Pagpadali sa Buhatsa Kaluwasan
Samtang kita moimbitar, mohigugma, ug moserbisyo sa uban, mahimo kitang tinuod nga disipulo ni Jesukristo ug sa pagtabang sa pagpadali sa buhat sa kaluwasan.
Bisan og dunay kadasig mahitungod sa full-time nga mga misyonaryo nga magtrabaho pinaagi sa internet ug pag-tour sa mga meetinghouse, kana nga mga kausaban gamay lamang nga bahin sa dakong buhat sa kaluwasan. Mas importante nga sa unsang paagi kita isip mga miyembro mohaum ngadto sa mas dako nga bahin sa pagpadali sa buhat sa kaluwasan. Wala kita hangyoa sa pag-apil sa usa ka bag-ong programa. Yano kitang gidasig nga mahimong tinuod nga disipulo ni Jesukristo. Ang atong tahas mao ang pagpahinungod sa atong kaugalingon sa paghigugma ug pagserbisyo niadtong anaa sa atong palibut—paghupay sa usa ka kauban sa trabaho nga nanginahanglan, pagdapit sa atong mga higala sa usa ka bunyag, pagtabang sa usa ka tigulang nga silingan sa iyang buluhaton sa nataran, pagdapit og dili kaayo aktibo nga miyembro nga mangaon, o pagtabang sa usa ka silingan sa iyang family history. Natural ra kining tanan, malipayong mga paagi sa pagdapit sa dili kaayo aktibo nga mga miyembro ug kadtong dili sa atong tinuohan ngadto sa atong mga kinabuhi ug sa ingon ngadto sa kahayag sa ebanghelyo. Ang pagpakigbahin uban kanila sa makalingaw ug sagradong mga panahon sa atong kinabuhi tingali mao ang labing epektibo nga paagi ni bisan kinsa nato nga “maghago sa ubasan [ni Jesukristo] alang sa kaluwasan sa mga kalag sa mga lalaki [ug babaye]” (D&P 138: 56).
Unsa ang Buhat sa Kaluwasan?
Ang buhat sa kaluwasan mao ang buhat sa Langitnong Amahan “sa pagpahinabo sa pagka-imortal ug kinabuhi nga dayon sa tawo” (Moises 1:39). Kining importante nga buhat naglakip sa misyonaryong buhat sa miyembro, retensyon sa kinabig, pagpaaktibo sa dili kaayo aktibo nga mga miyembro, buhat sa templo ug family history, ug pagtudlo sa ebanghelyo.1 Sa kasagaran, naghunahuna kita nga kining mga aspeto sa ebanghelyo walay kalabutan. Apan sa Ang Buhat sa Kaluwasan: Sibya sa Tibuok Kalibutan nga Pagpangulo niadtong Hunyo 23, 2013, si Elder Russell M. Nelson sa Korum sa Napulog Duha ka mga Apostoles mitudlo nga “ang buhat dili mabahin-bahin. Kini nga mga paningkamot wala lain-laina; kining tanan kabahin sa buhat sa kaluwasan.”2
Ang pulong “Pagpadali sa Buhat sa Kalulwasan”—ang ngalan sa kaubang website sa sibya (hasteningthework.lds.org)—nagpasabut sa saad sa Ginoo: “Tan-awa, Ako mopadala sa akong buluhaton diha sa iyang angay nga panahon” (D&P 88:73).
Mahinungdanong mga ordinansa sa priesthood—bunyag, kumpirmasyon, ordinasyon sa priesthood alang sa mga tawo, ug mga ordinansa sa templo—mobarug ingon nga mga ilhanan diha sa dalan sa pagbalik ngadto sa atong Langitnong Amahan. Samtang kita moapil sa buhat sa kaluwasan, kita mosunod ug modasig sa uban sa pagsunod niini nga mga dalan sa pakigsaad.
Ang mga Miyembro ug mga Misyonaryo magtinabangay ubos sa mga Yawe sa Priesthood
Ang panahon miabut na ang pag-focus sa sukaranang mga baruganan nga nagpasabut nga ang mga miyembro sa Simbahan sa Ginoo gitawag sa pag-apil sa hingpit sa Iyang buhat sa kaluwasan. Ang mga stake president ug mga bishop naghupot sa yawe sa priesthood sa misyonaryong buhat sa ilang unit sa Simbahan3 ug pagtabang sa mga miyembro nga mobuhat unsay buhaton sa tinuod nga disipulo ni Kristo—ipakigbahin ang kahayag sa ebanghelyo. Mga mission president naghupot sa mga yawe sa priesthood nga makapahimo nila sa pagdumala sa buluhaton sa mga misyonaryo nga ilang gigiyahan.4 Ang full-time nga mga misyonaryo gibansay sa pagtudlo niadtong kinsa andam nga modawat sa ebanghelyo. Sila motabang sa mga miyembro sa misyonaryong buhat, dili vice versa. Ang mga full-time ug mga miyembro magkauban sa pagdala sa ebanghelyo ngadto sa mga kinabuhi niadtong giandam sa Ginoo nga modawat niini.
