Wase 43
Vakabulai Lasarusa Mai na Mate o Jisu
E dua na tamata na yacana o Lasarusa e vakaitikotiko mai Pecani vata kei rau o Meri kei Marica na ganena. E dau lomani Lasarusa kei rau na ganena o Jisu, ka ratou lomani Jisu talega.
Sa tauvimate bibi o Lasarusa. A tiko na iVakabula mai na dua tale na koro. Rau a laki tukuna o Meri kei Marica Vua ni sa tauvimate o Lasarusa.
A kerei iratou na Nona tisaipeli o Jisu me ratou lako vata ka vukei Lasarusa. Eratou a rere na tisaipeli na lako i Pecani. Sa volekati Jerusalemi sara. Eso na tamata e Jerusalemi era a vinakata me ra vakamatei Jisu.
Sa kaya o Jisu vei iratou na Nona tisaipeli ni sa mate o Lasarusa. A kaya ni na vakabulai koya mai na mate. Na cakamana oqo ena vukea me ratou kila na tisaipeli ni sai Koya na iVakabula. Sa lako o Jisu ki Pecani. Ni sa yaco e kea, sa ikava ni bogi sa mate oti kina o Lasarusa.
A kaya o Marica vei Jisu kevaka me a tiko e kea o Koya ke a sega ni mate o Lasarusa. A qai kaya o Jisu ni na bula tale o Lasarusa. A tarogi Marica ke sa vakabauti Koya. Sa vakaio kina o Marica. E kila o koya ni o Jisu na iVakabula.
Sa biuti Jisu o Marica me laki kauti Meri mai na tacina. Sa laki tavaki Jisu talega o Meri. E vuqa na tamata era sa muri koya. Sa tekiduru o Meri e yava ni iVakabula ka tagi. Era sa tagi talega o ira era sa tiko vata kei koya. A taroga o Jisu na vanua sa bulu tiko kina o Lasarusa.
Sa qai lako o Jisu ki na qara sa bulu tiko kina o Lasarusa. Sa vakaisogo na qara oqo ena dua na vatu. A kaya vei ira na tamata me ra kauta laivi na vatu.
Sa rai i lomalagi o Jisu. A sa vakavinavinakataki Tamana Vakalomalagi ni sa rogoca na Nona masu.
E kea, ena domolevu, sa kaya o Jisu vei Lasarusa me lako tani mai na qara. Sa lako mai tuba o Lasarusa. E vuqa na tamata era a raica na cakamana oqo era sa qai vakabauta ni o Jisu na iVakabula.