (i le Eperu 11:1, vaefaamatalaga e).
Sa faaaoga e Elder David A. Bednar o le Korama a Aposetolo e Toasefululua le Eperu 11:1, faapea ma isi auala, e faamalamalama ai elemene autu e tolu o le faatuatua:
Ata
Elder David A. Bednar
“Sa faamatala e le Aposetolo o Paulo le faatuatua o ‘le faalagolago lea i mea ua faamoemoe i ai [ma] o le mautinoa lea o mea e le o vaaia’ (Eperu 11:1). Na tautino mai foi e Alema, o le faatuatua e le o le mautinoa lea o mea; ae afai ua ia te i tatou le faatuatua, tatou te ‘faamoemoe i mea e le o vaaia [ae] ua moni ia’ (Alema 32:21). E le gata i lea, ua tatou aoao mai i le Lectures on Faith e faapea, o le faatuatua ‘o le mataupu faavae muamua i talitonuga faalelotu ua faaalia, ma o le faavae o le amiotonu uma’ ma ‘o le mataupu faavae foi o faatinoga a tagata atamamai uma’ [Lectures on Faith (1985), 1].
“O nei aoaoga ua faamamafa mai ai ni elemene faavae se tolu o le faatuatua: (1) faatuatua o le mautinoa lea o mea o loo faamoemoe i ai ua moni, (2) faatuatua o le faamaoniga o mea e le o vaaia, ma le (3) faatuatua o le mataupu faavae o le faatinoga a tagata atamamai uma. Ou te faamatalaina nei itutino e tolu o le faatuatua i le Faaola, e o lua lava ma le vaai atu i le lumanai, tepa i le taimi ua tuanai, ma le amatalia o le faatinoga i le taimi nei.
“O le faatuatua o le mautinoa lea o mea o loo faamoemoe i ai i le lumanai. …
“O le faatuatua ia Keriso ua nonoa mau ma e afua mai ai le faamoemoe ia Keriso mo lo tatou togiola ma le faaeaga. O le mautinoa foi ma le faamoemoe e mafai ai ona tatou savavali i le taufaasiusiuga o le malamalama ma tau laalaa atu ai i le pogisa—ma le faamoemoe ma le talitonuga e susulu atu le malamalama e faamalamalama ai le ala [tagai Boyd K. Packer, ‘The Candle of the Lord,’ Ensign, Ian. 1983, 54]. O le tuufaatasi o le mautinoa ma le faamoemoe, e amatalia ai le faatinoga i le taimi nei.
“O le faatuatua o le faamaoniga o mea e le o vaaia, e vaai atu i le taimi ua tuanai ma faamaonia ai lo tatou faalagolago i le Atua ma lo tatou talitonuga i le moni o mea e le o vaaia. Tatou te laa atu i le pogisa faatasi ma le mautinoa ma le faamoemoe, ma tatou te maua foi le molimau ma le faamaoniga a o aumaia le sulu ma maua ai le malamalama tatou te manaomia. O le molimau tatou te mauaina pe a mavae ona tofotofoina lo tatou faatuatua (tagai Eteru 12:6) o le faamaoniga lea e faateleina ma malosi ai lo tatou mautinoa.
“O le mautinoa, faatinoga, ma le faamaoniga, e ta’a’ina e le tasi le isi i se faiga faifai pea” (“Saili e Aoao e Ala i le Faatuatua,” Liahona, Sete. 2007, 61–63).
Faauma galuega atofaina nei i lau api talaaga mo le suesueina o tusitusiga paia:
Tusi se faamalamalamaga puupuu o le uiga o le i ai o le faatuatua ia Iesu Keriso.
Faauma le faauigaga lenei o le faatuatua, e pei ona tuuina mai e le Aposetolo o Paulo i le Faaliliuga a Iosefa Samita, Eperu 11:1: O le faatuatua o le mautinoa lea … , o le faamaoniga o le … (Mafaufau e faailoga pe tusi le upumoni lenei i le Eperu 11:1.)
Mafaufau i se taimi sa talosagaina ai oe e fai se mea sa e lagona ai le popole i le faia, pe sa foliga mai sa o se mea e le mafai ona e faia. Atonu sa faamalosia ia lou talitonu ia te oe lava ina ua e manatua se mea sa e faia pe oo i ai i se taimi ua tuanai. O lena aafiaga ua mavae atu, na tuuina atu ai se faamaoniga lea atonu na fesoasoani e te fetaia’i ai ma le luitau fou ma se faamautinoaga e mafai ona e manuia ai. I mataupu faaleagaga, o le faamaoniga o le alofa o le Atua i le taimi ua tuanai, e tuuina mai ai ia i tatou le faamautinoaga a o tatou faafetauia le lumanai, ma e fesoasoani ia tatou faatino ai le faatuatua ma le lototele i le taimi nei. E pei ona aoao mai Elder Bednar, o le faamautinoaga, faamaoniga, ma le faatinoga—o elemene e tolu o le faatuatua—e galulue faatasi a o tatou faafetauia le lumanai, vaai i taimi ua tuanai, ma faatino i le taimi nei.
