សិក្សា អាន រំឭក អធិស្ឋាន ។ ធ្វើឡើងវិញ ។
អ្នកនិពន្ធរស់នៅខេត្តខោទីន ប្រទេសឈីលី ។
ប្រសិនបើគ្មានអាហាររូបករណ៍ទេ នោះខ្ញុំពុំអាចមានប្រាក់គ្រប់គ្រាន់ដើម្បីបង់ថ្លៃមហាវិទ្យាល័យឡើយ ។
រចនារូបភាព ដោយ អ័រដាម ហៅលីង
នៅប្រទេសឈីលី ដើម្បីចូលរៀនមហាវិទ្យាល័យ អ្នកត្រូវប្រឡងចូលរៀនសាកលវិទ្យាល័យសិន ។ ខ្ញុំចង់រៀនផ្នែកវិស្វ័កម្មនៅសាកលវិទ្យាល័យដែលនៅឆ្ងាយពីកន្លែងដែលខ្ញុំរស់នៅ ។ តម្លៃសិក្សានោះវាថ្លៃណាស់ ដូច្នេះគោលដៅរបស់ខ្ញុំគឺត្រូវទទួលបានពិន្ទុខ្ពស់បំផុតដែលអាចទទួលបាន នៅពេលធ្វើការប្រឡងចូល ដើម្បីខ្ញុំអាចទទួលបានអាហាររូបករណ៍មួយសម្រាប់ពិន្ទុប្រឡងដ៏លេចធ្លោមួយ ។
ខ្ញុំបានដឹងពីកន្លែង និងអ្វីដែលខ្ញុំចង់សិក្សា ហើយខ្ញុំបានដឹងថា ខ្ញុំត្រូវតែធ្វើឲ្យវាកើតឡើង ។ ខ្ញុំបានចាប់ផ្តើមរៀបចំសម្រាប់ការប្រឡងនោះ ។ ខ្ញុំបានសិក្សា អាន ហើយរំឭកមេរៀន ប៉ុន្តែនៅក្នុងការប្រឡងសាកល្បង ខ្ញុំនៅតែមិនទទួលបានពិន្ទុដែលខ្ញុំចង់បានដដែល ។ ខ្ញុំបានអធិស្ឋានទៅកាន់ព្រះវរបិតាសួគ៌ ហើយទូលសូមទ្រង់ឲ្យមានប្រាជ្ញាវាងវៃ និងដើម្បីឲ្យទ្រង់បំភ្លឺការយល់ដឹងរបស់ខ្ញុំ ដើម្បីខ្ញុំអាចចាប់យកគោលដៅរបស់ខ្ញុំបាន ។ ខ្ញុំបានអធិស្ឋានទូលសូមអ្វីៗទាំងនេះរៀងរាល់ថ្ងៃ អស់រយៈពេលមួយឆ្នាំពេញ ។ ខ្ញុំបានទៅរៀនថ្នាក់រៀបចំពិសេសនៅសាលារៀនរបស់ខ្ញុំ ហើយខ្ញុំចុះឈ្មោះចូលរៀននៅក្នុងថ្នាក់រៀននៅវិទ្យាស្ថាន ដែលតម្រង់ឆ្ពោះទៅរកការរៀបចំសម្រាប់ការប្រឡង។
ខ្ញុំបន្តសិក្សាព្រះគម្ពីរប្រចាំថ្ងៃ ហើយខ្ញុំពុំខកខានទៅរៀនថ្នាក់សិក្ខាសាលារបស់ខ្ញុំឡើយ ។ ខ្ញុំបានបំពេញគ្រប់ការចាត់តាំងបព្វជិតភាពអើរ៉ុនរបស់ខ្ញុំ ហើយពុំបានសិក្សានៅថ្ងៃអាទិត្យទេ ទោះជាមានស្ថានភាពដែលខ្ញុំត្រូវសិក្សាក្តី ។ ខ្ញុំបានដឹងថា ថ្ងៃអាទិត្យគឺជាថ្ងៃរបស់ព្រះអម្ចាស់ ហើយខ្ញុំចង់គោរពថ្ងៃនោះតាមរបៀបមួយដែលឪពុកម្តាយខ្ញុំបានបង្រៀនខ្ញុំ ។ ខ្ញុំបានដឹងថា ខ្ញុំពុំអាចប្រថុយប្រថាននឹងបាត់បង់ពរជ័យពីព្រះវរបិតាសួគ៌សម្រាប់ខ្ញុំបានទេ ជាពិសេសពេលខ្ញុំត្រូវការពរជ័យទាំងនោះខ្លាំងបំផុត ។ ទោះបីខ្ញុំធ្វើកិច្ចការទាំងអស់នេះក្តី ខ្ញុំនៅតែពុំទទួលបានពិន្ទុដែលខ្ញុំចង់បាននៅពេលធ្វើការប្រឡងសាកល្បងរបស់ខ្ញុំដែរ ។
គ្រួសារខ្ញុំ និងខ្ញុំបានអធិស្ឋាន ហើយតមអាហារ ហើយឪពុករបស់ខ្ញុំបានផ្តល់ការប្រសិទ្ធពរមួយឲ្យខ្ញុំ ។ ជាមួយនឹងការរៀបចំខាងវិញ្ញាណនេះ និងការរៀបចំផ្សេងៗទៀតរបស់ខ្ញុំ នោះខ្ញុំបានទៅប្រឡង ។ ខ្ញុំពុំគ្រាន់តែទទួលបានពិន្ទុដែលខ្ញុំចង់បាននោះទេ ខ្ញុំបានសម្រេចលើសគោលដៅរបស់ខ្ញុំទៀត ពិន្ទុមួយបានមធ្យមភាគខ្ពស់បំផុតនៅក្នុងផ្នែកគណិតវិទ្យា ។ ខ្ញុំបានទទួលអាហាររូបករណ៍ និងអត្ថប្រយោជន៍ដែលខ្ញុំត្រូវការ ហើយខ្ញុំអាចសិក្សានៅសាកលវិទ្យាល័យដែលខ្ញុំបានជ្រើសរើស ។
កាលខ្ញុំនៅក្មេង ខ្ញុំបានរៀនថា ប្រសិនបើខ្ញុំបានធ្វើអ្វីៗគ្រប់យ៉ាងដែលខ្ញុំអាចធ្វើបាន ហើយថែទាំការទទួលខុសត្រូវខាងវិញ្ញាណរបស់ខ្ញុំជាមុន នោះព្រះវរបិតាសួគ៌នឹងប្រទានពរដល់ខ្ញុំ ។ រឿងនានាពុំតែងតែដំណើរការតាមរបៀបដែលយើងរំពឹងទុកឲ្យវាកើតឡើងនោះទេ ប៉ុន្តែព្រះនឹងមើលថែយើង ។ ខ្ញុំដឹងថា មានតែជំនួយរបស់ទ្រង់តែប៉ុណ្ណោះ ទើបកិច្ចការគ្រប់យ៉ាងអាចដំណើរការបាន ។