Wase 24
Sa Vakabulai mai na Mate na Luvei Jairo Yalewa
Ena dua na siga, sa lako yani o Jairo, na turaga ni valenilotu, ka cuva e yavai Jisu.
Sa tukuna o Jairo ni sa tauvimate bibi sara na luvena yalewa yabaki 12. Sa vakamasuti Jisu me gole yani me laki masulaki koya. E vakabauta o koya ni na vakabulai luvena o Jisu.
Sa qai muri Jairo o Jisu ki nodratou vale, ia a tu mada vakadua o Koya me vakabula e dua na yalewa. Ni sa lako yani vua na yalewa oqo o Jisu, sa lako mai e dua na tamata ka tukuna vei Jairo ni sa bera na veivakabulai— ni sa qai mate na luvena yalewa.
Sa rogoca o Jisu na veika sa tukuni. Sa qai kaya vei Jairo o Koya me kakua ni taqaya ia me vakabauti Koya ga.
Sa qai lako o Jisu vata kei Jairo ki na vale nei Jairo. Sa sinai tu na vale mai vei ira na tamata ka ra tagi tiko ni sa qai mate na goneyalewa lailai.
Sa kaya o Jisu vei ira ni sa sega ni mate na goneyalewa ni sa moce ga. Era sa dredrevaki Koya mai na tamata. Ni ra sa kila vakaidina ni sa mate tu na goneyalewa.
Sa tukuna na iVakabula me ra lako kece i tuba vakavo ga o iratou na Nona tisaipeli, o Jairo, kei na wati Jairo. Eratou sa lako ki na rumu na vanua sa davo koto kina na goneyalewa.
Sa qai taura na ligai goneyalewa o Jisu. Sa tukuna vua me tu cake. Sa tu cake na goneyalewa ka tekivu lako. Erau sa kurabui na nona itubutubu. Sa tukuna vei rau o Jisu me rau kakua ni tukuna vua e dua na tamata na ka sa yaco. A tukuna o Koya me rau solia e dua na kakana me kania o goneyalewa.