Wase 32
Sa Vakadinadinataki Karisito o Pita
E taroga o Jisu vei iratou na Nona tisaipeli na cava era kaya na tamata ni o cei o Koya.
Era sauma na tisaipeli ni so vei ira era kaya ni o Jisu sai Joni na Dauveipapitaiso. Eso tale era kaya ni o Koya e dua na parofita mai na Veiyalayalati Makawa sa tucake tale mai na mate.
Sa taroga o Jisu vei iratou na Nona tisaipeli se o cei o Koya. A kaya o Pita, “Oi kemuni na Karisito, na Luve ni Kalou bula.”
E vakamacalataka o Jisu ni ivakadinadina i Pita e sega ni lako mai ena kila ka vakatamata. Na nona ivakadinadina sa ivakatakila mai vua na Kalou.
Sa yalataka o Jisu vei Pita ni na solia vua na idola ni matabete kei na lewa me liutaka na Nona Lotu. Sa qai soli kina vei Pita kei iratou na tisaipeli na lewa me ratou tauyavutaka kina na Lotu i Jisu e vuravura.
E kaya o Jisu vei iratou na Nona tisaipeli me ratou kakua ni tukuna vua e dua ni sai Koya na Karisito. Taumada me na sotava na rarawa o Koya, vakamatei, ka tucake tale mai na mate ena ikatolu ni siga.