Pisikal ug Emosyonal nga Kahimsog

Alang sa pipila sa mga kabatan-onan, ang pakyas nga paggamit sa mga baruganan sa pisikal nga kahimsog mahimong dako nga babag sa pagpakighigala ug sa pagpalambo og pagsalig sa kaugalingon. Dugang pa, ang pisikal ug emosyonal nga kahimsog kritikal apan sa kasagaran wala kaayo mapalambo nga aspeto sa pag-andam og misyon. Sa mga pahina 52–53 niini nga isyu, si Elder Adrián Ochoa sa Seventy naghisgot kon sa unsang paagi nga ang pag-atiman sa atong lawas makapanalipod sa pisikal ug emosyonal nga kahimsog. Siya nagpahinumdom kanato nga mag-ehersisyo ug magsunod sa Pulong sa Kaalam (tan-awa sa D&P 89) aron kita mahimong mas himsog ug mas malipayon. Samtang nagtabang kamo sa inyong mga anak nga makakat-on ug maggamit sa mga baruganan sa pisikal ug emosyonal nga kahimsog, sila mas makabaton og pagsalig sa kaugalingon ug maandam sa umaabut nga pagserbisyo.

Sama sa giingon ni Elder Ochoa: “Ang pag-atiman sa inyong lawas makapanalangin usab sa inyong hunahuna ug makatabang ninyo nga mahinumdom nga kamo anak sa Dios ug mahimong masaligon ug malipayon. Ang atong emosyonal, pisikal ug espiritwal nga mga aspeto sumpay ang tanan.”

Mga Sugyot sa Pagtudlo sa mga Batan-on

Basaha og dungan ang artikulo ni Elder Ochoa ug paghimo og plano nga mag-ehersisyo ang pamilya nga adunay piho, makab-ut nga mga tumong sa kahimsog.
Uban sa inyong batan-ong mga anak, basaha ang seksyon sa pisikal ug emosyonal nga kahimsog sa Alang sa Kalig-on sa mga Kabatan-onan (mga pahina 25–27). Hisguti kon unsa ang kahulugan nga mahimong himsog sa emosyonal nga paagi.
Kantaha og dungan ang “Though Deepening Trials” (Hymns, nu. 122) ug hisguti kon unsa ang gitudlo sa pagkabanhaw ngari kanato kabahin sa kaimportante sa atong pisikal nga lawas.
Tun-i ang mga kasulatan nga gilista dinhi sa artikulo ug hisguti kon unsay gitudlo niini mahitungod sa pisikal ug emosyonal nga kahimsog.

Mga Sugyot sa Pagtudlo sa mga Bata

Pagpakita og litrato sa templo sa inyong anak. Hisguti kon unsa ang kahulugan sa dihang si Apostol Pablo nagtudlo nga ang atong mga lawas “templo sa Espiritu Santo” (1 Mga Taga-Corinto 6:19) ug sa unsang paagi makatabang kana nato sa pag-atiman sa atong lawas ug hunahuna.
Paghimo og lista sa maayong mga kalingawan nga gustong buhaton sa inyong anak isip pamilya. Dayon planohi kon sa unsang paagi kining mga kalihokan mahimong kabahin sa kinabuhi sa pamilya.
Paghisgot og mga paagi aron makasabut ug makadumala sa mga emosyon, lakip na ang kasuko o kaguol. Kantaha ang “If You’re Happy [Kon Ikaw Malipayon]” (Children’s Songbook, 266), “I’m Trying to Be Like Jesus [Maninguha Kong Mahimong Mahisama Kang Jesus]” (Children’s Songbook, 78), o uban pang kanta kabahin sa emosyon ug pagpili sa husto.

Paghulagway pinaagi ni Taia Morley