Nopempe 1830–Sulai 1831

Mary oh Caroline Rollins

Limpoak lap ong pwuhk sarawi kan

Mary Rollins sounpar 12 ansou me misineri kan tapida pwarek Kirtland, Ohio. E rong arail koasoiapen Pwuhk en Mormon. Nan ansouo, kopihn pwuhko ehute me mih nan Kirtland, oh kaun en Mwomwohdiso men me adaneki Isaac Morley me kin kolokol.

Mary kohla ni ihmwen Brother Morley oh peki ma e kak kilang pwuhko. Brother Morley mweidohng en kolokol pwuhko. Mary peki ma e kak wahdahng ihmwehu.

Brother Morley sohte men kiohng Mary nah kopihn pwuhko. E saikinte nohn wadek mwahu. Mary pil pekipekihte rehn Brother Morley ma e kak wahda.

Brother Morley pwungkihda. E koasoia me Mary kak wahda pwuhko ma e pahn kapwurehdo mwadang mandahn rahno. Mary apwalih pwuhko ni keneinei. E wie pepehd ni pwong wie wadewadek pwuhko.

Ansou me Mary kapwurehla pwuhko, Brother Morley inenen pwuriamweikihla wehn me e wadekala. “Samwa,“ e koasoia, “wahda pwuhket ni ihmwomw oh kowe kanekehla. I kak awih.“

Mary me wia tepin aramas nan Kirtland me wadekala Pwuhk en Mormon pwon. Mwurin ansou me e kanekelahr, e tuhong Soukohp Sosep Smith. Ansou me e diarada ia wehn Mary ah poakohng Pwuhk en Mormom, e koasoia me e kak nainekihla nein Brother Morley kopiho. E pahn kihong Brother Morley ehu kopi en pwuhko.

Mwuhr nin pahro, Mary oh ah peneinei mihla Independence, Missouri. E inenen pereniki kilang kaun en Mwomwohdiso kan arail songosong en kihpene pwuhk ehu me kahdaneki Pwuhk en Kosonned akan. Pwuhk wet pahn audaudki kaudiahl akan me Sises Krais ketikihong Sosep Smith.

Tepin Padahk oh Inou kan 67; 70:1–4; Souleng kan, 1:178

Ahpw ekei aramas nan Independence sohte pwungki Mwomwohdiso wet. Irail mwahuki Souleng kan en kohkohla. Rahn ehu, ohl lingeringer kei kawehla wasa me Pwuhk en Kosonned akan wiewiawihda ie. Irail kesehieila mehn wiahdahn kopih kan nan wenihmw toko oh kamwerepeseng tehn doaropwe kan en Pwuhk en Kosonned akan nan ahlo.

Souleng kan, 1:177–78

Mary oh rie serepein, Caroline, wie kilekilang sang palio kehl ieu. Mary ndaihong Caroline me e men ale doaropwe ko mwohn ah pahn ohla. Caroline masak ohl lingeringer ko. “Irail pahn kemehla kita,“ e nda. Ahpw Mary oh Caroline ese me doaropwe ko kolokol mahsen en Koht.

Souleng kan}, 1:178

Perien ko awih lahu ohl ko sohte kilekilang. Ira ahpw tangala pohn ahlo oh song en ale wehn me ira kak kolokol koaros. Ansou me ira mwadangete kohkohla, ekei ohl ko kilangirahda oh werohng ira en uhdi. Mary oh Caroline kolehdi doaropwe ko teng oh wia wehn ara marahra koaros en tangala nan mwoatin korn ehu.

Souleng kan, 1:178–79

Ohl riemen pwakihala perien ko nan mwoatin korno. Korn ko udahn reirei, kahrehda Mary oh Caroline sohte kak kilang iawasa ira kohkohla ie. Ira pwupwidihong pwehlo oh ekihla doaropwe ko pahn paliwara ko. Ira rongorong ni nennen ni ohl riemen ko ara wie alialuseli nan korn ko raparapahkin ira.

Souleng kan, 1:179

Kedekede ohl oko kohkohla. Mary oh Caroline pitila. Ira doarehla doaropwe kei en Sapwellimen Kauno kaudiahl ong Pwuhk en Kosonned akan. Rahn pwukat kaudiahl ko mihmi nan Pwuhk en Tepin Padahk oh Inou kan.

Souleng kan, 1:179