Sa faaali atu Iesu ia Saulo (o le na faaigoa mulimuli ane ia Paulo) a o malaga atu o ia i Tamaseko, ma na sosoo ai ma le tauaso o Saulo. Ina ua uma ona faamalolo o ia e Anania, sa papatisoina Saulo ma amata ai ona folafola atu i Tamaseko. Mulimuli ane ona alu lea o Saulo i Ierusalema ma faatasi ai ma soo iina, ae ina ua faamatauina e tagata Eleni Iutaia i Ierusalema le ola o Saulo, o lea sa auina atu ai o ia e Aposetolo i Taso. Sa faia e Peteru ia vavega i Litia ma Iopa.
Na aoao mai e Elder Jeffrey R. Holland o le Korama a Aposetolo e Toasefululua le manaomia ona tatou faamagalo atu:
Ata
Elder Jeffrey R. Holland
“O loo i ai se mea i totonu o le toatele o i tatou lea e faapitoa lava ona le mafai ai ona faamagalo ma faagalo mea sese ua tuanai o le olaga— a le o a tatou mea sese o mea sese a isi. E le lelei. E le Kerisiano. O loo tu mai o se tetee matautia i le maualuga ma le mamalu sili o le Togiola a Keriso. …
“Tuu atu i tagata ia salamo. Tuu atu i tagata ia tuputupu ae. Talitonu e mafai e tagata ona sui ma faaleleia. Pe o le faatuatua ea lena? Ioe! Pe o le faamoemoe ea lena? Ioe! Pe o se alofa moni ea lena? Ioe! O le taualuga o mea uma, o le alofa moni, le alofa mama o Keriso” (“O le a oo mai le Mea Sili,” Liahona, Ian. 2010, 25–26).
Tali fesili nei i lau api talaaga mo le suesueina o tusitusiga paia:
O a ni tulaga e taua ai ia te oe ona tuu atu i isi e suia ma faaleleia atili ma talitonu e mafai ona latou faia?
Aisea e taua ai mo oe le iloa e mafai ona e sui ma faaleleia?
A o e suesue Galuega 9, vaavaai mo upumoni e mafai ona aoao mai ai i ni aafiaga a se tasi sa suia mo le lelei.
O le tele o le anotusi o le Galuega 9 e taulai atu i aafiaga o se tagata e igoa ia Saulo. “Na fanau Saulo i Taso, o se aai Eleni i Kilikia (tagai Galuega 21:39). O ia o se tagatanuu Roma i lona fanau mai (tagai Galuega 16:37) ma e tautala i le ‘gagana Eperu’ (atonu o le faa-Aramaika) ma le Eleni (Galuega 21:37–40). O ia o se Iutaia mai le gafa o Peniamina (tagai Roma 11:1) ma o se Faresaio maoi (tagai Galuega 23:6), o le sa matua naunau e sue ma faataumaoia e na mulimuli ia Keriso(tagai Galuega 9:1–2). Na mulimuli ane ua faaigoa i lona igoa faa-Latina, o Paulo [tagai Galuega 13:9]” (Tusi Lesona a Tagata Aoga o le Feagaiga Fou [Church Educational System manual, 2014], 294). Sa aotauina Saulo i Ierusalema e Kamalielu (tagai Galuega 22:3), o se Faresaio lauiloa ma se aoao faaaloalogia o le tulafono faa-Iutaia (tagai Galuega 5:34–40).
Sa tatou muamua faitau e uiga ia Saulo i le Galuega 7, lea e faamatala ai le fetogia o le soo o Setefano i maa. Atonu e te manatua o i latou na fetogia Setefano i maa na latou tuu atu o latou ofu i vae o Saulo (tagai Galuega 7:58–59).
Faitau le Galuega 8:1–3; 9:1–2, ma vaavaai pe na faapefea ona faia e Saulo e na mulimuli ia Iesu Keriso. E ono fesoasoani le iloa e faapea o le fetoso (Galuega 8:3) o lona uiga o le tatoso faamalosi mai.
Faitau le Galuega 9:3–6, ma vaavaai mo mea na oo i ai Saulo a o ia malaga atu i Tamaseko e puefaapagotaina ia soo o Iesu Keriso e nonofo iina.
Ata
tui
Matau le fasifuaitau “aa i tui” i le Galuega 9:5 “O se ‘tui’ e faasino i se tui, o se matatao maai po o se laau sa faaaoga e tatui ai manu ina ia savavali i luma. Nai lo le agai i luma, o nisi taimi i manu ulumalo, e toe aa mai ai i tua e tetee, e kiki moni lava e ‘aa i le tui.’ O lea ituaiga o tali e na ona faaopoopo atu ai o le le fiafia a o atili ai ona feagai le manu ma le uunaiga tiga mai i lona matai. Ua faamanino mai e le Faaola afai e faifai pea e Saulo ona tau faasaga atu ia te Ia, o le a na ona aumaia ai o le le fiafia ia te ia lava. I tusitusiga faa-Eleni, o le ‘aa i tui’ o se upu valiata lauiloa mo le tetee atu i le Atua” (Tusi lesona a le Tagata Aoga o le Feagaiga Fou,295).
