Tarunga og Buhat ang Inyong Bahin
Gikan sa Church Educational System fireside alang sa mga young adult nga gipamulong sa Brigham Young University–Idaho niadtong Marso 4, 2012. Alang sa kompleto nga teksto sa Iningles, bisitaha ang lds.org/broadcasts/archive/ces-devotionals/2012/01?lang=eng.
Pagmatarung. Pagtukod og pamilya. Pangita og tukma nga paagi sa pagsangkap. Pagserbisyo sumala sa tawag. Pagpangandam sa pagsugat sa Dios.
Si Presidente David O. McKay (1873–1970) sa kasagaran moasoy sa usa ka panghitabo samtang nagmisyon siya sa Scotland. Mibati siya og kamingaw samtang bag-o pa siya sa misyon ug migahin og pipila ka oras nga magtan-aw sa Stirling Castle sa duol. Sa dihang siya ug ang iyang kompanyon miuli gikan sa pagbisita sa castle, sila miagi sa usa ka building diin ang bato sa ibabaw sa pultahan adunay kinulit nga usa ka kinutlo, kasagaran gipasidungog ngadto ni Shakespeare, nga mabasa, “Bisan Unsa Inyong Buhaton, Tarunga og Buhat ang Inyong Bahin.”
Sa paghinumdom niini nga kasinatian, si Presidente McKay mipasabut: “Nakaamgo ko, o ang Espiritu midasig kanako, ‘Ikaw miyembro sa Ang Simbahan ni Jesukristo sa mga Santos sa Ulahing mga Adlaw. Labaw pa niana, ikaw ania dinhi isip usa ka representante sa Ginoo nga si Jesukristo. Ikaw midawat sa responsibilidad isip usa ka representante sa Simbahan.’ Dayon ako naghunahuna [kabahin] sa among nabuhat nianang buntaga. Kami nagsuroy-suroy; kami nakaangkon og makasaysayanong mga instruksyon ug impormasyon, tinuod kini, ug ako naghinam-hinam niini … Apan, dili kini misyonaryo nga buhat … Gidawat nako ang kahulugan sa mensahe niana nga bato, ug sukad niadto kami naningkamot sa pagbuhat sa among bahin isip mga misyonaryo sa Scotland.”1
Kini nga mensahe importante ug nakaapekto og maayo kaniya nga gigamit kini nga inspirasyon ni Presidente McKay sa tibuok niyang kinabuhi. Determinado siya nga bisan unsa pa ang iyang responsibilidad, iyang himoon ang iyang pinakamaayo.
Likayi ang Pagsunod-sunod sa Kinaiya sa Uban
Kalabut sa dakong potensyal sa kaayohan nga anaa kaninyong mga batan-ong henerasyon sa Simbahan, unsa man ang akong mga kabalaka sa inyong umaabut? Unsay akong matambag kaninyo? Una, kamo moatubang og hilabihang pagpamugos nga sundon ang kinaiya sa uban—gani sa pagsul-ob og maskara—ug mahimong usa ka tawo nga dili gayud kamo o gusto ninyong mamahimo.
Sa sayong bahin sa kasaysayan sa Simbahan, si Propeta Joseph Smith, si Emma, ug ang ilang 11 ka bulan nga kaluha, sila si Joseph ug Julia, anaa sa Hiram, Ohio, sa balay nila ni John ug Alice Johnson. Ang kaluha gitipdas. Si Joseph ug ang iyang gamayng anak nga lalaki natulog sa trundle bed duol sa atubangang pultahan.
Pagkagabii usa ka grupo sa mga lalaki nga ang ilang mga nawong gipintalan og itom midasmag sa pultahan ug miguroy sa Propeta ngadto sa gawas, diin ila siyang gibunal-bunalan ug gibutangan og alkitran lakip ni Sidney Rigdon.
Ang pinakatrahedya niining kagubot mao nga ang batang si Joseph natun-ugan ug gitrangkaso sa dihang ang iyang amahan giguroy. Isip resulta, siya namatay paglabay sa pipila ka adlaw.2
Kadtong miapil sa Pagpangmartir sa Propeta ug iyang igsoon nga si Hyrum nagpintal usab sa ilang mga nawong aron matago ang ilang tinuod nga pagkatawo.3
Sa atong panahon, nga ang pagka-anonymous [dili pagpahibalo sa tinuod nga pagkatawo] sayon na kaayo, adunay importante nga mga baruganan nga may kalabutan sa dili pagsul-ob og maskara ug mahimong “matinud-anon sa ‘tong tinuohan … gipakamatyan sa mga ginikanan.”4
Usa sa inyong maayong proteksyon batok sa pagpili og sayop mao ang dili pagmaskara aron dili mailhan. Kon ganahan mo nga mobuhat niini, palihug sayri nga kini timailhan gayud sa kakuyaw ug usa sa mga himan sa kaaway aron mobuhat mo sa usa ka butang nga dili angay ninyong buhaton.
