Potutusi
Iunite 30, Aso 2: 1 Ioane

Iunite 30: Aso 2

1 Ioane

Folasaga

Sa valaaulia e le Aposetolo o Ioane tagata o le Ekalesia e saili e faamasani i le Tama ma lona Alo, o Iesu Keriso. Na ia faamamafa mai le tatau o le tausia o poloaiga a le Atua e faaali atu ai lo tatou alolofa ia te Ia. Sa faamanatu atu foi e Ioane i tagata o le Ekalesia ia alolofa atu i isi.

1 Ioane

Ua faamalamalama mai e Ioane le taua o le tausia o poloaiga ma le alofa i le tasi ma le isi

  1. I lau api talaaga mo le suesueina o tusitusiga paia, tusi ai le upu liliuese ma lona uiga. Afai e te manaomia se fesoasoani, faaaoga le Topical Guide, o le Taiala i Tusitusiga Paia, po o le faamatalaga o Aoaoga Faavae Autu o loo i le amataga o lenei tusi taiala.

Sa tusia e le Aposetolo o Ioane lenei tusi i se vaitaimi o le taufaamatauina o le Ekalesia e le liliuese. Na ia lapataia le Au Paia e uiga i aneti-keriso (tagai 1 Ioane 2:18–26; 4:3). O se aneti-keriso o “soo se tasi po o soo se mea lea e taufaasese i le fuafuaga moni a le ekalesia mo le faaolataga ma tetee faaaliali pe faalilolilo ia Keriso” ma le pule ma aoaoga a Ana auauna filifilia (Taiala i Tusitusiga Paia, “Aneti-keriso,” scriptures.lds.org). O nisi aneti-keriso i aso o Ioane na aoao atu o Iesu Keriso sa leai sona tino faaletino a o i ai i le lalolagi ae na foliga mai o se tagata faaletino.

Faitau le 1 Ioane 1:1–4, ma vaavaai mo le mea na molimau e uiga i ai Ioane, e faamaonia ai le sese o lenei aoaoga sese. Matau o le “Lokou o le ola” i le fuaiupu 1 e faatatau ia Iesu Keriso.

Matau i le fuaiupu 3–4 na manao Ioane i le Au Paia e faamasani ma taitai o le Ekalesia, o e na masani ma le Tama Faalelagi ma Iesu Keriso. Na manao foi o ia, ia latou oo i le atoatoa o le olioli. O se tasi o se mataupu faavae e mafai ona tatou aoaoina mai i nei fuaiupu o le, afai tatou te maua ma mulimuli i aoaoga a perofeta ma aposetolo, e mafai ona tatou masani ma le Tama ma le Alo.

O le masani o lona uiga o le fiafia i se mafutaga faatuatuaina, faauooga, fegalegaleai, ma le lotogatasi. Mafaufau i tamalii o loo auauna i le Au Peresitene Sili ma Korama a Aposetolo e Toasefululua. E fesoasoani faapefea le mulimuli i aoaoga a perofeta ma aposetolo ina ia tatou masani i le Tama Faalelagi ma Lona Alo o Iesu Keriso?

Faitau le 1 Ioane 1:5–6, ma vaavaai mo le mea e mafai ona taofia i tatou mai le masani ma lo tatou Tama oi le Lagi.

O se tasi o autu aupito sili ona taua o tusitusiga a Ioane o loo tuuina mai i le 1 Ioane 1:5—o Iesu Keriso o le Malamalama o le Lalolagi (tagai Ioane 1:4–9; 8:12; 9:1–5). Mafaufau i se taimi na e savali ai i se nofoaga pogisa moni. O le faaaogaaga e Ioane o le upu pogisa e faatatau i le pogisa faaleagaga.

O le a lou manatu i le uiga o le savali i le pogisa faaleagaga?

Suesue le 1 Ioane 1:7–2:6, ma vaavaai mo upumoni na aoao mai e Ioane lea e mafai ona fesoasoani tatou te iloa ai le ala e savavali ai i le malamalama o le talalelei. O le upu togiola i le 1 Ioane 2:2 o lona uiga o se taulaga togiola e faamalieina ai le faamasinoga tonu.

  1. I lau api talaagga mo le suesueina o tusitusiga paia, tusi ai nisi o upumoni na e mauaina i le 1 Ioane 1:7–2:6. Ona mafaufau lea pe faapefea ona e tali i fesili nei:

    1. Aisea e te manatu ai, e sili atu ona atoatoa pe atoa lo tatou alofa i le Atua, a o tatou tausia Ana poloaiga?

    2. O le a se taimi na e lagonaina ai le alofa faateleina mo le Atua a o e taumafai e tausia Ana poloaiga?

Faitau ia faamatalaga nei, ma vaavaai mo se poloaiga patino o loo tauivi tagata talavou nei e toalua e usitaia:

  • E faitau e se alii talavou ana tusitusiga paia i aso uma ma faatino ma le faamaoni le tele o ona tiute o le perisitua, ae o le tele lava o taimi e le agalelei ai i lona uso laitiiti.

