O le Agaga Paia, o le faiaoga, ma le tagata aoao e tofu ma se matafaioi taua i le aoaoina o le talalelei. E mafai ona fesoasoani lenei lesona e te malamalama ai i nei matafaioi taitasi ina ia e manuia i au taumafaiga e aoao. Atonu e manaomia ona e toe faamanatuina e le aunoa ia mataupu faavae ua aoaoina i lenei lesona e faamanatu ai i tagata o le vasega o latou tiutetauave i le aoaoina o le talalelei.
O Matafaioi a le Agaga Paia, o le Faiaoga, ma le Tagata Aoao i le Aoaoina o le Talalelei
Mafaufau i fesili nei:
E lagona e se tasi tamaitai talavou le musuia ma le faagaeetia a o ia suesue i ana lesona e suesue i le aiga. Ua ia lagonaina le faatosinaga a le Agaga Paia. E faafetai o ia ona o mea ua ia aoaoina ma mafaufau i auala e faaaoga ai i lona olaga. Ua faamaea e se tasi tamaitai talavou lesona lava ia, ae e tele ina le fiafia ma ua manatu e le tele se mea o ia aoao mai ai.
Tali le fesili lenei, i lau api talaaga mo le suesueina o tusitusiga paia: O a ni nai mafuaaga e ono i ai pe aisea e eseese ai aafiaga o nei tamaitai talavou a o faamaea a laua lesona e tasi o le seminare?
A o e suesue i le lesona o le aso, vaavaai mo aoaoga faavae ma mataupu faavae ia e mafai ona fesoasoani e te faataunuuina ai lau matafaioi o se tagata aoao i le seminare ma faamalosia ai lau molimau i le talalelei a Iesu Keriso.
O nei tagata e toatolu e i ai ni matafaioi taua i se faatulagaga e pei o le seminare: o le Agaga Paia, o le faiaoga, ma le tagata aoga.
Faitau le Ioane 14:26 ma le Ioane 16:13, ma vaavaai mo nisi o matafaioi a le Agaga Paia.
O se tasi upumoni e mafai ona tatou aoao mai nei fuaiupu e uiga i matafaioi a le Agaga Paia e faapea, o le Agaga Paia e aoao atu le upumoni.
E fua i mea na e oo i ai i lou olaga, e mafai faapefea ona tatou iloa pe a aoao mai e le Agaga Paia i tatou i le upumoni? (Atonu e fesoasoani tele le Mataupu Faavae ma Feagaiga 8:2–3.)
Faitau le Mataupu Faavae ma Feagaiga 50:13–14, ma vaavaai mo le matafaioi a se faiaoga o le talalelei. Manatua o nei fuaiupu na tuuina mai i uluai tagata o le Ekalesia o e sa faauuina e aoao atu le talalelei.
O le a le matafaioi a se faiaoga o le talalelei?
Faitau le 2 Nifae 33:1 ma vaavaai mo mea e fai e le Agaga Paia pe a aoao atu le upumoni i Lona mana.
E tusa ai ma le 2 Nifae 33:1, o le a le mea e faia e le Agaga Paia mo i tatou?
O se tasi auala tatou te saili ai e aoao e ala lea i le faatuatua. Na faamatala mai e Elder David A. Bednar o le Korama a Aposetolo e Toasefululua le mea e tupu a o tatou saili e aoao i le faatuatua. Ina ua uma ona sii mai le 2 Nifae 33:1, sa saunoa Elder Bednar: “Faamolemole matau le ala e molioo atu ai e le Agaga le savali i le ae le o totonu o le loto. E mafai e se faiaoga ona faamatala, faaoao, tauanau, ma molimau atu, ma faia foi ma le atoatoa i le mana tele faaleagaga. Peitai, o le mea moni lava, seiloga lava e faataga e le tagata le aano o se savali ma le molimau a le Agaga Paia e ulufale atu ia te ia, ona faatoa tuia ai lea o lona loto. O le aoao e ala i le faatuatua e matala ai le auala e oo i le loto” (“Saili e Aoao e Ala i le Faatuatua,” Liahona, Sete. 2007, 61).
Mai lenei saunoga ua tatou aoao ai faapea afai tatou te saili e aoao e ala i le faatuatua, ona tatou valaaulia lea o le Agaga Paia i totonu o o tatou loto e aoao ma molimau mai i le upumoni.