Komon karon nga dili magpaila kon magsulat og makapalagot, makapasakit, mapihigon nga komunikasyon diha sa internet. Ang uban motawag niini nga flaming [pangaway].
Si Apostol Pablo misulat:
“Ayaw na kamo pagpahisalaag: ang dautang pakighugoyhugoy makadaut sa maayong pamatasan.
“Pagpahiuli kamo sa tarung nga panimuot, ug ayaw na kamo pagpakasala; kay ang uban kaninyo wala kahibalo mahitungod sa Dios” (1 Mga Taga-Corinto 15:33–34).
Klaro nga ang dautang komunikasyon dili lang kabahin sa dili maayong mga pamatasan. Kon gibuhat kini sa mga Santos sa Ulahing mga Adlaw, sila makaapekto pag-ayo niadtong walay kahibalo sa Dios o sa pagpamatuod sa Manluluwas.
Ang bisan unsang paggamit sa Internet aron sa pagbinastos, pagdaut sa reputasyon, o pagtumo-tumo sa usa ka tawo nga dautan dili maayo. Atong makita sa katilingban nga kon ang mga tawo magsul-ob og maskara aron dili mailhan, sila mas ganahang mobuhat niini, nga makadaot gayud sa tarung nga panag-istoryahanay. Supak usab kini sa sukaranang mga baruganan nga gitudlo sa Manluluwas.
Ang Manluluwas mipasabut nga wala Siya mianhi aron hukman ang kalibutan apan sa pagluwas sa kalibutan. Dayon iyang gipasabut unsa ang paghukom:
“Ug ang paghukom mao kini, nga ang kahayag mianhi sa kalibutan, ug ang kangitngit maoy gipalabi sa mga tawo sa paghigugma kay sa kahayag, kay dautan man ang ilang mga buhat.
“Kay ang tanan nga nagabuhat og mangil-ad nagadumot sa kahayag, ug dili moduol sa kahayag, sa kahadlok nga tingali unya masuta ang ilang mga buhat.
“Apan siya nga nagahimo sa matuod moduol sa kahayag, aron ikapadayag, nga ang iyang mga buhat nangahimo diha sa Dios” (Juan 3:19–21; tan-awa usab sa mga bersikulo 17–18).
Ang mga matarung dili kinahanglang magmaskara aron itago ang ilang pagkatawo.
Lihok Sumala sa Inyong Tinuod nga Pagtuo
Molihok kamo sumala sa inyong tinuod nga pagtuo pinaagi sa paggahin sa inyong panahon niadtong mga butang nga makapalig-on ug makapalambo sa inyong kinaiya ug makatabang kaninyo nga mas mahisama kang Kristo. Nanghinaut ko nga walay usa kaninyo nga naglantaw sa kinabuhi nga lingaw-lingaw ug mga dula lang apan usa ka panahon “sa pagpangandam sa pagsugat sa Dios” (Alma 34:32).
Usa ka nindot nga ehemplo sa paglihok sa inyong bahin ug sa paggamit sa panahon sa tukmang paagi mao ang kinabuhi ni Elder L. Tom Perry sa Korum sa Napulog Duha ka mga Apostoles, sa dihang, isip usa ka marinero, kabahin siya sa nag-okupar nga US force sa Japan sa katapusan sa Ikaduhang Gubat sa Kalibutan. Si Elder Perry mipakigbahin niini nga asoy sa dihang iyang girekord ang iyang linain nga saksi sa Manluluwas.
“Usa ko sa unang grupo sa Marines nga miadto sa Japan human sa pagpirma sa kasabutan sa kalinaw human sa Ikaduhang Gubat sa Kalibutan. Sa pagsulod namo sa nagun-ob nga siyudad nga Nagasaki, kini mao ang usa sa pinakamasulub-ong kasinatian sa akong kinabuhi. Dakong bahin sa siyudad ang nagun-ob gyud. Daghang mga patay ang wala malubong. Isip tropa nga nag-okupar, gitukod namo ang punoang buhatan ug mitrabaho.
“Ang sitwasyon makaguol, ug pipila namo gusto nga mas magkugi pa. Kami miadto sa among division chaplain ug mihangyo sa pagtugot sa pagtabang og tukod og balik sa mga simbahan nga Kristiyano. Tungod sa restriksyon sa gobyerno atol sa gubat, kining mga simbahana wala na gamita. Pipila sa ilang mga building nangaguba og maayo. Usa ka grupo namo miboluntaryo sa pag-ayo ug pag-plaster og usab niining mga simbahan sa among libre nga mga oras aron magamit ni sa pagsimba.
“… Among nakit-an ang mga ministro nga wala na makaalagad atol sa gubat ug miawhag kanila sa pagbalik ngadto sa ilang mga pulpito. Talagsaon kaayo ang among nasinati uban niining mga tawhana samtang sila nakasinati pag-usab og kagawasan sa pagtuman sa ilang Kristohanong pagtuo.
“Adunay nahitabo sa among pagbiya sa Nagasaki nga kanunay nakong mahinumduman. Sa among pagsakay sa tren nga modala namo ngadto sa among barko aron makauli sa balay, kami gibugal-bugalan sa ubang mga marinero. Kauban nila ang ilang mga oyab ug [na]namalit ngadto kanila. Ila kaming gikataw-an ug mipasabut nga wala namo matagamtam ang kalipay samtang anaa mi sa Japan. Nag-usik-usik lang mi sa among oras sa pagtrabaho ug pag-plaster sa mga bong-bong.
“Atol sa ilang grabeng pagsungog, gikan sa gamay nga bungtod duol sa estasyunan sa tren miabut ang mga 200 niining talagsaong mga Japanese nga Kristiyano sa mga simbahan nga among giayo, nagkanta og ‘Sulong, mga Kristohanong Kasundaluhan.’ Miduol sila ug mihatag namo og daghang mga regalo. Dayon milinya sila subay sa agianan sa tren. Ug sa dihang misugod na og dagan ang tren, kami mikab-ot ug mihikap sa ilang mga tudlo sa among pagbiya. Nahilom kami; hilabihan ang among emosyon. Ug mapasalamaton mi nga nakatabang mi sa gagmay nga mga paagi nga maestablisar pag-usab sa nasud ang Kristiyanismo human sa gubat.”5
Palihug pamalandong ug pagpositibo sa pagpili kon unsaon ninyo paggamit inyong panahon. Sama sa inyong makita sa ehemplo ni Elder Perry, wala ko maghisgot nga inyong ipahibalo ang inyong relihiyon sa tanan o magpakaaron-ingnon nga matinud-anon. Kana mahimong makauulaw nimo ug sa Simbahan. Ako naghisgut kon unsa mo angay nga mamahimo.
Paghimo og Angay nga mga Tumong
Ang akong ikatulo nga tambag may kalabutan sa mga tumong nga angay ninyong ikonsiderar. Mga samang higayon nga si Elder Perry didto sa Japan uban sa mga marinero, si Presidente Boyd K. Packer, Presidente sa Korum sa Napulog Duha ka mga Apostoles, miserbisyo sa Japan uban sa air force sa katapusan sa Ikaduhang Gubat sa Kalibutan.
Niadtong 2004, akong giubanan si Presidente Packer ug ang uban ngadto sa Japan. Siya adunay oportunidad sa pagsubay og usab sa iyang mga giagian sa una ug sa pagpamalandong sa pipila ka mga kasinatian ug mga desisyon nga iyang gihimo niadtong higayona. Uban sa iyang pagtugot, akong ipakigbahin ang pipila sa iyang mga hunahuna ug mga pagbati.
Gihulagway ni Presidente Packer ang mga kasinatian nga nahitabo sa usa ka isla atbang sa baybayon sa Okinawa. Iya kining gikonsiderar isip iyang bungtod sa kamingawan. Ang iyang personal nga pagpangandam ug pakig-ilaila sa ubang mga miyembro milig-on pag-ayo sa iyang pagtuo sa mga pagtulun-an sa ebanghelyo. Ang kulang lang niya mao ang pagkumpirmar—sigurado nga kahibalo niadtong iya na nga gibati nga tinuod.
