Pahiyum lang ug Balibad
Ang tagsulat nagpuyo sa Metro Manila, Philippines.
Nakabalibad na ko og mga tanyag sa pag-inom, apan karon ang presidente sa kompaniya mitanyag nako og usa ka baso sa bino.
Paghulagway pinaagi ni Sudi McCollan
Usa ka ting-init, miapil ko sa usa ka internship sa usa ka isla sa Bicol, Philippines. Nindot kaayo tan-awon ang kadagatan, ug ako nagpaabut niini matag buntag.
Bisan pa niana, mahadlok kong mogabii na. Mao kana ang panahon nga ang mga tawo magsugod sa pag-inom ug mag-party. Ang mga imbitasyon sa mao nga mga party daghan, ug ang akong isigka intern ug ako kinahanglang motambong, tungod kay kon dili motambong kini nagpasabut sa walay pagtahud.
Sa unang party mao ang welcome party sa bag-ong mga intern. Nahadlok ko nga motambong, tungod kay ako sigurado nga sila motanyag namo og ilimnon ug dili ko sigurado kon unsaon sa pagbalibad. Gitawagan nako ang usa ka higala sa akong home ward, ug mihatag siya nako og talagsaong tambag nga nakapalig-on sa akong pagsalig.
Sa dihang nagsugod ang party, mitanyag sila namo og mainom apan, maayo na lang, wala sila mamugos namo nga moinom. Tungod kay akong isigka intern midawat sa akong baruganan nga dili moinom, ang pagdumili sa sunod nga mga tanyag sa pag-inom sayon na lang nako—hangtud sa usa ka gabii. Atol sa usa sa mga party, miabut ang presidente sa kompaniya. Nagdala siya og botelya sa lambanog (usa ka lokal nga bino hinimo gikan sa lubi). Sa wala madugay human sa iyang pag-abut, nakita nako siya nga nag-ipis og bino. Dayon miingon siya, “Kamo kinahanglang makat-on unsaon sa pag-inom” ug mihatag sa baso sa usa sa mga intern. Giinom dayon niya kini.
Nagsugod sa pagkuba ang akong dughan. Sa dili madugay turno na nako. Hilom akong naghunghong sa kaugalingon, “ako dili moinom. Ako dili moinom.” Dayon akong nakita ang presidente nga mitunol sa baso sa bino kanako.Wala ko masayud unsay buhaton. Akong isigka intern nagtan-aw nako, naghulat unsay akong buhaton. Mipahiyom ko sa presidente ug miingon, “Pasaylo, sir, apan dili ko moinom.”
Nasayud ko nga wala siya malipay. Nangutana siya kon nganong dili ko moinom. Miingon ko, “Usa ko ka Mormon.”
Miingon siya, “wala ko makadungog niana nga relihiyon. Morag usa na ka matang sa pagkaon.” Ang tanan nangatawa.
Mipahiyom usab ko, dili tungod sa iyang komedya, apan tungod kay ako nasayud nga akong gibuhat mao ang sakto nga butang.
Wala nay usa ang mitanyag nako og mainom pag-usab. Apan sa gihapon ang pagbiay-biay wala mohunong, bisan sa akong kaugalingon nga mga higala. Miingon gani ang usa nga ako namakak ug nga dili katoohan nga ang mga miyembro sa Simbahan dili moinom. Niining higayona akong gibati ang mga kalisdanan nga moabut sa mga miyembro sa Simbahan.
Ang akong pag-istar niana nga isla nagtudlo nako og daghang mga leksyon, dili lang akademya apan sa espirituhanong paagi. Akong nakat-unan nga ang pagbiay-biay tingali dili mohunong, apan ang Espiritu sa Ginoo kanunay mogiya ninyo sa pagbuhat unsay matarung.