Tali i le vaega lenei i totonu o lau api talaaga mo le suesueina o tusitusiga paia:
E faapefea ona ese le faaaoga o le faatuatua ia Iesu Keriso mai le na o le talitonu ia te Ia?
E faapefea ona faaalia i le tala i le tamaitai talavou mai Filipaina ia elemene e tolu o le faatuatua lea na faamatalaina e Elder Bednar?
Faamatala e uiga i se taimi na e faaaogaina ai lou faatuatua i le Alii.
Faitau le Eperu 11:2–5, ma vaavaai mo faataitaiga na faaaoga e Paulo e faamatala ai le mea e mafai ona tupu pe a faaaoga e tagata le faatuatua ia Iesu Keriso. O le fuaitau “tauleleiina ai o e anamua” i le fuaiupu 2 o lona uiga na maua e toeaina se molimau vaaitino, po o se molimau.
Faitau le Eperu 11:6, ma vaavaai mo le mea na aoao atu e Paulo e uiga i le faatuatua.
O se mataupu faavae e tasi e mafai ona tatou aoao mai i le Eperu 11:6 o le ina ia faafiafia i le Atua, e tatau ona faaaoga o tatou faatuatua e ala i le o mai ia te Ia, talitonu ia te Ia, ma talitonu na te tauia i latou o e saili ma le filiga ia te Ia. Mafaufau e faailoga pe tusi le upumoni lenei i le fuaiupu 6.
Faitau le faaiuga o le tala i le tamaitai talavou mai Filipaina, ma vaavaai i le mea na tupu ona sa faaaoga lona faatuatua ia Iesu Keriso.
A o alu atu le tamaitai talavou e totogi mo isi aitema sa manaomia e lona aiga, sa tago ifo i totonu o lana taga ma faalogoina ai se patupatu lapoa o pepa. Ina ua tatalaina sa ia maua ai ni tupe pepa faaopoopo se lima, e ta’i 20 peso i le mea e tasi, na afifi i totonu o se tasi o 20-peso pepa. I le taimi lena sa ia iloa ai sa lava [le tupe] e faatau ai mea sa manaomia e lona aiga ma totogi ai le pasese a lona aiga e o ai i le lotu. Sa faamatala mai e lenei tamaitai talavou e faapea, i le taimi o lenei aafiaga, sa ia lagona ai le aao o le Atua ma le alofa o le Atua ia te ia. Ina ua ia oo atu i le fale, sa ia faafetai atu i le Tama Faalelagi mo le vavega (sii mai i le vitio “Pure and Simple Faith,” LDS.org). E mafai ona tatou maua le faatuatua e tali mai le Alii i talosaga i Lana lava ala ma i Lana lava taimi.
Afai e mafai ona e faaaogaina se Initoneti, atonu e te manao e matamata le vitio “Pure and Simple Faith” (5:22), lea o loo maua i luga o le LDS.org.
O le a le faamaoniga na maua e lenei tamaitai talavou mai le faaaogaina o le faatuatua ia Iesu Keriso?
Mata e mafai faapefea e lenei aafiaga ona fesoasoani i le tamaitai talavou e faaaoga le faatuatua i le lumanai?
A tatou vaavaai i faamaoniga ua mavae na fesoasoani mai ai le Atua ia i tatou, e mafai ona tatou mautinoa o le a toe fesoasoani mai foi o Ia i le lumanai. Ona o lenei faamaoniga ma le faamautinoaga, e mafai ona tatou maua le faatuatua e faatino ai i le taimi nei. Afai e faaauau ona tatou faatino i le faatuatua, o le a faapea foi ona faaauau lenei faagasologa ma o le a tuputupu malosi ai lo tatou faatuatua.
Mafaufau po o a ni faatinoga faatuatua e manaomia ona e faia i lou olaga. Pe e te talitonu o le a fesoasoani le Atua ia te oe ao e [faia] se faatinoga? Atonu e te manao e tusi se sini e faatino se tasi o uunaiga atonu na e maua i le taimi o lenei lesona. A o e faataunuuina lau sini, o le a e maua ai le faamaoniga o le alofa o le Atua mo oe.
Ua tuuina mai e Paulo ni faataitaiga o tagata amiotonu mai le Feagaiga Tuai o e sa faaalia le faatuatua.
