Senweri–Sulai 1837

Parley Peki Mahk

Kadehde en kompoakepah men kakehlakahla ah pwoson

Ansou me lelehr ong Thankful oh Parley Pratt en naineki seri, ira pwurodo sang ara misin nan Kanada. Ira naineki kisin pwutak kehlail men ni duwen Kauno ah ketin inoukihong ira.

Souleng kan, 1:270

Kansensuwedih, Thankful mehla mwurin awa kei mwurin serio ah ipwidi. Parley ese me e sohte pahn kak apwalih serio kelehpw. E peki rehn lih emen nan Kirtland en apwalih serio ansou me e pahn pwurala Canada pwe en kanekehla ah doadoahk en misin.

Souleng kan, 1:270

Nan Kirtland, Sosep Smith kawada pank ehu, de mehn nekidala mwohni ong Sapwellimen Koht doadoahk. E padahkihong aramas akan en mweidohng panko en doadoahngki neirail mwohni kan pwe aramas teikan en kak doadoahngki. Ahpw, ong ni kahrepe tohto kan, panko sohte kolokol mwohni me itar oh e anahne ritidi. Pank teikan nan United States pil sohte keirida.

Souleng kan, 1:260–61, 264–68

Mour inenen apwalla ong Souleng kan. Ekei sohla doadoahk oh sohte itar mwohni en pwainda mwenge de likou kan. Ekei aramas lingeringer pahn Sosep, pil iangahki kompoakepah kei. Irail medewe me Sosep kaidehn soukohp mehlel men pwe panko pwupwidi.

Souleng kan, 1:264–68, 272–275

Ansou me soahng pwukat wiewiawi, Parley pwurasang ah doadoahk en misin. Kahpwal en panko pil wiaiongehr mour en Parley ah pil apwalada. E sohte naineki mwohni me itar en pwain ihmwe ihmw, oh sohlar wasa me e pahn kak kouson ie.

Souleng kan, 1:270–71

Met Parley pil lingeringer pahn Sosep. E intinglahng Sosep. E padahkihong Sosep me e kamehlelehte Pwuhk en Mormon. Ahpw e pil koasoia soahng sohte mwahu kei duwen Soukohpo. E indahng Sosep me ih me e sapwung ah song en kawada panko sangete ni tapio.

Souleng kan, 1:271

Mwuri, ekei kompoakepahn Parley kan kohsang Kanada kohdo Kirtland. Parley padahkiong irail rongamwahuo, oh irail inenen pereniki arail pwurehng tuhwong ih.

Souleng kan, 1:279–80

Ahpw irail pil inenen pwuriamweikihla Parley oh mehteikan ah sohlar ahneki pwoson me Sosep Smith wia soukohp emen.

Souleng kan, 1:279–80

Emen kompoakepahn Parley iei John Taylor sang Kanada. Ansou me Parley kilangada ih, e ndaihong John ia wehn ah lingeringer pahn Sosep Smith. E ndaihong John ah en sohla idahwen Sosep.

Souleng kan, 1:280

John katamankihong Parley me ansou me ira mihmi nan Kanada, Parley ehukiong ih ah kadehde me Sosep Smith wia soukohp mehlel men. “I met ahneki soangen kadehde ohte,“ Sohn koasoia. “Ma doadoahko mehlel sounpwong weneu samwalahr, e pil mehlel rahnwet. Ma Sosep Smith wia soukohp men rahnteio, e pil wia soukohp men rahnwet.“

Souleng kan, 1:280

Parley ese me kompoakepah John pwung. E insensuwedkihla nah kisin likou me e wiahda ong Sosep. E ese me Sosep wiewia wehn ah kak koaros en wia Sapwellimen Kauno doadoahk. Kahpwal akan en panko sohte wewehki me Sosep kaidehn soukohp mehlel men en Sises Krais.

Souleng kan, 1:283

Parley kohla ni ihmwen Sosep. E ndaihong Sosep me en nsensuwedikihong soangen koasoi sohte mwahu koaros me e indahionger. Sosep mahkong Parley, kapakapki ih, oh pil kapaiada ih. Parley wia pwukoahn misineri wasa tohto oh padahkiong aramas akan wasa koaros nan sampah me Sosep Smith wia soukohp en Kauno men.

Tepin Padahk oh Inou kan 64:7–11; Souleng kan, 1:283