  • E masani ona auai atu se tamaitai talavou i sauniga lotu ma ua maua lona taui o le Aloaiaina o le Tulaga Faatamaitai Talavou. Ae peitai, e masani ona ia taina ni faamatalaga le migao e uiga i nisi o tagata o lana vasega ma faiaoga i luga o faasalalauga o agafesootai.

O le a le poloaiga o loo faigata ona tausia e nei tagata talavou e toalua o le Au Paia o Aso e Gata Ai? (Toe iloilo le lisi o mau tauloto Mataio 22:36–39mo se fesoasoani i le taliina o lenei fesili.)

Mafaufau i ni tulaga e ono faigata ai ona e faaali atu le alofa i isi.

  1. Faitau le 1 Ioane 2:9–11; 4:7–11, 19–21, ma vaavaai mo mea na aoao mai e Ioane e uiga i le alofa. Mafaufau e maka pe faailoga ia aoaoga e anoa ia te oe. Ona tali lea o fesili nei i lau api talaaga mo le suesueina o tusitusiga paia:

    1. O le fea o aoaoga a Ioane e uiga i le alofa e anoa ia te oe? Aisea?

    2. O se tasi o mataupu faavae e mafai ona tatou faailoa mai i nei fuaiupu o le, a tatou alolofa i le Atua, o le a tatou alolofa atu foi i isi. Aisea e te manatu ai, o le a tatou faaalia lo tatou alofa mo isi pe a tatou alolofa moni i le Atua?

Matau na faatatau Ioane i le ita i isi i le 1 Ioane 4:20. E tele ni auala e mafai ona tatou taofia ai lo tatou alofa po o le agalelei atu i isi e ese mai i le ita ia i latou. E te manatu o a nisi o na auala?

Faitau le 1 Ioane 3:17–18, ma vaavaai pe tatau faapefea ona tatou faaali atu lo tatou alolofa i isi.

Aisea e te manatu e taua ai ona tatou faaali atu lo tatou alofa e ala i a tatou faatinoga ae le na o a tatou upu?

O ai e te iloa o se faataitaiga lelei o le faaali atu o le alofa i isi?

Afai e mafai, ia matamata le vitio ua faaigoaina, “Two Brothers Apart” o loo maua i le LDS.org. A o e matamata, vaavaai pe faapefea ona faataitaia e lenei auso lenei mataupu faavae ma po o le a se aafiaga na i ai ia i laua taitoatasi.

  1. Mafaufau i se tasi i lou olaga e ono mafai ona e faaali atili atu i ai le alofa. I lau api talaaga mo le suesueina o tusitusiga paia, tusi ai le igoa o lena tagata ma se mea patino e mafai ona e faia e faaali atu ai lou alofa po o le agalelei agai i lena tagata. E le manaomia ona faaali atu lou alofa i ni auala e soonafai. O faaaliga laiti, ma faatauvaa o le alofa mama ma le agalelei e tele lava ina sili atu ona anoa.

A faaali atu lo tatou alofa e ala i a tatou faatinoga, ua tatou savavali e pei ona femaliuai o Iesu, po o le tatou ola e pei ona sa faia e Iesu (tagai 1 Ioane 2:6; 3:1–3). O le a faamanuiaina oe e le Alii ao e faaaogaina lenei upumoni i lou olaga.

Faitau le 1 Ioane 4:12, ona faitau lea o le Faaliliuga Iosefa Samita, 1 Ioane 4:12 (i le 1 Ioane 4:12, vaefaamatalaga a). O le a se mea o faamanino mai e le Faaliliuga a Iosefa Samita e uiga i le mafai ona vaai i le Atua?

I le 1 Ioane 5, na aoao mai ai e Ioane le mea e tatau ona tatou faia e toefanaufouina ai, o lona uiga “o le i ai o le Agaga o le Alii e mafua ai ona i ai se suiga tele i le loto o le tagata ina ia le toe i ai sona manao e faia mea sese, ae e manao e saili mea a le Atua” (Guide to the Scriptures, “Born Again, Born of God,” scriptures.lds.org). Faitau fuaitau nei, ma lisi po o a ni mea e ao ona tatou faia e toefanaufouina ai:

1 Ioane 5:1

1 Ioane 5:2–3

1 Ioane 5:4

Faaliliuga Iosefa Samita, 1 Ioane 5:18 (i le 1 Ioane 5:18, vaefaamatalaga e)

  1. Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:

    Ua ou suesueina le Ioane 7 ma faamaeaina lenei lesona i le (aso).

    O fesili, mafaufauga ma manatu faaopoopo ou te fia faasoa atu i lo’u faiaoga: