Wase 23
Na Tamata Ka Sega ni Lako Rawa Tu
Ena dua na siga a veivakavulici tiko o Jisu ki na dua na ilawalawa tamata ena loma ni vale.
Eso na tamata era kauta mai e dua na nodra itokani ena dua na idavodavo me ra raici Jisu. O nodra itokani oqo e sega ni rawa ni lako. Eratou sa sega ni vakacurumi koya rawa ki na loma ni vale ni sa osodrigi tu ena tamata.
Eratou sa qai kauti nodratou itokani cake ki na dela ni vale. Eratou a basuka vakalailai na dela ni vale ka tukuca sobu mai na nodratou itokani ki na loma ni vale.
Ni sa raica o Jisu na levu ni nodratou vakabauta na tamata oqo, sa kaya kina vei koya na tamata tauvimate ni sa vosoti na nona ivalavala ca. Sa tukuna vua o Jisu me taura cake na nona idavodavo ka lako i nona vale. Sa tucake na tamata oqo. Sa vakabulai o koya. Sa taura cake na nona idavodavo ka lako yani ki vale. Sa vakavinavinaka vakalevu o koya vua na Kalou.