Pepweri 1832

Sosep oh Sidney Esehla Duwen Nanleng

Kaudiahl ehu duwen Sapwellimen Koht kapai kan ong Sapwellime serihkan

Rahn ehu, Sosep Smith oh Sidney Rigdon wie wadwadek Pwuhk Sarawi. Ira wadek duwen dahme pahn wiawi ong aramas mwurin arail mehla. Sosep oh Sidney medewe duwen dahme ira wadek, oh ira men esehla laud.

Tepin Padahk oh Inou kan 76:11–18

Kauno ketikiong ira kaudiahl kapwuriamwei ehu. Ira kilang Samatail Nanleng oh Sises Krais iangahki tohnleng kei me kapil irapene. Ira rong ngihl ehu masanih me Sises iei Iehros en Koht. Ngihlo masanih me Sises pwoukin kitailla oh pil iasadahr—E ketin pwurengehr ieias. Pwehki Ah ketin wia met, kitail pahn pil iang iasada.

Tehk Tepin Padahk oh Inou kan 76:19–24, 39–43

Sosep oh Sidney esehla me mwurin atail iasadahr, kitail pahn kouson nan ehu wasa sang wasa me siluh nanleng, me adaneki wehi kan. Aramas me sohte alehda rongamwahu en Sises Krais pahn kohla wein telestial. Kauno karasahiong wehi wet ong marain en usu kan.

Tepin Padahk oh Inou kan 76:81–86

Sosep oh Sidney pil esehla duwen wehi ehu me adahniki wein terrestrial. Wehi wet ong aramas me kin momouriki mour mwahu ahpw sohte peikiong rongamwahu en Sises Krais ni unsek. Irail sohte kehlail nan arail pwoson Ih. Kauno karasahiong wehi wet ong marain en maram.

Tepin Padahk oh Inou kan 76:71–80

Wehi me keieu laud iei wein celestial. Aramas me kin mih nan wehi wet alehdi inou sarawi kan, de wiahda inou kan, rehn Koht oh wie kolokol arail inou kan koaros. Irail koluhla oh idawehnla Sises Krais. Irail kin kouson rehn Samatail Koht oh Sises kohkohlahte oh duwehla Ira. Kauno karasahiong wehi wet ong marain en ketipin.

Tepin Padahk oh Inou kan 76:50–70

Kauno ketin mahsaniong Sosep oh Sidney ira en dehr ehukiwei sohng koaros me ira kilangehr nan ara kaudiahlo. Ahpw E ketin kupwurki ira en intingihda ekei oh ehukiong mehteikan. Towe tohto en Mwomwodiso pereniki ndaihong aramas akan duwen kaudiahl wet.

Tepin Padahk oh Inou kan 76:113–119; Souleng kan, 1:149–50

Ekei aramas sohte pereniki kaudiahl wet. E wekisang dahme irail kamehlelehier. Ahpw palilaud en Souleng kan inenen kapingki ahr esehla duwen kaudiahl wet. E kasalehiong irail me Samatail Nanleng ketin poakohng Sapwellime serihkan oh ketin wiahda ahl ehu pwe irail en pwurala Reh.

Souleng kan, 1:149–50