I le faitotoa o le malumalu, na faamalolo ai e Peteru ma Ioane se tagata sa fanau mai o pipili. Ona aoao atu lea e Peteru i tagata o e sa molimauina le faamalologa o lenei tagata. O le taunuuga, sa puefaapagotaina ai Peteru ma Ioane ma poloaiina ai e le au Saneterini e soia le toe aoao atu i le suafa o Iesu. Sa ola tagata o le Ekalesia i le tulafono o le faapaiaga, ae toalua o i latou na feoti o se taunuuga o le pepelo ia Peteru ma le Atua. Na faaauau pea ona faia e Peteru ma Ioane ia vavega, lea sa ita ai ia faitaulaga sili. Sa toe puefaapagotaina i laua ma tuuina i le falepuipui, ae sa tatalaina e se agelu. Na tau atu e le agelu ia i laua e o i le malumalu ma folafola atu le talalelei.
Ua faamalolo e Peteru se tagata sa fanau mai e pipili
Mafaufau i se taimi na fesili atu ai ia te oe mo se mea patino (atonu o se meaalofa o se aso fanau po o le Kerisimasi) ae na e maua se isi mea e ese. E foliga tutusa faapefea lea aafiaga i le sailia o faamanuiaga mai i le Tama Faalelagi e ala i le tatalo?
A o e suesue i le Galuega 3, vaavaai mo se mataupu faavae e mafai ona fesoasoani ia te oe pe a e le mauaina tali po o faamanuiaga e te faamoemoeina mai i le Alii.
Faitau le Galuega 3:1–3, ma vaavaai pe o ai na fetaiai ma Peteru ma Ioane i le faitotoa o le malumalu.
Mafaufau pe o a ni ou lagona pe ana e iai i le tulaga o le tagata pipili. Mai i lou aafiaga, o a ni ala faaletino e ono tali atu ai tagata i le talosaga a lenei tagata mo ni meaalofa, po o se fesoasoani e pei o tupe po o meaai?
Faitau le Galuega 3:4–7, ma vaavaai mo mea na faia e Peteru mo lenei tagata.
O le a le mea e tulaga ese mai ia te oe e uiga i le mea na fai atu ai Peteru ma faia?
Ata
Peteru ma le tagata pipili
Sa faamalolo e Peteru se tagata pipili i fafo o le malumalu.
Faitau le Galuega 3:8, ma vaavaai mo le mea na faia e le tagata ina ua uma ona “faatu o ia i luga” e Peteru (Galuega 3:7).
Na faapefea ona sili atu faamanuiaga na maua e lenei tagata nai lo meaalofa (tupe) sa ia muai ole atu ai?
E mafai ona tatou faatusaina lenei tala i o tatou olaga. Atonu e le tali mai le Tama Faalelagi i a tatou tatalo i le ala tatou te mananao ai pe faamoemoe ai ia te Ia, ae o Ana tali e mo lo tatou lelei sili atu e le aunoa.
I le tala o loo tusia i le Galuega 3:1–8, e iloagofie o le mea na maua e lenei tagata e sili atu nai lo le mea sa ia ole atu ai. Peitai, i isi tulaga atonu e le o manino o le mea e tatou te mauaina e sili atu nai lo mea tatou te ole atu ai.
I lau api talaaga mo le suesueina o tusitusiga paia, tusi e uiga i se aafiaga lea na ese ai le tali i au tatalo mai le tali na e manao i ai ae iu ane ua mo lou lelei sili atu.
Mafaufau e faapea sa e i ai faatasi ma tagata i le malumalu o e sa molimauina le faamalologa o le tagata pipili. Atonu na tele ina e vaaia lenei tagata pipili o aisi a o e ulu atu i lena faitotoa o le malumalu. Ona, oo lea i se tasi aso, ua e vaai ua osooso o ia ma tamoe ina ua uma ona faamalolo. O le a sou manatu i le suiga o lau vaaiga ia Peteru ma Ioane ina ua uma ona molimauina lenei vavega?
Faitau le Galuega 3:9–11, ma vaavaai pe na faapefea ona tali atu tagata i le faamalologa o lenei tagata.
Ua molimau atu Peteru ia Iesu Keriso ma folafola atu le salamo
Faitau le Galuega 3:12–18, ma vaavaai pe na faapefea ona faamatala e Peteru le faamalologa o le tagata pipili i tagata. Matau pe o ai na ave i ai e Peteru le viiga mo le faamaloloina o le tagata.
