Wase 49
Na iMatai ni Sakaramede
Ena veiyabaki era dau vakayacora na Jiu e dua na kana vata ni Lako Sivia. E dau vukei ira na Jiu me ra vakananuma kina na veivakabulai ni Kalou vei ira na nodra qase ena gauna i Mosese.
Eratou sa gadreva o Jisu kei iratou na tisaipeli e dua na tikina me ratou tiko rawa ena kana vata ni Lako Sivia. Sa talai Pita kei Joni na iVakabula me laki raica e dua na rumu me vakarautaki kina na magiti.
Eratou sa kunea e dua na rumu ka vakarautaka na magiti.
Era sa tiko kece e kea o Jisu kei ira na iApositolo. Era sa kania vata na magiti ni Lako Sivia.
Sa solia o Jisu vei iratou na Nona iApositolo na sakaramede ena imatai ni gauna. Sa taura na madrai, sa masulaka, ka dovia. Sa kaya vei iratou na iApositolo me ratou kania.
Sa kaya vei iratou o Jisu me ratou vakananuma na Yagona ni ratou sa kania na madrai. A kerea o Koya me ratou nanuma tiko ni na mate ena vukudratou.
Sa livia o Jisu na waini ki na dua na bilo. Sa masulaka na waini o Koya ka tukuna vei iratou na iApositolo me ratou gunuva.
Sa kaya vei iratou o Jisu me ratou vakananuma na Nona dra ni ratou sa gunuva na waini. A kerei iratou me ratou nanuma tiko ni na bunotaka na dra ka vakararawataki ena vuku ni nodra ivalavala ca na tamata kecega.
A kaya talega o Jisu vei iratou na iApositolo ni ra na vakamatei Koya o ira na tamata ca. E tinikadua vei ira na iApositolo era sa rarawa sara vakalevu. Era lomana na iVakabula ka sega ni vinakata me mate o Koya. Sa kila tu o Jisu ni dua vei iratou na iApositolo ena vukei ira na tamata ca. Na yacana o Jutasa Isikarioti.