Suhn 1844–Sulai 1847

Mweselsang Nauvoo oh Kokohla Palikapi

Souleng koa wiahda oh kolokol arail inou kan ohng Kauno

Sosep Smith melahr. Met Brigham Young oh Wahnpoaron teikan kaweidehr Mwomwohdisoh. Brigham ese me Souleng koa solahr seip Nan Nauvoo. Irail pahn anahne kohkohsang mwo. Ahpw keiou, Kauno ketin kupwurki irail en kanekehla tehnpas sarawio. E ketin kupwurki irail en wiahda inou sarawi kan ohng Ih oh katengtengpene nan peneinei kan.

Souleng kan, 1:571, 579–80

Mwurin sounpwung kei, tehnpas sarawio onopehngehr aramas en wiahda inou sarawi kan wasahu. Souleng kid samwa kei kodohr ni tehnpas sarawio. Brigham mihmi nan tehnpas sarawio lel nihpwong pwehn sewese irail wiahda inou sarawi kan ohng Kauno. Ni imwilahu, Brigham indahngehr koaros me irail anahne kohkohsang Nauvoo.

Souleng kan, 1:582

Ansou me Brigham pirida menseng mandahu, pil ekei Souleng koa wie ouioupene ni tehnpas sarawio. Brigham indahng irail me e sohte seip irail en mihmi nan Nauvoo. Irail anahne rapahkihda arail wasahn kousoan kapw nan palikapi. E inoukihdi me irail kak kauwada ehu tehnpas sarawi kapw ni arail pahn lel mwo.

Souleng kan, 1:582–83; 2:13–14

Ahpw Souleng koa sohte kohkohla. Irail mwahuki wiahda inou sarawi kan ohng Kauno mwohn arail pahn seiloaklahng ehu wasahn kousoan kapw.

Souleng kan, 1:583

Brigham kilangedier masarail koa oh wekidala ah madamadau. Rahno pwon oh rahn mandahu e sewsewese Souleng koa wiahda inou sarawi kan nan tehnpas sarawi.

Souleng kan, 1:583

Met nan Souleng koa ahr wiadahr inou sarawi kan ohng Kauno, e lelehr ansoun mweselsang Nauvoo. Brigham esehier me Kauno ketin kaunopadahr arail wasa. E kilangehr nan kasansal ehu. Irail tapiadahr arail seiloako. Wehdero inenen kepou, oh pwehlo udahn pwelmatak. Aramas akan soumwahudahr. Kanarail mwenge koa nekneklahr.

Souleng kan, 2:16–18, 20–21

Inenen doh wasa Souleng koa pahn kohla iehu. Brigham medewehier ia mwomwen arail kak wia soangen seiloak doh oh apwalo. E kapakapehr peki Sapwellimen Koht sawas.

Souleng kan, 2:46

Kauno ketkihongehr Brigham ehu kaudiahl. E ketin kaweidki Brigham duwen ah pahn moangehda Souleng koa. E mahsaniher me irail anahne sawaspene apwalih me semwehmwe kan.

Doctrine oh Covenants 136:1–8

Kauno mahsaniher me Souleng kan en taman inou sarawi kan irail wiahiengehr. Ma irail wia, E pahn ketin kapai irailda oh sewese irail nan arail seiloak.

Doctrine oh Covenants 136:4, 11, 42; Souleng kan, 2:47

Seiloako pil inenen apwalte. Ekei aramas melahr. Ahpw pwehki arail inouen tehnpas sarawi kan, Souleng koa esehier irail pahn pwurehng kilang arail peneinei kan.

Sounpwung kei mwuri, keioun Souleng koa leledohr nan Wahu en Salt Lake nan pahr 1847. Ansou me Brigham Young kilangadahr wahuo, e indahier, “Ih wasahu met.” Ihte wasahu me e kilangehr nan kasansal ehu. Iet wasaht me Souleng kan pahn kak seip. Wasaht irail kak kaudekieng Kauno oh wia Sapwellime doadoahk nan meleilei.

Souleng kan, 2:17, 64–67

Sounpar kan dou powe, pil tohto Souleng kan leledohr. Irail wiadahr tehnpas sarawi tohto kei, wasa aramas kak wiahda arail inou sarawi kan ohng Kauno. Irail kadarala misineri kan nan sampah pwon pwehn padahngki rongamwahu en Sises Krais. Sapwellimen Sounkomouro Mwomwohdisoh doulahte oh keirda, kapaiada sapwellimen Sahm Nanleng seri kan wasa koaros.