Wase 17
O Ira era Cudru e Nasareci
Sa gole o Jisu ki Nasareci, na korolevu a susu mai kina.
A gole o Jisu ki na dua na valenilotu, na vale era dau laki sokalou tiko kina na Jiu. A tucake ka wiliwili mai na ivolanikalou. E wilika na vosa nei Aisea na parofita. A parofisaitaka tu mai o Aisea ni na lako mai ki vuravura na iVakabula ka na vukei ira na tamata kecega.
Ni sa sogota o Jisu na ivolatabu ka dabe sobu, era sa raici koya na tamata kecega.
E kaya o Jisu ni veika a tukuna o Aisea sa baleti Koya—ni sai Koya ga na iVakabula. Era sa kurabui na tamata ena vuku ni ka e tukuna o Koya. Era kaya na tamata, “Sa sega li ni luvei Josefa ko koya oqo?” Era sega ni vakabauta na tamata ni o Jisu na Luve ni Kalou.
Sa kila vinaka tu na iVakabula na veika era vakasamataka tiko. Era vinakata tiko o ira me vakayacora o Koya e dua na cakamana. Ia sa qai kaya o Jisu ni na sega ni cakava vei ira e dua na cakamana baleta ni ra sega ni vakabauti Koya.
Oqo a vakavuna me ra cudru kina na tamata. Era a qai kauti Jisu ki na dua na delana me ra viritaki Koya sobu mai kina.
A qai dro tani mai vei ira o Jisu ka lako ki na dua tale na koro.