Wase 18
Digitaki Ira na Nona iApositolo o Jisu
Ena dua na siga a vakavulici ira na tamata o Jisu ni vodo tiko ena dua na waqa ena baravi ni Wasawasa e Kalili. E itaukei ni waqa oqo o Pita.
E dua na bogi taucoko eratou a qoli tiko o Pita kei iratou na nona itokani ka ratou sega ni rawata e dua na ika. Ni sa oti na Nona veivakavulici o Jisu, sa kaya sara vei Pita me tosoya yani na waqa ki wai titobu. Sa qai kaya vei Pita kei iratou na nona itokani me ratou viritaka ki wai na nodratou lawa ni qoli.
Eratou sa rawata mai kina e levu na ika ka sa tekivu me bote na nodratou lawa.
Sa qai kere veivuke yani o Pita vei ira eso ena dua tale na waqa. Sa vakasinaiti ruarua na waqa oqo ena levu ni ika ka rau sa tekivu me dromu.
Sa kurabui o Pita kei iratou na nona itokani. Eratou sa kila kina ni sa cakava na ka oqo o Jisu.
Sa qai tekiduru o Pita ena yavana na iVakabula. Sa kaya kina ni sa sega ni savasava me tiko volekati Jisu. Sa qai kaya o Jisu vei Pita me kakua ni rere.
E rua vei iratou na itokani i Pita erau veitacini, o ya o Jemesa kei Joni. Sa qai kaya o Jisu vei Pita, Jemesa, kei Joni me ratou muri Koya ka me ratou “gonedau ni tamata.” Eratou sa biuta na veika kecega ka lako vata kei Jisu. Sa kerea talega na iVakabula eso na tagane me ra muri Koya.
Sa digitaka o Jisu e lewe tinikarua na iApositolo me ra veiliutaki ena Nona Lotu. Sa masu o Koya ena bogi taucoko me digitaki ira kina na tamata vinaka Ena mataka ka tarava sa digitaka ka tabaki iratou kina e lewe tinikarua na tagane, ka solia vei ira na matabete kei na lewa me ra iApositolo.
Era sa lako yani na iApositolo ki na vuqa na koro. Era sa vakavulica na kosipeli ka vakabulai ira na tamata mai na mate. Era sa lesu ka tukuna vei Jisu na veika era a kitaka.