Mehn kapehse

Me pid Tepin Padahk oh Inou kan

Kauno pwurehng mahsenih

Samatail Nanleng poakoahng kitail. E ketin kupwurkinkitail en wiahda inou kesempwal, de inou kan, Reh pwe E kak ketin kapaikitialda. E poaroanehdo Sapwellime Ierohs, Sises Krais, en wie atail Sounkomour oh en ketin sewesei kitail pwurala Reh.

Koht pil kin ketin poaroanehdo soukohp akan en padahk kitail duwen Sises Krais oh Sapwellime kosonned akan. Soukohp akan kin papah Sies Krais oh sawaski kaweidpen Sapwellime Mwomwohdiso.

Sises mahsenihong soukohp akan dahme irail en padahkihong kitail. Mahsen en soukohp akan sang mahsmahs ntingdi ni pwuhksarawi kan me rasehng Pwuhk Sarawi oh Pwuhk en Mormon.

Pahr kei mwurin Sises ketiket pohn sampah, sohte soukohp akan mie. Aramas ako sohte wiahda oh kolokol inou kan rehn Koht. Mwomwohdiso en Sises Krais sohte mihmi pohn sampah.

Eri Koht apw ketin malipe Sosep Smid en wiahla soukohp men. Sosep wie pwutak pwulopwul men, ahpw Koht sapwellimaniki pwukoah kesempwal e en wia.

Sosep Smid padahngki Sises. E sawaski koasoandi en Sapwellimen Sises Mwomwohdiso. Sises ketin padahk Sosep Smid Sapwellime rongamwahu oh mwomwen ah en kaweid Sapwellime Mwomwohdiso.

Soahng tohto me Sises ketin mahsenihong Sosep Smid ntingdi ni Tepin Padahk oh Inou kan. Tepin Padahk oh Inou kan iei pwuhk sarawi ieu me rasehng Pwuhk Sarawio oh Pwuhk en Mormon.

Soai kan en Tepin Padahk oh Inou kan koasoia mwomwen Sises kapwurehdo, Sapwellime Mwomwohdiso, iangahki sawas sang Soukohp Sosep Smid oh mehteikan. Tohn Mwomwohdiso wet adahniki Souleng kan. Soai pwukat kin kasalehda me Koht ketin poakpoake Sapwellime serihkan wasa koaros pohn sampah. E ketin kupwurki en kapaikitailda ni atail wiahda atail inou kan Reh.