Wase 51
Vosota na Rarawa o Jisu ena Were o Kecisemani
Eratou sa gole o Jisu kei iratou na iApositolo ki na Were o Kecisemani. Sa sega ni gole vata kei iratou o Jutasa. A lako ka laki tukuna vei ira na iliuliu ni Jiu na vanua sa tiko kina o Jisu.
Sa kerei Pita, Jemesa, kei Joni na iVakabula me ratou lako vata kei Koya ki na were. A kerea me ratou wawa ka me lako o Koya me masu.
Sa kila tu o Jisu ni sa ganita me vakararawataki ena vuku ni nodra ivalavala ca na tamata kecega. A sega ni vinakata me vakararawataki, ia sa digitaka ga me talairawarawa vei Tamana Vakalomalagi.
Eratou a mocelutu o Pita, Jemesa, kei Joni ni sa laki masu o Jisu. Sa lako mai o Jisu ka raica ni ratou sa moce no. Sa kerei iratou me ratou yadra tikoga.
Sa gole me laki masu tale. Sa lomadratou o Pita, Jemesa, kei Joni me ratou yadra tiko, ia eratou sa wale sara. Eratou sa mani moce tale. Sa raici iratou tale o Jisu ni ratou sa moce ga. Sa lako o Koya ka laki masu ena ikatolu ni gauna.
Ni sa masu o Jisu, sa tekivu me sautaninini ena vuku ni mosi. Sa lako mai e dua na agilosi me mai vakaukauwataki Koya. Sa vakararawataki vakalevu o Koya ka sa bunotaka na titiri ni dra. Sa vakararawataki o Koya ena vuku ni noda ivalavala ca kecega eda sa na vosoti kina kevaka eda sa veivutuni.
Sa qai vakayadrati Pita, Jemesa, kei Joni o Jisu. Sa kaya vei iratou ni na soli Koya yani e dua ka na vakamatei. Sa kaya o Jisu ni ra sa lako tiko mai na tamata ca me ra mai kauti Koya laivi.