O le faatuatua e le na o se talitonu i ai. Tatou te faatino lo tatou fatuatua e ala i mea e faatino. Tali le fesili lenei, i lau api talaaga mo le suesueina o tusitusiga paia: O a ni mea e te manatu e mafai ona tatou faia e saili ai e aoao e ala i le faatuatua?
Mafaufau faapea e te lei taalo soka lava, ae ua folafola atu e se faiaoga ia te oe e mafai ona ia aoao oe ia lelei lau taalo soka e te taalo ai i se au soka. Ua e talitonu i le tomai o le faiaoga e aoao atu ai ma i lou tomai e aoao mai ai. Ua ave oe e le faiaoga i le malae soka. Ua ia faamatala ma faataitai atu ia te oe le ala e kikikiki ai le polo soka, ae na te le tuu atu ia te oe e te taumafai e te faia e oe lava ia. Ona ia faamatala atu lea le ala e pasi ai le polo ma faataitai atu ia te oe le pasiga. Peitai, ae e te lei maua se avanoa e te taumafai ai e toe pasi atu ai, ua sau le faiaoga ia te oe ma toe ave le polo. Na ia faia le mea lava lea e tasi mo le togiina o le polo soka i totonu ina ua pe. Ua ia faafetai atu ia te oe mo lou taimi ona alu lea.
Pe a uma lea ituaiga o lesona, o le a le lelei o lou saunia e te taumafai ai mo se au soka? Aisea?
E ui o le aoao mai e uiga i se mea ma le matamata atu i isi o taaalo soka e fesoasoani, ae afai e te manao e atinae le tomai o loo manaomia ia manuia ai i le soka, o le a se mea e tatau ona e fai?
E ono fesootai faapefea lenei faataitaiga ma le aoao e ala i le faatuatua?
Na o le talitonu ma le faatuatuaina faapea e mafai e le Agaga ona aoao i tatou e le lava lea. O le mauaina o le malamalama i upumoni a le Atua, e tatau foi ona tatou tuu atu le taumafaiga e aoao mai ai ma faaaoga mea tatou te aoaoina. Na aoao mai Elder Bednar e uiga i le faatinoga musuia ona o le faatuatua lea e aofia ai i le aoaoina mai e ala i le faatuatua:
Ata
Elder David A. Bednar
“O se tagata aoao e faaaogaina le faitalia e ala i le galue e tusa ai ma mataupu faavae sao e tatalaina lona loto i le Agaga Paia—ma valaaulia Ana aoaoga, molimau mamana, ma le molimau faamautuina. O le aoao e ala i le faatuatua e manaomia ai le tuuina atu atoa faaleagaga, faalemafaufau, ma le faaletino ae le na ona talia. O le faamaoni a’ia’i ma le ogatasi o a tatou faatinoga musuia i le faatuatua, e faailoa atu ai i lo tatou Tama Faalelagi ma Lona Alo o Iesu Keriso lo tatou naunautai e aoao ma talia faatonuga po o aoaoga mai le Agaga Paia. …
“… O le aoao e ala i le faatuatua e manaomia ai ‘le loto ma le mafaufau matala’ (MF&F 64:34). O le aoao i le faatuatua o le taunuuga lena o le tauaveina e le Agaga Paia o le mana o le upu a le Atua e le gata i le loto ae faapea foi i totonu o le loto. “O le aoao e ala i le faatuatua e le mafai ona sii mai i se faiaoga i se tamaitiiti aoga e ala i se tautalaga, o se ata faataitai, po o se galuega faatino o aafiaga; nai lo lena e tatau i se tamaitiiti aoga ona faaaoga le faatuatua ma galue ai ina ia maua le malamalama mo ia lava” (“Saili e Aoao e ala i le Faatuatua,” Liahona, Sete. 2007, 64).
Toe mafaufau i le tamaitai talavou sa faamatala atu i le amataga o lenei lesona, o le sa tele ina le fiafia ma lagona e le tele se mea o ia aoao mai lesona seminare e suesue i le fale. Mafaufau faapea na ia faailoa atu nei atugaluga ia te oe. Mai mea sa ia fai mai ai i le taimi ua fano e uiga i lona faamaeaina o lesona, na e iloa ai e tele ona ia tusia o tali maoae i galuega faatino i lana api talaaga mo le suesueina o tusitusiga paia, ma e tele ina faalavelaveina o ia e isi mea e fiafia a o galue ai i ana lesona. E le auai foi o ia i gaoioiga i le potuaoga po o talatalanoaga i le taimi o vasega faalevaiaso.