Mai i taga ma upu a Peteru, ua tatou aoao ai e faapea e mafai e auauna a Iesu Keriso ona faia vavega e ala i le faatuatua i Lona suafa.
Faitau le Galuega 3:19, ma vaavaai mo le valaaulia a Peteru i tagata. (Galuega 3:19–21 o se fuaitau o mau tauloto. Atonu e te manao e faailoga i se auala e iloagofie ai ina ia fesoasoani i lou sueina i le lumanai.)
Na tuu atu e Peteru le faamoemoe ia i latou sa ia lauga atu i ai e ala i le aoaoina o i latou e mafai foi ona faamamaina i latou e ala i le faatuatua i le Alii o Iesu Keriso ma Lana Togiola.
Matau le fasifuaitau “tausaga o le filemu” i le Galuega 3:19. Na faamalamalama mai e Elder Bruce R. McConkie o le Korama a Aposetolo e Toasefululua:
Ata
Elder Bruce R. McConkie
“O lenei vaitau atofaina, o lenei tausaga o le filemu, o le a i ai le afio mai faalua o le Atalii o le Tagata, i le aso e toe auina mai ai e le Atua ia Keriso i le lalolagi.
“… O le aso o le a ‘toe faafouina ai le lalolagi ma maua ai lona mamalu faaparataiso.’ (Mataupu Faavae Lona Sefulu o le Faatuatua.) O le aso o le ‘lalolagi fou’ lea na vaai i ai Isaia (Isa. 65:17), o le lalolagi o le a manumalo ma ua le toe i ai se amioleaga, pe a amatalia le vaitau o le meleniuma” (i le;‘ Conference Report, Oct. 1967, 43).
Ata
O Le Afio Mai Faalua
Faitau le Galuega 3:20–21, ma vaavaai po o a isi mea o le a tutupu i lea vaitau.
O le fasifuaitau “le toe fuatai ai mea uma” i le Galuega 3:21e faasino i le Toefuataiga o le talalelei i aso e gata ai. Mai le Galuega 3:20–21, ua tatou aoao ai o perofeta o tupulaga uma na muai tauina mai le Toefuataiga o le talalelei i aso e gata ai.
Pei ona tusia i le Galuega 3:22–26, na molimau atu Peteru e faapea o Mose “ma perofeta uma mai ia Samuelu ma i latou na mulimuli mai ai” (Galuega 3:24) na latou tautala e uiga ia Iesu Keriso ma lapatai mai e uiga i taunuuga o le teena o Ia (tagai Galuega 3:23). I faaaliga i ona po nei, sa toe tau atu ai foi e le agelu o Moronae lenei fuaitau ia Iosefa Samita e faamautu ai ia taunuuga o le teenaina o Iesu Keriso (tagai Iosefa Samita—Talafaasolopito 1:41).
Manatu e faapea o oe o se faifeautalai ma ua fesili atu se tagata sailiili, “O gafea o le Tusi Paia o fai mai ai e faapea o le a toefuatai mai ai le talalelei i aso e gata ai?” I lau api talaaga mo le suesueina o tusitusiga paia, tali le fesili lea e faaaoga ai le Galuega 3:19–21ma se isi fuaitau mai le Tusi Paia. Mafaufau e vaai i lalo o le “Toefuataiga o le Talalelei” i le Taiala o Autu.
Ua puefaapagotaina Peteru ma Ioane; Ua pepelo Anania ma Safaira ia Peteru
Ata
Peteru ma Ioane i luma o le Au Saneterini
Sa puefaapagotaina Peteru ma Ioane ma aveina atu i luma o le Au Saneterini.
I le Galuega 4:1–31 ma le Galuega 5:12–42 tatou te aoao ai i mea nei: Sa puefaapagotaina Peteru ma Ioane mo le faamalologa ma le folafola atu i le suafa o Iesu Keriso. Na tautino atu ma le lototoa e Peteru le talalelei i le Au Saneterini, “o le senate Iutaia lea ma le faamasinoga maualuga Iutaia i mataupu faalemalo ma faaleekalesia” (Taiala i Tusitusiga Paia, “Sanhedrin,” scriptures.lds.).org Ina ua uma ona tatalaina i laua, sa faaauau e Peteru ma Ioane ona folafola atu i le suafa o Iesu ma sa toe puefaapagogatina foi. Sa sasaina i laua, ma sa toe tau atu foi ia i laua e soia le toe tautala i le suafa o Iesu Keriso, ona tatalaina ai lea. Peitai, la te lei taofia ai le aoao atu i le suafa o Iesu.
Mafaufau i tulaga nei: O loo sauniuni se taulealea mo se misiona. Ua ia iloa o le a fai atu e le epikopo ni fesili e uiga i lona agavaa e faamisiona, ma sa ia mafaufau pe tau pe le taua foi i le epikopo se agasala matuia sa ia faia i aso ua mavae.
Ao e suesue i le Galuega 4:32–5:11, vaavaai mo se mataupu faavae e mafai ona fesoasoani e te malamalama ai i le tatau ona faamaoni i auauna a le Atua.
I le Galuega 4:32 ua tatou aoao ai e faapea o le Au Paia (tagata o le Ekalesia) i ona po o Peteru, sa ola i le tulafono o le faapaiaga, o lona uiga sa latou osifeagaiga ma le Atua e faasoa atu i o latou lava loto malie a latou meatotino faaletino ina ia mafai ai ona faafetaiaia manaoga o tagata uma.
Faitau le Galuega 4:34–35, ma vaavaai pe na faapefea ona latou faapaiaina a latou meatotino i le Alii.
Faitau le }Galuega 5:1–2, ma vaavaai po o le a le mea na faia e se ulugalii e igoa ia Anania ma Safaira i le tupe sa la maua mai i le faatauina atu o le fanua. O le upu faanana i le fuaiupu 2 o lona uiga o la e te iloa se mea.
O le a le mea na faia e Anania ma Safaira o se agasala matuia?
Faitau le Galuega 5:3–4, ma vaavaai mo le mea na tau atu e Peteru ia Anania.
E tusa ai ma le fuaiupu 4, o ai tonu lava na pepelo i ai Anania?
Mai le tali a Peteru, ua tatou aoao ai e faapea afai tatou te pepelo i auauna a le Atua, e tutusa lava ma le pepelo ia te Ia.
Faitau le Galuega 5:5–11, ma vaavaai mo le mea na tupu ia Anania ma Safaira o se taunuuga o le solia o la laua feagaiga ma le pepelo ia Peteru ma le Atua.
Ata
Peresitene Gordon B. Hinckley
Na aoao mai Peresitene Gordon B. Hinckley e uiga i ni taunuuga e mafai ona tatou oo i ai pe a tatou pepelo i le Alii po o Ana auauna: “I o tatou taimi, o i latou e maua i le faamaoni e le oti e faapei o Anania ma Safaira, ae e i ai le mea o i totonu o i latou e mate. E tutaia le lotofuatiaifo, e mamae ona uiga, e mou atu le faaaloalogia, e mate foi le amiosao” (“Matou Te Talitonu Ia Faamaoni,” Ensign, Oct. 1990, 4).
Toe iloilo le tulaga e uiga i le taulealea o loo sauniuni mo lona faatalanoaga mo le misiona. I lau api talaaga mo le suesueina o tusitusiga paia, tusi se tusi i lenei taulealea, e faamatala i ai le mea e tatau ona ia iloa e uiga i le pepelo i le taitai perisitua.
Mafaufau po o a faamanuiaga e maua mai i le faamaoni atoatoa i auauna a le Alii.
Mai i le tala ia Anania ma Safaira, ua tatou aoao ai i le manaomia ona faamaoni atoatoa i o tatou taitai perisitua. E le gata i lea, e ao ona tatou faamaoni i a tatou fegalegaleaiga uma ma isi. O le a le uiga ia oe o le faamaoni i au fegalegaleaiga ma isi?
Sa toe aoao mai Peresitene Hinckley: “O i latou o e ola i le mataupu faavae o le faamaoni ua iloa e faamanuiaina lava i latou e le Alii. Ua ia i latou le aia tatau taua e faaeaea ae ai o latou ulu i luga i le la susulu o le upumoni, e le mama foi i luma o soo se tagata. I le isi itu, afai e i ai se tulaga manaomia e toe faaleleia ai soo se tagata o lenei Ekalesia, ia amata i le mea o tatou tutu ai nei” (“Matou Te Talitonu ia Faamaoni,” 5).
Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:
Ua ou suesueina le Galuega 4–5 ma faamaeaina lenei lesona i le (aso).
O fesili, mafaufauga ma manatu faaopoopo ou te fia faasoa atu i lou faiaoga: