Wase 44
Sa Lako na iVakabula ki Jerusalemi
Eso na tamata era sa laki tukuna vei ira na bete kei na Farisi ni sa vakabulai Lasarusa mai na mate o Jisu. Era sa qai nanuma na Farisi ni ra sa vakabauti Jisu o ira na tamata kecega. Era sa rere ni sa na sega ni dua ena vakarorogo vei ira.
Era sa qai bukiveretaki Jisu o ira na Farisi me ra vakamatea. Era sa qai waraki Koya me lako yani i Jerusalemi ki na kana vata ni Lako Sivia.
Sa Lako i Jerusalemi o Jisu. E vuqa era sa rogoca ni sa lako yani o Koya era sa lako yani me tavaki Koya. A vodoka o Jisu e dua na asa gone ki na korolevu. Sa vola tu mai e dua na parofita ni na vakayacora na ka oqo na Luve ni Kalou. E lewevuqa era vakabauta ni o Jisu na Luve ni Kalou. Era sa tevuka na drauni niu kei na so na nodra isulu e gaunisala me lako kina o Koya. Era sa kailavaka yani na osana ka ra kacivaka ni ko Jisu sa nodra tui.
Era sa qai lako mai na lewe i Jerusalemi me ra raica na ka sa yaco oqo. Era a taroga se o cei o Jisu. Era qai kaya mai o ira era tiko e kea ni o Koya e dua na parofita mai Nasareci.
Era sa cudru sara kina na Farisi. Era sega ni vinakata me ra vakabauta na tamata ni o Jisu na iVakabula. Sa kila kina o Jisu ni ra sa vinakata na Farisi me ra vakamatei Koya.
Sa kaya o Jisu vei iratou na Nona tisaipeli ni sa na vakarau mate o Koya. Ena vakararawataki o Koya ena vuku ni nodra ivalavala ca na tamata ka na mate ena kauveilatai. Sai Koya na iVakabula kei vuravura. Oqo na vuna a lako mai kina ki vuravura o Koya.