Mobalik Pa Kaha si Matthew?

Pangalan gipugngan

Aduna mi lig-ong pundok sa batan-ong mga lalaki sa among ward, apan ang among anak nga lalaki nga si Matthew mas ganahang makig-uban sa dili miyembro kinsa mipakigbahin sa iyang hilig sa mga sakyanan ug sa bisan unsang mekanikal nga butang. Walay swerte, kining batan-on nagtubo sa usa ka pamilya nga gibaliwala ang relihiyon. Ang iyang mga ginikanan motugot nga mag-inom ug manigarilyo diha sa ilang panimalay ug dili motuo nga importante ang moral nga kalimpyo.

Si Matthew nakaangkon sa pinakataas nga ranggo sa Scouting, apan wala motunga sa miting nga gantihan na siya sa maong ranggo tungod kay siya mihunong na pagsunod sa mga sumbanan sa Scouting. Gipundok nako ang tanan niyang mga ganti sa Scouting ug gibutang sa display case. Dayon ako kining gitagoan, naglaum nga moabut ang adlaw nga hatagan niya kini og bili. Sa dihang siya nag-16 anyos na, si Matthew nanigarilyo, nag-inom og makahubog, ug nag-druga. Siya mihunong sa pag-ekswela ug nakigtipon sa iyang uyab. Sulod sa pipila ka mga tuig, panagsa ra namo siyang igkita.

Kami nasagmuyo og maayo. Wala mi masayud kon mobalik pa ba siya sa pamilya ug sa tinuohan, apan mihukom kami nga sundon ang ehemplo ni Alma sa pagdumala sa among masinupakong anak. Si Alma nagpadayon sa paghigugma sa iyang anak ug nag-ampo uban sa hugot nga pagtuo nga siya “madala ngadto sa kasayuran sa kamatuoran” (Mosiah 27:14).

Kami nag-ampo kanunay nga ang Ginoo motabang sa kinabuhi ni Matthew, ug among gipahimuslan ang matag higayon sa pagpahayag kon unsa namo siya kamahal pinaagi sa pulong ug buhat. Kon mouli siya sa balay, dili mi mosulti og bisan unsang butang nga tingali iyang sabton nga pagpanaway o paghukom. Yano lang namong ipakita ang among kalipay nga makita siya.

Usa ka adlaw miuli si Matthew ug miingon nga gusto niyang makig-istorya. Miingon siya nga nakahimamat siya og usa ka babaye sa party nga adunay mga pangutana kabahin sa Simbahan. Sa wala pa siya makasulti kaniya nga siya wala na masayud sa mga tubag, nalitok ra niya ang mga tubag. Paspas siyang makatubag sama kapaspas sa pagpangutana sa babaye. Miingon si Matthew nga wala siya kahinumdom nga nakakat-on sa mga butang nga iyang gipangsulti, apan siya nasayud nga ang iyang mga pulong tinuod. Naghunahuna siya kon nganong nagkinabuhi siya sama niini kon nagtuo pa diay gihapon siya sa ebanghelyo.

Human sa tulo ka adlaw nga pagpamalandong, mihukom siya nga magbag-o. Miuli siya sa balay aron sa pagpatabang nga mag-usab.

Gitawagan ni Matthew ang iyang ig-agaw sa laing estado nga nakabuntog sa sama nga mga kalisdanan ug mihangyo kon makapuyo siya uban kaniya. Misugot ang iyang ig-agaw, ug si Matthew misugod sa pagsimba uban niya ug nakigkita sa bishop aron matabangan sa proseso sa paghinulsol. Mibati siya sa gugma ug suporta ug nahimong aktibo sa Simbahan.

Sa kadugayan siya nakahimamat og usa ka matahum, matarung nga batan-ong babaye. Nagkahigugmaay sila ug naminyo sa templo.

Sa dihang natawo ang ilang kinamagulangang anak, mibisita ko ug gidala ang display case nga akong gipahimo para sa iyang mga ganti sa Scouting. Siya nalipay og maayo ug mapagarbuhong gibitay kini sa dapit nga makita sa kadaghanan diha sa iyang panimalay.

Walay anghel nga nagpakita sa among anak, sama sa nahitabo ni Alma ang Batan-on. Apan ang pagbalik ni Matthew sa kamatuoran sama kini sa usa ka milagro.