Wase 19
Na Vunau ena Ulunivanua
Ena dua na siga a vakavulica tiko na kosipeli vei iratou na Nona tisaipeli o Jisu ena yasa ni ulunivanua ena bati ni Wasawasa o Kalili
A vakavulica vei iratou na sala me ratou bula kina me ratou tiko marau ka laki bula vata tale kei na Tamada Vakalomalagi. Na veika a vakavulica o Koya vei iratou ena rawa me da bula marau talega kina.
E kaya o Jisu ni dodonu me da yalomalua, dauvosota, ka lomada me da talairawarawa vua na Tamada Vakalomalagi.
E dodonu me da sasaga vagumatua me da bula savasava.
E dodonu me da vosoti ira era vakararawataki keda se vakayalocataki keda. Kevaka me da na vosoti ira, ena vosoti keda na Tamada Vakalomalagi.
E dodonu me da dauveivakacegui, lomani ira na tamata, ka vukei ira na tamata yadua me ra veilomani vakai ira.
Me da kakua ni rerevaka na tukuna yani na kosipeli vei ira na tamata se vakaraitaka vei ira ni da lomana na Tamada Vakalomalagi. Ni ra raica na tamata na noda caka vinaka, ena vukei ira me ra vakabauta talega na Kalou.
E dodonu me da dau maroroya tikoga na noda yalayala.
Me vaka ga ni da gadreva me ra lomani keda na tani, sa dodonu vakakina me da lomani ira.
E kaya o Jisu ni kevaka me da vakayacora na ka oqo, eda na marau, ena vakalougatataki keda na Tamada Vakalomalagi, ka da na laki bula vata tale kei Koya.