តើយើងអាចគាំទ្រថ្នាក់ដឹកនាំរបស់យើងតាមរបៀបណា ?
នៅអំឡុងពេលដ៏ក្រៀមក្រំបន្ទាប់ពីភ្លើងឆេះព្រៃ ដែលបានបំផ្លិចបំផ្លាញភូមិទាំងមូលនៅក្នុងឃុំសូណូម៉ានៃរដ្ឋកាលីហ្វ័រញ៉ានៅខែតុលា ឆ្នាំ ២០១៧ នោះអែលឌើរ រ៉ូណល អេ រ៉ាសបាន ក្នុងកូរ៉ុមនៃពួកសាវកដប់ពីរនាក់ បានធ្វើដំណើរទៅសហគមន៍ដែលបានរងគ្រោះនោះ ដើម្បីសួរសុខទុក្ខពួកបរិសុទ្ធថ្ងៃចុងក្រោយ ។
លោកបានទៅធ្វើបេសកកម្មនៃការផ្តល់ការងារបម្រើ ។ លោក និងស៊ីស្ទើរ ម៉េឡានី រ៉ាសបាន បានលួងលោមសមាជិកដែលរងគ្រោះដោយសារភ្លើងឆេះនោះ នៅក្នុងសាលាជំនុំរបស់ពួកគេ និងនៅគែមផ្ទះដែលឆេះហើយរបស់ពួកគេ ។
ហើយនៅទីណាដែលលោកបានទៅ នោះសមាជិកបានមកចាប់ដៃលោក ។ វាគឺជាកាយវិការនៃអំណរគុណ ។ ពួកគេបានថ្លែងអំណរគុណសាវកចំពោះការគាំទ្ររបស់លោក ។ ប៉ុន្តែគ្រប់ការចាប់រលាក់ដៃនីមួយៗបានបង្ហាញពីសារលិខិតដូចគ្នាថា ៖ « ខ្ញុំគាំទ្រលោក » ។
ការអនុវត្តនៃសេចក្ដីជំនឿ
អែលឌើរ ហ្គែរី អ៊ី ស្ទីវ៉ែនសុន មានប្រសាសន៍ថា ការគាំទ្រគឺជាទង្វើពិសិដ្ឋមួយដែលភ្ជាប់សមាជិកភាពរបស់សាសនាចក្រទៅនឹងថ្នាក់ដឹកនាំសាសនាចក្រ ។ ប្រធាន អិម រ័សុល បាឡឺដ ប្រធានស្តីទីនៃកូរ៉ុមនៃពួកសាវកដប់ពីរនាក់មានប្រសាសន៍ថា ជាមួយនឹងសមាជិកជាង ១៦ លាននាក់នៃសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ នោះសមាជិកសាសនាចក្រមួយចំនួននឹងធ្លាប់សំណេះសំណាលផ្ទាល់ជាមួយសាវក ឬចាប់ដៃរបស់លោក ។ ប៉ុន្តែសមាជិកគ្រប់រូបមានឱកាសធ្វើឲ្យមានទំនាក់ទំនងផ្ទាល់ខ្លួនជាមួយថ្នាក់ដឹកនាំសាសនាចក្រទាំងនេះ និងថ្នាក់ដឹកនាំដទៃទៀត តាមរយៈការគាំទ្រជាផ្លូវការ និងទង្វើនៃការគាំទ្រប្រចាំថ្ងៃរបស់ពួកគេ ។
អែលឌើរ ជែរីត ដ័បុលយូ ហ្កង មានប្រសាសន៍ថា « យើងគាំទ្រដោយលើកដៃរបស់យើង ប៉ុន្តែក៏គាំទ្រតាមរយៈចិត្ត និងទង្វើរបស់យើងផងដែរ » ។ « យើងគាំទ្រថ្នាក់ដឹកនាំសាសនាចក្រនៅក្នុងរបៀបដូចគ្នាដែលគាំទ្រគ្នាទៅវិញទៅមក ។ យើងដឹងថាយើងជាប់នៅក្នុងសេចក្តីសញ្ញា » ។