O a nisi o tulaga o loo feagai nei ma oe pe o le a feagai i le lumanai e manaomia ai ona faaaoga lou faatuatua ia Iesu Keriso?
A o e suesue i le Eperu 11:7–40, vaavaai mo faamanuiaga o le faaaoga o le faatuatua ia Iesu Keriso.
Na tuuina mai e le Aposetolo o Paulo ni faataitaiga o tagata amiotonu mai le taimi o le Feagaiga Tuai o e na faaaogaina le faatuatua. Sa faia lenei mea ia faamautinoa atu ai i ana au faitau o le a faamanuiaina foi i latou e ala i le faaaoga o le faatuatua. Tilotilo vave i le Eperu 11, e vaavaai ai mo fuaitau “i le faatuatua” ma le “e ala i le faatuatua.” Mafaufau e faailoga pe tusi fuaitau nei i au tusitusiga paia.
Faitau le Eperu 11:7, ma vaavaai mo le auala na faaaoga ai e Noa le faatuatua i le Atua. O a faamanuiaga na maua e Noa ona sa ia galue i le faatuatua?
Faitau e uiga i faataitaiga o le faatuatua i ni fuaitau se tolu pe sili atu o loo aofia i le siata o loo avatu faatasi ai. A o e faitauina, vaavaai mo auala na faaaoga ai e tagata taitoatasi le faatuatua ma po o a faamanuiaga na latou maua. I lau api talaaga mo le suesueina o tusitusiga paia, tusi ai le siata faatasi ma fuaitau na e filifilia, ma ia aofia ai ou mafaufauga e uiga i na tagata taitoatasi sa e faitau e uiga i ai. Ia aofia ai foi se lisi o ni faamanuiaga faapena ua e faamoemoe e maua i le faaaogaina o le faatuatua i le Faaola.
Faitau le Eperu 11:13–16, ma vaavaai mo le mea e mafai ona tatou aoao mai le faataitaiga a Aperaamo, Sarai, ma isi e uiga i le faaaogaina o le faatuatua. O le fuaitau “nuu e sili ona lelei” i le fuaiupu 16 e faatatau i le ola e faavavau.
O le tele o folafolaga na tuuina atu ia Aperaamo ma Sarai sa le’i faataunuuina a’o soifua i laua. Aisea e te manatu sa tumau ai lo latou faatuatua e ui lava latou te le’i maua uma folafolaga a le Atua i lenei olaga? E mafai faapefea e a latou faataitaiga ona fesoasoani ia tatou tumau ai i le faatuatua?
Faitau le Eperu 11:32–35, ma vaavaai mo faamanuiaga faaopoopo e oo mai ia i latou o e faaaogaina le faatuatua ia Iesu Keriso. Atonu e te manao e faailoga pe tusi mea ua e maua.
Faitau le Eperu 11:36–40, ma vaavaai mo le mea na tupu i le toatele o tagata taitoatasi e ui lava ina sa latou faatuatua.
O le Faaliliuga a Iosefa Samita o le Eperu 11:40 e faitauina faapea, “Ina ua saunia e le Atua se tasi mea e sili ona lelei mo i latou e ala i o latou puapuaga, ina ia le faaatoatoaina i latou pe a le i ai puapuaga” (Faaliliuga Iosefa Samita, Eperu 11:40 [i le Eperu 11:40, vaefaamatalaga a]). Matau le faamanuiaga ua folafolaina atu ia i latou uma o e faaali le faatuatua ia Keriso.
O se upumoni e tasi e mafai ona tatou faailoa mai le faataitaiga a nei tagata faatuatua o le a o tatou faaali le faatuatua ia Iesu Keriso, e mafai ona tatou onosaia puapuaga, ausia vavega, maua folafoalga paia, faamalosia a tatou molimau e uiga ia te Ia, ma agai i luma i le atoatoaga.
I lau api talaaga mo le suesueina o tusitusiga paia, tusi e uiga i se tasi e te iloa o se faataitaiga o le faaaogaina o le faatuatua ia Iesu Keriso. O a ni faamanuiaga ua e vaaia le oo mai i le olaga o lena tagata ona o lona faaalia o le faatuatua?
Toe mafaufau i ni tulaga na manaomia ai lou faaaogaina o le faatuatua ia Iesu Keriso. Vaavaai mo ni avanoa e talitonu ai i Ana folafolaga ma faatino ma le faatuatua i se auala o le a valaaulia ai Lana taitaiga ma faamanuiaga.
Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:
Ua ou suesueina le Eperu 11 ma faamaeaina lenei lesona i le (aso).
O fesili, mafaufauga ma manatu faaopoopo ou te fia faasoa atu i lo’u faiaoga: