Alang sa Kalig-on sa Kabatan-onan
Magmalig-on, Magmalagsik, Magmaigmat
Gusto nga mobati nga mas maayo ug mas masaligon sa pisikal ug emosyonal nga paagi? Ang kanunay nga pag-ehersisyo makatabang.
Bag-ohay lang kong nakabasa og usa ka makapaikag nga konsepto sa pag-ehersisyo. Nabasa nako nga kon kamo momata og sayo sa buntag, mosul-ob sa inyong sinina sa pag-ehersisyo, ug mohunahuna, “isul-ob lang nako ni, mogawas aron maglakaw-lakaw, ug kon ako mobati og maayo, mosugod ko sa pag-jogging,” siguro makaangkon ka og nindot nga ehersisyo sa dili pa ikaw makahibalo niini. Ang paghimo og yanong plano sama niini makatabang ninyo sa pagpalambo og maayong kinaiya sa pag-ehersisyo ug sa pag-atiman sa inyong lawas. Alang sa daghang mga tawo, ang pagsugod ug ang pagpadayon kanunay maoy labing lisud nga bahin. Kon inyong hinumduman nga ang pag-ehersisyo mopanalangin dili lamang sa inyong lawas apan usab sa inyong hunahuna ug salabutan, makatabang kini ninyo nga makabaton og tinguha nga mahimong mas himsog. Kon kamo mag-ehersisyo, mahimo kamong lagsik nga tawo kinsa mobati nga lig-on, masaligon, alerto, ug sigurado.
Ayaw pagpinariha sa tapulan nga langgam nga mipailis sa mga balhibo niini alang sa mga wati.
Paghulagway pinaagi ni Greg Newbold
Nahinumdom ko sa istorya sa usa ka langgam nga misugod sa pagpailis sa iyang mga balhibo alang sa wati. Sayon ang pagkuha sa pagkaon niana nga paagi, ug ang langgam nagtuo nga siya adunay daghang mga balhibo. Samtang siya nagpadayon sa pagpailis sa iyang mga balhibo, nalingaw ang langgam nga dili na siya momata og sayo aron manguha og wati. Magpuyo lang siya sa iyang salag tibuok adlaw ug dili kinahanglan nga molihok pa. Sa katapusan, hinoon, ang langgam naanad na niini ug nakaamgo nga dili na siya makalupad tungod kay nawala na ang iyang importanting mga balhibo.
Mahitabo kini ni bisan kinsa nga mahulog sa mga lit-ag sa dili maayo nga mga kinaiya, naandang katapulan, o paggamit sa makaadik nga mga butang. Sa Alang sa Kalig-on sa Kabatan-onan atong mabasa nga kining mga butanga “makadaot sa inyong pisikal, mental, emosyonal ug espirituhanong kaayohan. Makaguba kini og mga relasyon sa pamilya ug mga higala ug makapakunhod sa inyong mga pagbati sa katakus sa kaugalingon. Malimitahan niini ang inyong abilidad sa paghimo og mga pagpili alang sa inyong kaugalingon.”1 Ang pagkaaktibo ug pagkaon sa eksakto makatabang nato nga makalikay niining dili maayo nga mga kinaiya. Kon ang langgam nagpadayon sa paglupad ug pagpangita og pagkaon, dili gayud unta mawala ang iyang mga balhibo. Sa samang paagi, kon kita “mogamit sa atong lawas” ug kanunay nga mag-ehersisyo, mapalambo nato ang abilidad sa paglikay sa kalagmitan nga makadaot ug makapaubos nato.
Sama sa ubang mga indibidwal nga nanlimbasug sa pisikal nga kahimsog, ang uban nanlimbasug sa emosyonal nga kahimsog. Ang kinabuhi malisud, ug usahay kita dunay mga pagbati sa kabalaka, depresyon, o kakulang sa pagtamud sa kaugalingon. Apan hinumdumi nga alang sa pisikal ug emosyonal nga kahimsog, ang pag-ehersisyo ug kakugi makatabang nga magpadayon ang positibong panglantaw. Ang pag-atiman sa inyong lawas makapanalangin usab sa inyong hunahuna ug makatabang ninyo nga mahinumdom nga kamo anak sa Dios ug mahimong masaligon ug malipayon. Ang atong emosyonal, pisikal ug espiritwal nga mga aspeto sumpay ang tanan. Ang Alang sa Kalig-on sa Kabatan-onan nagtudlo: “Ang inyong emosyonal nga kahimsog importante usab ug mahimong makaapekto sa inyong espirituhanon ug pisikal nga kaayohan. Ang pagkasagmuyo ug kaguol usahay mga kabahin niining mortal nga kinabuhi. Bisan pa niana, kon kamo adunay dugay na nga mga pagbati sa kaguol, kawalay paglaum, kabalaka, o depresyon, pakigsulti sa inyong mga ginikanan ug sa inyong bishop ug pangayo og tabang.2
Nganong makakita kita og mga tawo sa palibut nga mas lagsik ug malipayon? Usa sa dakong rason mao ang kinaiya. Kon kita mag-obserbar sa atong lawas gikan sa usa ka espirituhanong panan-aw ug nakasabut nga kini “usa ka templo, usa ka gasa gikan sa Dios,” mahalon nato kini ug himoong sagrado.3
Alang kanako, ang sagrado nagpasabut nga limpyo, naamumahan, ug lig-on. Usa sa mga paagi nga gitabangan kita sa atong Langitnong Amahan paghimong sagrado sa atong mga lawas mao ang paghatag kanato sa Pulong sa Kaalam. Ang Alang sa Kalig-on sa Kabatan-onan mipasabut: “Kon kamo masulundon sa [Pulong sa Kaalam], magpabilin kamong gawasnon gikan sa makadaut nga pagkaadik ug adunay kontrol sa inyong kinabuhi. Kamo makaangkon sa mga panalangin sa usa ka mahimsog nga lawas, abtik nga hunahuna ug sa giya sa Espiritu Santo. Kamo mahimong andam sa pagserbisyo sa Ginoo. Ayaw gayud tuguti si Satanas o ang uban sa paglingla kaninyo sa paghunahuna nga ang pagsupak sa Pulong sa Kaalam makapahimo kaninyo nga mas malipayon, mas sikat, o mas madanihon.”4 Samtang magsunod kamo sa Pulong sa Kaalam, hinumdumi nga kamo nag-atiman sa inyong lawas ug hunahuna ug nga kini makapahimo ninyo nga “makakita og kaalam ug dako nga mga bahandi sa kahibalo” (D&P 89: 19).
Imbis sama sa usa ka langgam sa tinapulan nagpailis sa iyang mga balhibo, isul-ob ang inyong sapatos ug mag-aktibo. Pag-ehersisyo kanunay. Pagpalista sa paborito ninyong sport o pagpakighigala niadtong inyong ikauban og dagan o mobuhat og uban pang makalingaw nga mga kalihokan. Samtang kamo maghimo og pisikal nga mga butang, wala lamang ninyo bansaya ang inyong lawas apan usab ang inyong hunahuna. Ang ehersisyo makapalig-on usab sa emosyonal nga kahimsog. Hinumdumi nga ang labing importanting butang dili unsa kamo ka kusog—kondili kon unsa kamo kamakanunayon. Samtang mag-ehersisyo kamo kanunay, dili lamang kamo mas malipayon apan kamo mas molig-on, mas himsug ug mas maalamon.