Atol sa sibya, si President Thomas S. Monson miingon: “Karon ang panahon sa mga miyembro ug sa mga misyonaryo sa paghiusa, sa pag-uban og trabaho, sa paghago sa ubasan sa Ginoo sa pagdala og mga kalag ngadto Kaniya. Siya nag-andam og paagi nato aron ipakigbahin ang ebanghelyo sa daghan kaayong mga paagi, ug Siya motabang nato sa pagtrabaho kon kita molihok pinaagi sa hugot nga pagtuo sa pagtuman sa Iyang buhat”5
Si Elder Neil L. Andersen sa Korum sa Napulog Duha ka mga Apostoles nga namulong mahitungod sa kaimportante sa gugma. Siya miingon, “Magtambayayong kita pinaagi sa pagtuo ug panaghiusa—pagtuo nga ang Ginoo mogiya nato, ug panaghiusa sa usag usa ug sa mga misyonaryo, nadasig tungod sa atong gugma alang Kaniya, sa atong gugma alang usag usa, ug sa atong gugma niadtong atong giserbisyuhan.”6
Ang mga Ward Council Mangulo, Ang mga Ward Mission Leader Mokoordinar
Ubos sa direksyon sa bishop, ang ward council motabang, mosuporta, ug mokoordinar sa mga paningkamot sa mga miyembro sa ward sa pagplano ug paggiya sa buhat sa kaluwasan alang sa ward.7
Isip miyembro sa ward council, ang ward mission leader “mokoordinar sa mga paningkamot sa ward sa pagpangita, pagtudlo, ug sa pagbunyag sa mga investigator. Siya mokoordinar niini nga buhat uban sa buhat sa mga full-time nga misyonaryo.”8
Namulong ngadto sa mga ward mission leader, si Elder Nelson miingon: Tabangi ang [mga misyonaryo] nga mapuno ang ilang appointment books sa makahuluganong mga appointment, aron dili na sila manuktok pa sa pagpangita og katudloan. … [Kamo] ang sumpay tali sa mga misyonaryo, ang ward council, ug ang mga miyembro sa ward.”9
Ang Tinuod nga Sukdanan sa Kalampusan
Isip mga Santos sa Ulahing mga Adlaw napanalanginan kita sa pagpuyo niini nga panahon nga gipadala na sa Ginoo ang Iyang buhat. Tungod kay ang Dios adunay katuyoan sa pagbutang nato dinhi sa yuta niining panahona, kita adunay kapasidad sa pagbuhat og labaw pa kay sa atong mahunahuna nga atong mahimo. Samtang kita motabang pinaagi sa pagkamabination ug paghigugma niadtong nagkinahanglan sa atong pakighigala ug tabang, kita dili mapakyas. Misyonaryo nga mga kalampusan moabut pinaagi sa pagsunod sa inspirasyon nga nagagikan sa atong mga hunahuna ug kasingkasing ug yanong moimbitar sa uban sa atong kinabuhi nga nakasentro sa ebanghelyo. Ang pagdapit mao ang timaan sa kalampusan, dili aron ang mga tawo mabunyagan o mahimong aktibo sa Simbahan. Sama sa gisulti ni Elder Jeffrey R. Holland sa Korum sa Napulog Duha ka mga Apostoles mihisgot sa daghang kasundalohan sa mga misyonaryo karon misulod sa natad sa misyon: ang takna ania nato diin kita moingon, ‘Ania na sila.’ Kitang tanan kinahanglang mogamit niining hinatag sa langit nga kapanguhaan sa labing makaayo nga paagi.”10
Mao kini ang panahon alang nato nga makasabut og mas klaro sa atong tahas sa pagpadali sa buhat sa kaluwasan. Samtang kita mohimo sa misyonaryo nga buhat, retensyon sa kinabig, pagpaaktibo sa dili kaayo aktibo nga mga miyembro, buhat sa templo ug family history, ug pagtudlo sa ebanghelyo sa natural nga bahin sa atong mga kinabuhi, kita makasinati og hingpit nga kalipay ug matugahan og espirituhanong mga gasa nga atong gikinahanglan sa paglig-on sa Simbahan sa ika-21 nga siglo.
Paghulagway sa litrato pinaagi ni David Stoker
Paghulagway sa litrato pinaagi ni John Luke ug Cody Bell