Matau le fesili a Saulo i le Galuega 9:6 O le a se mea ua aoao ai oe e lenei fesili e uiga ia Saulo?
E tusa ai ma le Faaliliuga a Iosefa Samita o le Galuega 9:7, o i latou na malaga ma Saulo na vaai i le malamalama ae latou te lei lagonaina le siufofoga o Iesu a o Ia fetalai atu ia Saulo (tagai Faaliliuga a Iosefa Saita, Galuega 9:7 [i le Galuega 9:7, vaefaamatalaga a]; tagai foi Galuega 22:9).
Ina ua mavae le faaaliga, sa tauaso faaletino ia Saulo. Na taitai atu o ia i Tamaseko, ma sa lei ai pe inu mo aso e tolu.
Faapea o oe o Saulo. Afai na e soona saua i soo o Iesu Keriso, mata o a ni ou mafaufauga ma lagona i lea taimi?
Sa faamalolo ia Saulo e anania o Tamaseko, ua papatiso, ma ua folafola atu e uiga ia Iesu Keriso.
Faitau le Galuega 9:10–12, ma vaavaai mo mea na faatonu e le Alii ia Anania, o se tagata amiotonu o le Ekalesia i Tamaseko, e fai.
Manatua le uluai faamoemoe o Saulo na alu ai i Tamaseko, o le puefaapagotaina lea o tagata e pei o Anania. Pe anafai o oe o Anania ma sa e iloaina le ituaiga tagata e i ai Saulo, mata o a ni ou mafaufauga ina ua uma ona e maua lenei faatonuga mai le Alii?
Faitau le Galuega 9:13–16, ma vaavaai po o a mea na aoao atu e le Alii ia Anania e uiga ia Saulo.
Na faapefea ona ese le silasila a le Alii ia Saulo mai le vaai a Anania ia Saulo?
Matau i le Galuega 9:15 le galuega patino na filifilia e le Alii ia Saulo e fai. Mai mea ua e iloa i le talaaga o Saulo, o le a se mea na saunia ai o ia e folafola atu i “Nuuese, ma tupu, ma fanau a Isaraelu”? (Atonu e te manao e faasino i le faamatalaga o Saulo sa e faitauina muamua i le lesona.)
E tusa ai ma le Galuega 9:16, o le a se isi mea na fetalai le Alii o le a tupu ia Paulo, e ui o le a avea o ia ma ipu filifilia mo Nuuese ma tupu?
O upumoni e lua e mafai ona tatou aoao mai i le Galuega 9:13–16 o mea e silasila mai le Atua ia i tatou i le mea e mafai ona avea ai i tatou ma e silasila le Alii i lo tatou gafatia e fesoasoani ai ia te ia i Lana galuega.
A o e mafaufau e uiga i nei upumoni, mafaufau pe faapefea ona silasila mai le Atua ia te oe. I lau api talaaga mo le suesueina o tusitusiga paia, tusi ai se ata faigofie o oe lava ma lisi ai ou tomai ma ou uiga e te manatu ai e mafai ona faaaoga e le Alii e fesoasoani ai ia te Ia i Lana galuega.
Ata
Saul and Ananias
Sa faamanuia e Anania ia Saulo ia toe pupula.
Matau i le Galuega 9:17 na faamanuia ai e Anania ia Saulo ia toe pupula ma ia faatumuina i le Agaga Paia. E tusa ai ma le Galuega 9:18–20, ina ua toefuatai e le Atua le pupula a Saulo, na faapefea ona ese le vaaiga a Saulo i le Alii mai le mea na ia vaai atu ai ia te Ia muamua?
O le salamo, papatisoga, o Saulo ma le folafola atu na faaalia ai lona faatuatua ia Iesu Keriso ma lona gauai atu i le finagalo o le Alii.
Faitau le Galuega 9:21–22, ma vaavaai pe na faapefea ona tali atu tagata i le talaiga a Saulo.
O le fesili na fai atu ai Saulo i le Alii i le Galuega 9:6 na faaalia ai lona lotomaulalo ma lona naunau e gauai atu i le finagalo o le Alii. E faapei o Saulo, afai tatou te gauai atu i le finagalo o le Alii, ona mafai lea ona tatou suia ma mafai ona faataunuuina le gafatia ua Ia silafia ia i tatou.
Ina ia fesoasoani ia e malamalama i le uiga o le gauai atu i le finagalo o le Alii, mafaufau e faapea o ia te oe se potoi kelei e vaivai ma se potoi ua malo. E faapefea ona ese le taumafai e fai se faatagata e faaaoga ai le kelei vaivai mai le taumafai e fai se faatagata e faaaoga ai se kelei ua malo?
Tali fesili nei i lau api talaaga mo le suesueina o tusitusiga paia:
E mafai faapefea ona faatusatusa ia ituaiga e lua o kelei i se gauai atu o le tagata i le finagalo o le Alii?
Na faapefea e le gauai atu i le Alii ona fesoasoani ia te oe po o isi e suia ma faataunuu le gafatia ua silafia e le Alii ia te oe po o i latou?