អែលឌើរ អូលីសេស សូរ៉េស បានមានប្រសាសន៍ថា ការអធិស្ឋានសម្រាប់ពួកសាវកនៅតែជាធាតុដ៏ពុំអាចកាត់ថ្លៃបាននៃការគាំទ្រ ។ អែលឌើរសូរ៉េសបន្ថែមថា « យើងជាមនុស្សសាមញ្ញ ហើយព្រះអម្ចាស់បានហៅពួកយើងទៅកាន់អ្វីមួយដែលខ្ពស់ជាងសមត្ថភាពរបស់យើង ។ ប៉ុន្តែយើងមានអារម្មណ៍ថា យើងអាចឈោងទៅដល់សមត្ថភាពនោះ ដោយសារមនុស្សដែលកំពុងអធិស្ឋានសម្រាប់យើង » ។
សេចក្តីជំនឿនាំមុខ បន្ទាប់មកការគាំទ្រ ។ អែលឌើរ ជែហ្វ្រី អ័រ ហូឡិន មានប្រសាសន៍ថា « តាមរយៈការគាំទ្រពួកសាវក អ្នកកំពុងជួយព្រះអង្គសង្គ្រោះសម្រេចកិច្ចការរបស់ទ្រង់ ។ សេចក្ដីជំនឿរបស់អ្នកជួយព្រះអម្ចាស់សម្រេចនូវអ្វី ដែលទ្រង់ទាក់ទងតាមរយៈព្យាការី និងអ្នកទទួលវិវរណៈរបស់ទ្រង់ ។
ខ្ញុំស្រឡាញ់ការលើកដៃជាកែង និងអត្ថន័យនៅក្នុងការលើកដៃនោះ » ។ លោកបន្ថែមថា សម្រាប់ពួកសាវក ការគាំទ្រពីសមាជិកសាសនាចក្រគឺស្រដៀងទៅនឹងការទទួលអាហារខាងវិញ្ញាណដែលធ្វើឲ្យមានជីវិតរស់ ។ « គ្រប់សំឡេងចាត់ទុកថាមានតម្លៃ គ្រប់ជំនួយត្រូវបានអនុញ្ញាតទទួលយក ។ គ្មាននរណាម្នាក់ត្រូវបម្រើតែម្នាក់ឯងនៅក្នុងសាសនាចក្រនោះទេ ទោះជាការហៅបម្រើរបស់យើងជាអ្វីក៏ដោយ » ។
ប្រពៃណីគាំទ្រដ៏យូរអង្វែរ
ការគាំទ្រពួកសាវកគឺជាប្រពៃណីថ្ងៃចុងក្រោយមួយ ដែលធ្វើឡើងតាំងពីការការស្ដារឡើងវិញនៃដំណឹងល្អរបស់ព្រះយេស៊ូវគ្រីស្ទ ។ ចាប់តាំងពីថ្ងៃដំបូងមក ពួកបរិសុទ្ធនៅជំនាន់ដើមត្រូវបានអញ្ជើញឲ្យយល់ព្រមជាឯកច្ឆ័ន ចំពោះការហៅបម្រើរបស់ថ្នាក់ដឹកនាំសាសនាចក្រ ហើយគាំទ្រពួកលោកនៅក្នុងការហៅបម្រើនោះ ។
ថ្ងៃទី ៦ ខែ មេសា ឆ្នាំ ១៨៣០ យ៉ូសែប ស៊្មីធ និងអ្នកដើរតាមលោកដែលទើបតែជ្រមុជទឹក បានជួបជុំគ្នានៅក្នុងផ្ទះកសិដ្ឋានតូចមួយដែលជាកម្មសិទ្ធិរបស់ ពេត្រុស វីតមើរ ស៊ីញ័រ នៅទីក្រុងហ្វាយ៉េត ឃុំសេនេកា រដ្ឋ នូវ យ៉ោក ។
យ៉ូសែប ស៊្មីធ បានឈរ ហើយសួរអ្នកដែលចូលរួមនោះ ប្រសិនបើពួកគេមានបំណងរៀបចំសាសនាចក្រនៃព្រះយេស៊ូវគ្រីស្ទនៃពួកបរិសុទ្ធថ្ងៃចុងក្រោយ ។
ដោយអនុវត្តនូវគោលការណ៍នៃការយល់ព្រមជាទូទៅ នោះសមាជិកថ្មីបានលើកដៃរបស់ពួកគេ ហើយបានយល់ព្រមគ្នាតាមរយៈការបោះឆ្នោតគាំទ្រជាឯកច្ឆ័ន ។ បន្ទាប់មក ពួកគេបានយល់ព្រមទទួលយក យ៉ូសែប ស៊្មីធ និង អូលីវើរ ខៅឌើរី ថាជាគ្រូបង្រៀន និងអ្នកប្រឹក្សាខាងវិញ្ញាណរបស់ពួកគេ ។
អែលឌើរហូឡិនមានប្រសាសន៍ថា « សមាជិកភាពនៅក្នុងសាសនាចក្រគឺជាបញ្ហាផ្ទាល់ខ្លួនមួយ ។ បុគ្គលគ្រប់រូបមានតម្លៃ ។ នោះជាហេតុផលដែលយើងដំណើរការតាមរយៈគោលការណ៍នៃការយល់ព្រមជាទូទៅ ។ យើងចង់ឲ្យមនុស្សគ្រប់រូបមានយោបល់ បង្ហាញយោបល់ពួកគេ ហើយរួបរួមនៅក្នុងដំណើរឆ្ពោះទៅមុខ » ។
ទង្វើដែលលើកស្ទួយពួកយើងទាំងអស់គ្នា
អែលឌើរ ឌេល ជី រេនឡាន់ មានប្រសាសន៍ថា នៅពេលទទួលយកការហៅបម្រើទៅក្នុងភាពជាសាវក នោះសមាជិកក្នុងកូរ៉ុមនៃពួកសាវកដប់ពីរនាក់ « ត្រូវបានបង្ខំ » ឲ្យធ្វើតាមព្រះទ័យរបស់ព្រះអម្ចាស់ ។ តាមរយៈការជ្រើសរើសគាំទ្រពួកដប់ពីរនាក់ នោះសមាជិកបង្ហាញទំនុកចិត្តរបស់ពួកគេលើការប្តេជ្ញាចិត្តរបស់ពួកសាវកគ្រប់រូបក្នុងការគោរពប្រតិបត្តិចំពោះព្រះអង្គសង្គ្រោះ ។
អែលឌើរ ឃ្វីនថិន អិល ឃុក មានប្រសាសន៍ថា ពួកបរិសុទ្ធថ្ងៃចុងក្រោយដែលបោះឆ្នោតគាំទ្រដល់សាវកម្នាក់ៗគឺគាំទ្រកូរ៉ុមទាំងមូលក្នុងពេលដំណាលគ្នានោះដែរ ។
អែលឌើរឃុកបន្ថែមទៀតថា ការបោះឆ្នោតគាំទ្រពិសិដ្ឋនោះលើកស្ទួយ និងផ្តល់ពរដល់ពួកសាវក—ប៉ុន្តែវាក៏លើកស្ទួយដល់អ្នកគាំទ្រផងដែរ ។ « វាផ្តល់អំណាចដល់ពួកគេ ហើយផ្តល់ពរដល់ពួកគេ និងផ្តល់ការណែនាំដល់ពួកគេ » ។
នេះមានន័យថា ដូចសមាជិកដែលរងគ្រោះយ៉ាងខ្លាំងដោយសារភ្លើងឆេះព្រៃ សាន់តា រ៉ូសា បានផ្តល់ការគាំទ្រចំពោះអែលឌើររ៉ាសបានដែរ នោះសមាជិកនៅទូទាំងពិភពលោកអាចត្រូវបានលើកស្ទួយ សូម្បីតែនៅពេលពួកគេគាំទ្រដល់សមាជិកគ្រប់រូបនៃពួកដប់ពីរនាក់ ។