Pagtabang ni Violet
“Higugmaa ang imong silingan sama sa imong kaugalingon” (Marcos 12:31).
Unsaon ni Emma pagbinuotan kon si Violet maldita kaayo?
Gihugtan paggunit ni Emma ang iyang backpack samtang misulod sa iyang bag-ong klasehanan. Una kadtong adlaw sa eskwelahan. Gisul-ob niya ang iyang paborito nga sinina, ug gipabawnan siya ni Mama og espesyal nga bawon sa paniudto—mga animal cracker.
“Karong adlawa nindot kaayo,” naghunahuna si Emma sa iyang kaugalingon. “Basta—”
Mihunong si Emma ug mitan-aw sa klasehanan. Diha na siya. Si Violet.
Sa miaging tuig, si Violet nagdula lang nga siya lang og monkey bars kada recess. Gihinganlan niya si Emma og bisan unsa. Gikuha gani niya ang suod nga higala ni Emma!
Nakakita si Violet ni Emma ug gihiwian niya siya. Gisigaan ni Emma sa iyang mata, gihugtan pa niya paggunit ang iyang backpack. Dili mahigalaon si Violet sa miaging tibuok tuig, ug ingon walay kalainan karong tuiga.
“Welcome sa bag-ong tuig, class!” Miingon si Miss Caldwell gikan sa atubangan sa kwarto. “Mag-assign ta og mga lingkuranan.”
Gilinya ang mga lingkuranan diha sa klasehanan. Gisubay ni Miss Caldwell sa iyang tudlo ang listahan; dayon mitudlo siya sa usa ka parisan sa lingkuranan sa luyo.“Emma. Ikaw ang molingkod diha.”
Milingkod si Emma sa usa sa lingkuranan sa luyo. Naglaum siya nga si Liselle ang iyang matupad og lingkod. O si Jaime. O—
“Violet.”
Nakalitan si Emma. Eksakto ba ang iyang nadungog?
Oo. Nagtudlo si Miss Caldwell sa lingkuranan tupad niya. “Ikaw ang tupad ni Emma, Violet,” siya miingon.
Hinay nga mipaingon si Violet padulong ni Emma nga nagmug-ot. Gibutang ni Emma ang iyang ulo sa iyang lamesa ug mitan-aw sa bong-bong. Taas kini nga tuig.
Sa oras sa math, si Miss Caldwell misulat og pipila ka mga problema sa pisara nga sulbaron sa klase. “Mahimong sulbaron ninyo nga mag-inusara o uban sa inyong tupad,” miingon siya.
Daling miduko si Emma ngadto sa iyang papel, nagpakaaron-ingnon nga busy siya. Ang mga problema sayon ra kaayo. Naglikay lang siya ni Violet. Wala gyud siya motan-aw ni Violet bisan kausa sa tibuok buntag.
Dunay mituslok sa iyang abaga. Morag lapis. Gipasagdan kini ni Emma.
Laing panuslok. Si Violet ang nanuslok kaniya! Nagpadayon si Emma sa iyang gibuhat nga wala manumbaling.
Ang ikatulong pagpanuslok ni Violet kusog-kusog na kay sakit na kini. Gibati ni Emma nga naglagot na kaayo siya. Ingon ani ba ang tibuok tuig? Naghunahuna siyang mopataas sa kamot aron sultihan si Miss Caldwell. O sigaan lang usab niya si Violet.
Dayon nakadungog si Emma og hingos. Duna bay naghilak? Gituslok siya pag-usab sa lapis. Mitan-aw siya ug nakita si Violet nga nagtutok kaniya. Iyang gigunitan ang iyang lapis, ug nagluha ang iyang mga mata. Ang iyang papel napuno sa pinapasan.
Gilubag ni Violet ang lapis. “Makatabang ka ba nako?” Hilom siyang nangutana.
Gitan-aw siya ni Emma sa makadiyot, nakalitan. Si Violet gusto sa iyang panabang? Human sa iyang pagkamaldita? Mibalik si Emma sa iyang kaugalingong papel. Mahimong mag-inusara si Violet paghimo niini. Dili siya angayan sa tabang ni Emma, bisan kon siya …
… iyang katupad?
Hilom si Emma nga miatubang sa unahan. Madungog niya nga si Violet hinay nga naghilak sa iyang tupad. Ang mga kasulatan kanunay miingon sa paghigugma sa iyang silingan—apan si Violet lahi! Nagtupad lang og lingkod si Emma kaniya diha sa klase!
Mibalik si Emma sa iyang kaugalingong trabaho. Dayon siya mihunong. Tingali si Violet dili lahi. Tingali ang giingon sa mga kasulatan sa paghigugma sa inyong silingan, nagpasabut sa tanan. Bisan sa mga maldita. Bisan kon kini lisud.
Nanghupaw si Emma ug hinay-hinay gibutang ang iyang lapis. Miatubang siya ni Violet ug naningkamot gayud sa pagpahiyom. “Makatabang ko?” nangutana siya.
Mitando si Violet, mipahid sa iyang mga luha sa iyang kamot.
Mitan-aw si Emma sa papel ni Violet ug mitabang kaniya sa unang problema. Gibati niya ang kainit sa iyang dughan. Naghunahuna siya kon ganahan ba si Violet og mga animal cracker.
Paghulagway pinaagi ni Brad Teare; Ang Ginoong Jesukristo, ni Del Parson © IRI