Toʻu Tupu
Ko e Lotua ha Nongá
ʻOku nofo ʻa e tokotaha naʻá ne faʻú ʻi ʻAlesona, USA.
Naʻe faʻa kau atu ʻeku ongomātuʻá ki ha ngaahi fakataha he tuku ʻa e lotú, pea ne u faʻa tokoni ki hono tokangaʻi hoku fanga kiʻi tehiná mo ʻai ʻemau meʻatokoni hoʻataá—neongo ne nau faʻa ʻiteʻita mo fiekaia. Ko e taimi ʻoku nau faʻa kē aí, ʻoku ou lava pē ke fakaleleiʻi leva e kiʻi palopalemá. Ka ʻoku faingataʻa he taimi ʻe niʻihi ke u fai ha fakalelei hili e kamata ʻa e keé he ʻoku faʻa fakatupuʻita kiate au.
ʻI he hoʻatā ʻe taha, naʻe faingataʻa ke vālelei ai hoku ngaahi tuongaʻane īkí. Ne u ʻilo naʻe hoko ʻeku feinga ke fai ha fakaleleí, ke toe kovi ange ai e meʻa ne hokó he naʻá ku ʻita. Ko ia ne u ngaohi pē ʻeku meʻatokoni hoʻataá pea ʻikai ke u toe lea ki ha taha. Faifai peá u talaange, “Te u ʻalu ʻo lotu. ʻE lava ke tau kiʻi fakalongolongo ʻi ha kiʻi miniti siʻi?” Ko ʻenau fiemālié pē, ne u kole ange leva ke tāpuakiʻi ʻa e meʻakaí. Kimuʻa peá u fakaʻosi e lotú, ne u tānaki ange, “Pea tokoni mai muʻa ke mau hoko ko ha kau faʻa fakalelei.”
Ne hangē ia ne ʻikai ke nau ongoʻi ʻeku leá he kamataʻangá, he naʻe kamata ke nau toe kē. Ne u ongoʻi matalili ka ne u ʻiloʻi naʻe fie maʻu ke u angaʻofa mo fiemālie he ne u toki lotua ke u maʻu ha nonga. Hili ha kiʻi taimi siʻi, ne u ongoʻi fiemālie. Ne u kai fakalongolongo pē pea tuku leva mo e kē e tamaiki tangatá. Ne u fakatokangaʻi ko e nonga ne u ongoʻí, ko e tali ia ki ha kiʻi lotu faingofua. Ne u lotua ke hoko ko ha taha faʻa fakelelei, pea naʻe tokoni mai ʻeku Tamai Hēvaní ke u maʻu ha nonga he taimi ne ʻahiʻahiʻi ai au ke u kaikailá. ʻOku ou ʻiloʻi te Ne lava ʻo ʻomi moʻoni ha nonga.