Mafaufau pe faapefea e le fesili a Saulo, “Le Alii e, se a le mea e te finagalo ou te faia?” (Galuega 9:6), ona faatatau i lou lava olaga.
Ata
Peresitene Ezra Taft Benson
Na aoao mai Peresitene Ezra Taft Benson: “E le toe mafai e se [tagata] ona faia se fesili e sili atu ona taua i [lona] olaga nai lo lea na fesili ai Paulo: ‘… Le Alii e, se a le mea e te finagalo i ai ou te faia? E leai se faatinoga e sili atu e faia e se [tagata] nai lo le tulimataia o se faamoemoe o le a aumaia ai ia te ia le tali i lena fesili ona faatino ai lea o lena tali” (“Faalogo i le Leo o se Perofeta,” Ensign, Jan. 1973, 57).
Faaauau pea ona tatalo ma le naunautai ma saili mo se tali i le fesili lenei, ma faatino soo se uunaiga e te mauaina.
Ua faamatauina le ola o Saulo i Tamaseko ma sosoo atu ai ma Ierusalema, ma sa auina atu o ia e Aposetolo i Taso
I le Galuega 9:23–26 ua tatou faitau ai sa taupulepule Iutaia i Tamaseko e fasiotia Saulo, ae sa fesoasoani tagata o le Ekalesia e faasola ese o ia mai le aai. Sa tatou faitau ai foi e faapea na alu Saulo i Ierusalema, ona “taumafai lea o ia sei faatasi atu i le au soo; a ua fefefe i latou uma lava ia te ia fa te i latou e le se soo o ia” (Galuega 9:26).
Aisea e te manatu ai sa faatuatuai ona talitonu tagata o le Ekalesia e faapea ua avea Saulo ma soo o Iesu Keriso?
I le Galuega 9:27–31 ua tatou faitau ai ia Panapa, o se tagata o le Ekalesia (tagai Galuega 4:36–37), na aumaia Saulo i le au Aposetolo ma tau atu ia i latou e uiga i le faaaliga a Saulo ma lana talaiga lototoa i Tamaseko. Ona talia ai lea e tagata o le Ekalesia ia Saulo i a latou mafutaga feoeoeai. Ina ua saili e Iutaia Eleni i Ierusalema e fasiotia ia Saulo, sa auina atu e taitai o le Ekalesia o ia i Taso. I le Galuega 9:31 ua tatou aoao ai foi sa maua e le Ekalesia le filemu ma le tuputupu ae i Iutaia, Kalilaia, ma Samaria.
Mafaufau i se tagata e te manao e fesoasoani i ai e liliu atu i le Alii ma talitonu ia te Ia. A o e suesueina le vaega o totoe o le Galuega 9, vaavaai mo se auala se tasi e mafai ona fesoasoani i lenei tagata ma isi e liliu atu i le Alii.
Galuega 9:32–35 ma le Galuega 9:36–42 o loo faamatala ai vavega na faia e Peteru i Litia ma Iopa. A o e faitauina nei fuaiupu, vaavaai mo vavega na faia e Peteru ma pe na faapefea ona tali atu i ai tagata. E mafai ona fesoasoani nei faamatalaga: Faaliluga a Iosefa Samita, Galuega 9:32 e faitauina “a o pasia e Peteru nei itulagi uma” (faaopoopo le faatusilima). Meaalofa na faia (Galuega 9:36) o le faiga o le ofoina atu o mea i e matitiva. O le upu aua le faatuai i le fuaiupu 38 o lona uiga ia lata, ma o le upu faaali i le fuaiupu 39 o lona uiga ua faailoa atu.
Na faapefea ona tali atu tagata o Litia ma tagata i Iopa i le auaunaga a Peteru? O se mataupu faavae e tasi e mafai ona tatou aoao mai i le faataitaiga a Peteru o le auauna atu i isi, e mafai ai ona tatou fesoasoani i tagata e liliu atu i le Alii ma talitonu ia te Ia.
O le tuuina atu o faamanuiaga o le perisitua o se tasi auala e auauna atu ai i isi. O le faataitaiga a Tapita (po o Toreka) i le Galuega 9:36, 39 ua faapupula mai ai se isi auala e mafai ona tatou auauna atu ai i isi. O le “tele o galuega lelei” (Galuega 9:36) ma le auauna atu i isi e mafai ona fesoasoani ai i isi e liliu atu i le Alii.
Tali fesili nei i lau api talaaga mo le suesueina o tusitusiga paia:
O anafea na fesoasoani ai galuega a se isi ia te oe po o isi e liliu atu ai i le Alii ma talitonu ia te Ia?
O a nisi o auala e mafai ona e auauna atu ai i isi? (Ia faapatino, ma tusia ni manatu se lua pe tolu.)
Tusi le mea lenei i lalo o le galuega atofaina o le aso i lau api talaaga mo le suesueina o tusitusiga paia:
Ua ou suesueina le Galuega 9 ma faamaeaina lenei lesona i le (aso).
O fesili, mafaufauga ma manatu faaopoopo ou te fia faasoa atu i lou faiaoga: