Ngaahi Fakakaukau ki he Efiafi Fakafāmili ʻi ʻApí
ʻOku ʻi he makasini ko ʻení ha ngaahi fakamatala mo e ngaahi ʻekitivitī ʻe lava ke fakaʻaongaʻi ʻi he efiafi fakafāmili ʻi ʻapí. Ko ha sīpinga ʻeni ʻe ua.
“Te u Mate Nai?” peesi 12: ʻOku mahuʻinga ki heʻetau fakalakalaka taʻengatá, ke tau maʻu ha mahino ki he palani ʻo e fakamoʻuí. Te ke lava ʻo ako ki he palaní ʻi haʻo lau ʻa e ngaahi potu folofola hangē ko e 2 Nīfai 2:22–25; 9:10–11; ʻAlamā 34:32–33; 40:11–14; 42:5–15; pe Tokāteline mo e Ngaahi Fuakava 76:30–113. Te ke lava ʻo tā ha kiʻi fakatātā ʻaki haʻamou taufetongi hono tā e konga takitaha ʻo e palani ʻo e fakamoʻuí mo ʻene felāveʻi mo e potu folofola takitaha (vakai ki he peesi 61 ʻo e Malangaʻaki ʻEku Ongoongoleleí ki ha sīpinga ʻo e fakatātaá). Mahalo te mou fie ʻahiʻahi feakoʻiʻaki e ngaahi tefitoʻi moʻoní ke mou lava ʻo fakamatalaʻi e palani ʻo e fakamoʻuí ki ha taha ʻoku ʻi ai haʻane ngaahi fehuʻi kau ki ai.
“Kumi, ʻAve, Akoʻi: Kau ki he Tukupā Fakatemipalé,” peesi 54: Kuó ke tali e tukupaá? Kuo hanga ʻe he Kau ʻAposetolo ʻa e ʻEikí ʻo fakaafeʻi kotoa kitautolu ke tau “teuteu ki he lahi tahá, ha ngaahi hingoa ki he papitaiso ʻoku mou fai he temipalé, pea tokoniʻi ha taha ke ne fai e meʻa tatau pē,” pea te mou lava ʻo fai fakafāmili ia! Ke ʻilo lahi ange ki he tukupaá, vakai ki he templechallenge.lds.org pea ʻiloʻi ai ha fanga kiʻi tokoni ki he hisitōlia fakafāmilí. Te mou lava ʻo fakaʻaongaʻi ha ngaahi efiafi fakafāmili he kahaʻú ke teuteuʻi ai ha ngaahi hingoa ki he temipalé pea akoʻi ha kaungāmeʻa ki he founga hono fai ʻenau hisitōlia fakafāmilí.