“Unsay akong isulti ngadto sa dili mga miyembro nga mangutana nganong ang ubang mga miyembro sa Simbahan wala magsunod sa atong mga sumbanan?”

Nindot unta kon ang tanang miyembro sa Simbahan hingpit nga magsunod sa ebanghelyo. Dili lang sila makatagamtam og mas daghang mga panalangin sa ilang kinabuhi apan usab mahimong maayo nga mga ehemplo ngadto sa naglibut kanila. Apan mortal kita, mao nga kitang tanan masayop. Ang labing importanting rason nga ang uban mas nagsunod sa hingpit sa ebanghelyo kay sa uban tungod kay kita anaa sa lain-laing mga punto sa atong pagkakabig ug sa kalig-on sa atong mga pagpamatuod. Matag usa nato dunay lain-laing mga pagsulay ug lain-laing mga kapanguhaan ug mga tawo nga motabang nato.

Ang dili mga miyembro tingali dili makasabut sa mga pulong sama sa “pagkakabig” ug “pagpamatuod”, apan sila makasabut nga ang matag tawo makapili kon unsaon sa pagpakabuhi. Mahimo ninyong ipasabut nga gituyo sa Langitnong Amahan niana nga paagi. Mihatag Siya nato sa atong kabubut-on aron kita mahimong motubo sa espirituhanong paagi pinaagi sa pagpili sa matarung. Apan ang Langitnong Amahan usab nasayud nga ang tanan—gawas kang Jesukristo—makahimo og mga sayop, mao nga Siya mihatag og Manluluwas alang kanato. Tungod sa Pag-ula, kita makahinulsol, mapasaylo, makat-on gikan sa atong mga sayop, ug magpadayon sa kinabuhi.

Mahimo usab ninyong ipasabut nga kita dili mohukom niadtong kinsa wala magsunod sa mga sumbanan sa Simbahan. Hinoon, kita maningkamot sa pagtabang nila, sa pagsabut kanila, ug magpailubon ngadto nila. Samtang dili kita modawat og sala, dili nato hukman ang makasasala (tan-awa sa Juan 8:11). Ang paghinulsol posible, alang natong tanan.

Siksika ang mga Kasulatan

Ang tubag sa pangutana makita sa mga kasulatan. Kon ang mga tawo dili mosunod sa mga sugo, kinahanglang likayan nato ang pagkamahukmanon (tan-awa sa Mateo 7:1). Mga Taga-Roma 3:23 nag-ingon, “Sanglit nakasala man ang tanan ug nakabsan sa himaya sa Dios.” Hinoon, tinuod nga ang mga miyembro sa Simbahan kinahanglang maningkamot nga magmasulundon.

Madison M., edad 13, Texas, USA

Itudlo ang mahitungod sa Pag-ula

Kon ang mga tawo moingon og sama niana, kay sa pagpangita og sayop sa mga miyembro kinsa wala magsunod sa mga lagda, gigamit ko kini nga oportunidad sa pagtudlo sa Pag-ula. Mosulti ko nila nga tungod lang kay kita mga Mormons wala kana magpasabut nga kita mga hingpit ug nga kita adunay Pag-ula aron kita makahinulsol sa atong mga sala ug tarungon kadtong mga sayop. Kasagaran kini makapadugang pa og daghang mga pangutana.

Jayde H., edad 16, Oregon, USA

Simbahan Nagtudlo Kanato sa Paghimo og Maayo

Sama sa tanan, ang mga miyembro sa Simbahan makasinati og mga hagit ug mga tintasyon. Kitang tanan adunay mga kahuyang, apan kini wala magpasabut nga kini nga Simbahan dili tinuod. Kini mao ang Simbahan ni Jesukristo, nga nagtabang sa mga tawo nga masayud sa tinuod nga ebanghelyo ug makadawat og kahimayaan. Ang kinaiyanhon nga tawo maoy nagsupak sa mga sugo (tan-awa sa Mosiah 3:19), ug dili kini sayop sa Simbahan. Ang Simbahan nagtudlo nato sa pagbuhat og maayong mga buhat. Apan kitang tanan adunay kapilian.

Lavinia S., edad 19, Bulacan, Philippines

Ang mga Sumbanan alang sa Atong Kalipay

Kini nga pangutana pamilyar nako tungod kay nakaila ko og mga tawo nga nakahimo og mga pagpili nga mipahilayo nila gikan sa ebanghelyo. Ang Ginoo mihatag nato og mga sugo alang sa atong kalipay ug ang “pagpahinabo sa pagka-imortal ug kinabuhing dayon sa tawo” (Moises 1:39). Ang Ginoo buot nga kita makabalik ngadto Kaniya; bisan pa niana, gusto Siya nga kita mohimo sa atong kaugalingong mga pagpili. Mao kana nganong ang ubang tawo wala magsunod sa atong mga sumbanan. Ang mga sumbanan personal nga makatabang nako tungod kay ako nasayud nga ang Langitnong Amahan mihatag niini ngari nako aron ako makabalik ug makapuyo uban Kaniya ug magmalipayon. Kini mga pruweba sa Iyang gugma alang nako.

Morgane D., edad 18, Languedoc-Roussillon, France

Pag-ampo ug Pagbisita Kanila

Ang mga miyembro nga wala magsunod sa atong mga sumbanan tingali walay pagpamatuod nga nakasentro diha kang Jesukristo. Kinahanglang mag-ampo kita alang nila, nga sila magtinguha sa giya sa Espiritu ug nga sila makaangkon og ilang kaugalingong pagpamatuod. Kinahanglan nga atong bisitahan kini nga mga tawo ug motabang nila sa pagduol ngadto kang Kristo.

Andrea C., edad 13, Lima, Peru

Pagpakita og Ehemplo

Importante kini nga Simbahan sa pagtabang nato sa pagtuman sa mga sugo sa atong Langitnong Amahan ug sa pagpuyo uban Kaniya pag-usab. Apan wala magpasabut nga tungod lang kay ang usa ka tawo nahisakop sa Simbahan nga siya buotan nga tawo kanunay. Tan-awa ang atong kalibutan karon, puno sa kadautan ug pagkasalawayon, bisan tuod ang kalibutan napuno sa mga tawo kinsa nakahukom sa pagsunod ni Jesukristo dinhi sa kinabuhi nga wala pa dinhi sa yuta. Sa akong hunahuna ang labing maayong butang nga atong buhaton mao ang pagpakita og ehemplo alang sa atong mga higala.

Kaden S., edad 15, Utah, USA

Pagsunod sa Atong mga Sumbanan

Sama sa bisan unsang laing organisasyon o relihiyon, adunay mga tawo nga mas mahalaron o dili mahalaron. Kinahanglan nga kita magpuyo sa atong mga sumbanan kutob sa mahimo ug maglaum ug mag-ampo nga ang uban mao usab.

Maren S., edad 16, Arizona, USA