Wase 46
Na iKarua ni Lesumai
Sa tiko voli mai na Ulunivanua ni Veiolive o Jisu. Era sa via taroga vei Jisu na tisaipeli eso na ka. Era a taroga na gauna cava era na vakarusai kina o ira na tamata ivalavala ca. Era a via kila talega ni na lesu tale mai ena gauna cava o Jisu.
Sa qai kaya vei iratou o Jisu ni bera ni yaco na iKarua ni Nona Lesumai, era na kaya na parofita vakailasu ni sai ira na Karisito. E lewelevu era na muri ira. Ia kevaka era na vakamuria na Nona vosa, era na sega ni vakacalai mai vei ira na parofita vakailasu vakaoqo. Era na qai vakabulai.
Sa kaya talega o Jisu ni bera ni lesu tale mai, ena yaco e vuqa na veivaluvaluti, dravuisiga, veimate ca lelevu kei na uneune. E lewelevu era sa na sega ni lomani ira na tani ka ra sa ivalavala ca.
Ena vunautaki yani na kosipeli ki vuravura taucoko, ia era lewelevu na sega ni vakarogoca.
Ena yaco me butobuto na matanisiga, ena sega ni cila na vula, ka ra na lutu mai na kalokalo mai lomalagi.
Ni sa lesu tale mai o Jisu Karisito, era na raici Koya na tamata ni sa lako sobu mai ena o ena kaukauwa kei na lagilagi cecere. Ena talai ira na Nona agilosi me ra na vakasoqoni ira vata mai na tamata ivalavala dodonu.
Sa rawa me da vakavakarau ki na iKarua ni Lesumai ena noda vakayacora na veika sa dodonu. Ni gauna eda sa raica kina na ivakatakilakila a yalataka tu o Jisu, eda sa na kila sara ni sa voleka na lesumai ni iVakabula. E sega ni dua e kila na gauna donu ena lesu tale mai kina o Jisu. Kevaka eda sa vakavakarau tu, eda na tiko vata kei Koya.