I lau api talaaga mo le suesueina o tusitusiga paia, tusi ni faataitaiga se tolu pe fa o au taumafaiga faaleagaga, faalemafaufau, ma faaletino o le a e fautuaina ai lenei tamaitai talavou e faia ina ia mafai ona manuia ai o ia mai le aoao e ala i le faatuatua.
O faataitaiga ma le soifuaga o le Aposetolo o Peteru e faapupula ai le ala e valaaulia ai le Agaga i totonu o o tatou loto e ala i le aoao e ala i le faatuatua, e aoao atu ai ma molimau atu i le upumoni. Faitau le Mataio 4:18–20, ma vaavaai mo le valaaulia a le Faaola ia Peteru ma lona uso o Aneterea.
O le a le mea na valaaulia e le Faaola ia Peteru ma Aneterea e fai?
Ata
Iesu Keriso ua valaauina Aposetolo
Na valaau e Iesu Peteru ma Aneterea e mulimuli atu ia te Ia.
Na faapefea ona avea la la’ua tali ma faataitaiga o le saili e aoao e ala i le faatuatua?
O le faatinoga a Peteru e mulimuli ia Iesu Keriso na mafai ai e ia ona mafuta ma le Faaola i Lana galuega atoa i le olaga nei. Sa faamanuiaina o ia e faalogo e le aunoa i le Faaola o aoao atu ma molimau ia te Ia a o faatinoina vavega. (tagai Mataio 14:28–29).
I se tasi taimi na fesili atu ai Iesu i le au soo ni fesili se lua. Faitau le Mataio 16:13–17, ma vaavaai mo le fesili patino na tuu atu e le Faaola i Ona soo ma pe na faapefea ona tali atu Peteru.
Matau i le fuaiupu 17 le mea na faamalamalama atu e le Faaola e uiga i le ala na maua ai e Peteru lona malamalama. Na maua e Peteru lona malamalama e ala i faaaliga mai le Tama Faalelagi lea na oo mai i le mana o le Agaga Paia. Mafauafu i le aafiaga o Peteru o se faapupulaga o upumoni o loo aoao atu i lenei lesona.
Faauma galuega atofaina nei i lau api talaaga mo le suesueina o tusitusiga paia:
Faamatala se taimi na e saili ai e aoao e ala i le faatuatua. Na faapefea ona faataunuu e le Agaga Paia Lana matafaioi i le aoaoina o le talalelei ina ua e faia lenei mea?
O le a se mea o le a e faia e aoao ai e ala i le faatuatua ma valaaulia le Agaga Paia i totonu o lou loto e aoao atu ma molimau atu i le upumoni? A e manaomia ni manatu patino i le mea e mafai ona e fai, e mafai ona e filifili ni faatinoga se tasi pe lua e taulai i ai:
Suesue i aso uma i tusitusiga paia.
Atiae ni tomai o le suesueina o tusitusiga paia, e pei o le makaina, fefaasinoa’iga o mau, ma le faaaogaina o fesoasoaniga mo suesuega o tusitusiga paia.
Ia punouai i gaoioiga e aoao ai ma le migao ma le gauai, ma aloese mai mea e faalavelavea ai.
Ia faamaea ma le loto i ai ia gaoioiga e aoao ai i lesona taitasi.
Tusi faamaumau ia uunaiga faaopoopo, ma tusi i lau api talaaga mo le suesueina o tusitusiga paia.
Faamatala ia aoaoga faavae ma mataupu faavae o le talalelei i isi, tusi ma faasoa le malamalamaaga ma aafiaga e fesootai ma aoaoga faavae ma mataupu o le talalelei, ma molimau atu i le moni o aoaoga faavae ma mataupu faavae o le talalelei.
Faaaoga ia aoaoga faavae ma mataupu faavae o le talalelei i lou olaga (tagai Ioane 7:17).
Ata
Peresitene Thomas S. Monson
A o outou saili e aoao mai e ala i le faatuatua i lou aafiaga i le seminare, o le a e mulimuli i le fautuaga a Peresitene Thomas S. Monson: “Le autalavou, ou te aioi atu ia te outou ia outou auai i le seminare. Suesue i aso uma i tusitusiga paia. Faalogo ma le toto’a i o outou faiaoga. Faaaoga mea tou te aoaoina ma le agaga tatalo”: (“Auai i le Seminare,” Aok. 12, 2011, seminary.lds.org).
Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:
Ua ou suesueina le lesona “O Le Matafaioi a le Tagata Aoao” ma na faamaeaina i le (aso).
O fesili, mafaufauga ma manatu faaopoopo ou te fia faasoa i lo’u faiaoga: