Ngaahi Fakatātā ʻo e Tuí
Adriana González
Central Department, Paraguay
ʻI heʻeku ʻeke ko ia kia ʻAteliana fekauʻaki mo e tēpile lanu pulū maama ʻi hono peitó, ne u ʻilo ai naʻe ʻi ai ha taimi ʻe taha naʻe ʻikai haʻane tēpile. ʻI heʻene faifeinga ke feau ʻene ngaahi fie maʻú, naʻá ne toʻo leva ha ngaahi kalasi moʻui fakafalala pē kiate kita ʻa e Siasí peá ne fakakaukau te ne lava ʻo taʻo mo fakatau atu ha mā—kapau pē naʻe ʻi ai haʻane tēpile. Na‘a ne lotua ha tokoni peá ne faʻu leva ha tēpile mei ha toetoenga fefie.
Cody Bell, tokotaha faitaa
Ko e taha ‘o e ngaahi me’a naʻá ku fie ma’u lahi taha ‘i he momeniti ko iá ko ha tēpile. Ne maumau e tēpile naʻá ku maʻú. Ne ʻomi ʻe ha tokotaha ha kongokongaʻi ʻakau koeʻuhí naʻá ne ʻiloʻi ʻoku ʻikai haʻaku paʻanga, ka naʻe ʻi ai ʻeku fanga kiʻi moa pea mahalo pē naʻa fakaʻaongaʻi ia ke faʻu ʻaki ha fale moa. Naʻá ku lotu ke ʻIloʻi ʻa e meʻa ke faí. Na‘a ku ongoʻi ‘oku totonu ke u fetuʻutaki ki heʻeku kaungāme’a ko ha tangata tufunga pea sio pe ko e hā te ma lava ʻo faí. Na‘á ne pehē, “Ta faʻu haʻo tēpile.” Ko e me‘a ia naʻá ku fie maʻú.
Naʻa Ne fanongo kiate au, ʻi he meʻa kotoa pē naʻá ku kole mei hoku lotó. Kuó Ne fanongo kiate au koeʻuhí he na‘á Ne ʻafioʻi naʻe lelei ia kiate au. ʻOku ua ʻemau tēpilé he taimí ni. ʻOku mahuʻinga e tēpile ko ʻení ki homau fāmilí. ʻOku mau tangutu heni ke fevahevaheʻaki. ʻOku mau ngāue ʻi heni. ʻOku mau akoʻi ʻi heni ki he niʻihi kehé ʻa e meʻa kuo mau akó. Ne u ako ʻo fakafou ʻi he moʻui fakafalala pē kiate kitá ke u fakamahuʻingaʻi au. Naʻá ku ʻiloʻi ai ha ngaahi talēniti kuo foaki mai ʻe he ʻOtuá ke tokoniʻi au mo hoku fāmilí. ‘Oku ou feinga ke vahevahe ʻa e meʻa kuó u akó pea mo hoku ngaahi tokoua ʻi he Fineʻofá, ke tokoniʻi kinautolu ke nau mahuʻingaʻia ʻiate kinautolu ko e ngaahi ʻofefine ʻo e ʻOtuá. ‘Oku ou houngaʻia koeʻuhí ʻoku ou lava ke faitāpuekina e ni‘ihi ʻoku mau feohí.
ʻOkú te ongoʻi fiefia ʻi he taimi ʻokú te ʻilo ai ʻa e meʻa kotoa kuo foaki atu ʻe he ʻOtuá peá te fakaʻaongaʻi leva ia ke tokoniʻi ʻa e niʻihi kehé. ʻOku fie maʻu ke tau fakatupulaki e talēniti kotoa pē ʻoku tau maʻú kae lava ke tau vahevahe ia mo e niʻihi kehé.
ʻOku kamata pongipongia e ʻaho ʻa ʻAtelianá ʻi heʻene teuteuʻi e mahoaʻa ki he mā te ne taʻo mo fakatau atú. ʻOku hoko ʻa e tēpile kai ʻi peitó ko ha feituʻu fakatahaʻanga ia ki he fāmili Konisālesí ʻi he ʻahó kakato.
Ko hono fafanga ‘o e fanga moá ko ha konga ia ’o e kiʻi pisinisi ʻa ‘Atelianá. ‘Oku hoko ʻa e fua‘imoa ʻoku nau ʻomí ko ha konga mahu’inga ia ki he mʻea ʻoku taʻo ʻaki ʻene maá.
Na‘e tokoni ʻa e ngaahi fo‘i mā ne fakatau atu ʻe ʻAtelianá ke nau toe moʻui fakafalala ange pē kiate kinautolu ʻi he lahi ange e paʻanga hū mai fakafāmilí. ʻOkú ne tuku makehe maʻu pē ha ngaahi foʻi mā ke vahevahe mo hono fāmilí.
ʻOku tufaki atu ʻe ʻAteliana ha ngaahi foʻi mā foʻou ki hono kaungāʻapí.