Notebook sa Komperensya sa Oktubre
Mga Ideya sa Kinatibuk-ang Komperensya
Ang tagsulat nagpuyo sa Washington, USA.
“Tag-ana Kon Kinsa ang Bisita sa Panihapon?”
Kinse ka adlaw sa dili pa magsugod ang matag kinatibuk-ang komperensya, ibitay sa among pamilya ang among timailhan nga nagsugod sa “Tag-ana Kon Kinsa ang Bisita sa Panihapon?” Dayon idugang namo ang pinakabag-ong litrato sa atong mga propeta, manalagna, ug tigpadayag gikan sa edisyon sa magasin sa miaging komperensya sa Simbahan.
Ako nag-andam pinaagi sa pagsiksik sa propeta nga among i-welcome nianang gabhiona. Usahay mangita ko og mga butang diha sa balay nga nagrepresentar sa pipila ka mga butang nga akong nasayran, ug ibutang kini sa plato. Atol sa panihapon, samtang ako mosulti sa mga istorya mahitungod sa matag butang, ang tanan mosulay sa pagtag-an kon kinsa siya. Usahay, mosaysay ko og usa o duha ka istorya nga gipakigbahin sa propeta sa miaging kinatibuk-ang komperensya.
Ako nahingangha sa mga butang nga mahinumduman sa akong mga anak mahitungod sa atong hinigugmang mga propeta ug mga apostoles, ug ako nasayud nga kining yano nga dula nakadugang sa akong gugma ug kahibalo niining talagsaong mga tawo.
Ang Akong Kaugalingong Kopya sa Komperensya
Sa dihang si Elder Neil L. Andersen sa Korum sa Napulog Duha ka mga Apostoles ug ang iyang asawa, si Kathy, mibisita sa among komperensya sa stake, si Sister Andersen mipakigbahin og istorya kanamo. Siya miingon nga sa dihang sila nagpuyo sa France, iyang pakopyahan ang mga pakigpulong sa komperensya alang sa matag usa sa ilang mga anak—bisan sa iyang gagmayng mga anak. Siya natingala sa dihang iyang nasayran ang iyang mabayran sa pagpakopya, mahal kaayo. Dayon nakahunahuna siya: “Unsay bili para kanimo nga maangkon ang mga pulong sa propeta sa imong pamilya?”
Kini nga istorya nakatandog gyud kanako, ug akong gisiguro nga ang matag usa sa among pamilya adunay iyang kaugalingon nga kopya sa mga pakigpulong sa komperensya. Naghinam-hinam og maayo ang among mga anak nga babaye. Amo kining gamiton sa family home evening ug panahon sa pagtuon sa kasulatan. Ganahan ko nga magtan-aw sa usa sa anak nga babaye nga siya mismo magbasa sa mga pakigpulong ug magmarka niini gamit ang highlighter. Laing anak nga babaye, bag-ohay lang nga nabunyagan, mihangyo kanako sa pagbasa sa pakigpulong uban lang niya.
Hagit sa Komperensya
Lakip sa akong leksyon sa Relief Society, akong gihagit ang matag sister sa pagribyu sa mga pakigpulong sa miaging komperensya; pipila sa mga sister gibasa og usab ang mga pakigpulong, ang uban gitan-aw kini sa internet. Pipila sa mga sister mipahayag sa ilang gibati nga mas maandam sila alang sa umaabut nga komperensya.
Paghulagway sa litrato pinaagi sa Carlos Israel Gutiérrez Robles