Maayo kaayong paghulagway sa tagsulat sa kinabuhi ni Presidente Packer ang nahitabo: “Sukwahi sa kalinaw sa pagkumpirmar nga iyang gitinguha, siya mismo nakasinati sa impyerno sa gubat batok sa mga inosente. Usa ka adlaw, nagtinguha nga mag-inusara ug mamalandong, siya misaka sa bungtod ibabaw sa kadagatan. Didto iyang nakita ang makaguol sa nahabiling balay sa usa ka ordinaryo nga tawo, ang napasagdang umahan sa mga patatas sa duol. Ug taliwala sa mga tanom nga himatyon iyang nakita ang mga patayng lawas sa usa ka inahan ug sa iyang duha ka anak. Ang iyang nakita nakapasubo niya og maayo inubanan sa mga pagbati sa gugma alang sa iya mismong pamilya ug sa tanang mga pamilya.”6
Dayon misulod siya sa usa ka temporaryo nga bunker, diin siya namalandong, ug nag-ampo. Si Presidente Packer, naghinumdom niining panghitaboa, mihulagway sa akong gitawag og usa ka nagkumpirmar nga espirituhanong kasinatian. Siya nadasig sa unsay iyang angay nga buhaton sa iyang kinabuhi. Siya, siyempre, walay ideya nga siya matawag sa taas ug balaan nga calling nga iyang gihuptan karon. Ang iyang panan-awon nga siya gusto nga mahimong magtutudlo, mopasabut og maayo sa mga pagtulun-an sa Manluluwas. Siya mihukom nga magpakabuhi nga matarung.
Siya nakaamgo sa lawom nga paagi nga siya kinahanglang mangita og usa ka matarung nga asawa ug manag-ubang mag-amuma og dakong pamilya. Kining batan-on nga sundalo miila nga ang iyang gipili nga trabaho gamay ra og sweldo ug ang iyang buotang kapikas kinahanglang susama og mga prayoridad niya ug andam nga magpakabuhi nga walay pipila ka mga materyal nga butang. Si Sister Donna Packer mao gayud, para kang Presidente Packer, hingpit nga kapikas. Wala silay sobra nga kwarta, apan wala sila mobati nga nahikawan. Sila nagpadako og 10 ka mga anak, ug sila misakripisyo. Karon sila adunay 60 ka mga apo ug sobra sa 80 ka mga apo sa tuhod.
Gipakigbahin ko kining asoy tungod kay kasagaran sa atong mga tumong nag-agad sa unsay gihatagan og bili sa kalibutan. Ang mahinungdanong mga elemento yano lang para sa mga miyembro nga nakadawat sa makaluwas nga mga ordinansa. Magmatarung. Magkapamilya. Mangita og tukma nga paagi aron makasangkap. Moserbisyo sumala sa tawag. Mangandam sa pagsugat sa Dios.
Ang Manluluwas mitudlo “ang kinabuhi sa tawo wala diha sa kadagaya sa iyang mga katigayonan” (Lucas 12:15).
Pagtukod sa Inyong Nasud ug Komunidad
Agi og dugang sa personal nga mga hiyas, mga kinaiya, ug mga desisyon, kon kamo gustong mahimo nga henerasyon nga kinahanglan kamong mamahimo, kamo motukod sa inyong nasud ug sa komunidad diin kamo nagpuyo. Ang inyong henerasyon kinahanglan nga manalipod sa pagkamatarung ug kagawasan sa relihiyon. Ang panulundon sa Hudeo-Kristiyano nga atong napanunod dili lang bililhon apan mahinungdanon usab sa plano sa atong Amahan sa Langit. Kinahanglan nga ato kining ipreserbar para sa umaabut nga mga henerasyon. Kita kinahanglan nga mohiusa sa matarung nga mga tawo, uban sa tanang mga tinuohan—ilabi na niadtong mobati nga manubag sa Dios sa ilang binuhatan. Kini nga mga tawhana nakasabut sa tambag nga “bisan unsa inyong buhaton, tarunga og buhat ang inyong bahin.” Ang malampuson nga pagpalambo sa mga mithi nga Hudeo-Kristiyano ug sa kagawasan sa relihiyon motimaan nga ang inyong henerasyon mao ang talagsaong henerasyon nga angayng mamahimo.
Uban sa mga hagit nga anaa sa kalibutan karon, ang Unang Kapangulohan ug Korum sa Napulog Duha ka mga Apostoles gusto nga kamo moapil sa tukmang paagi sa proseso sa politika sa nasud diin kamo nagpuyo. Ang Simbahan walay gidapigan sa politika ug dili mosuporta og mga kandidato o mga partido. Hinoon, kami naglaum, nga ang atong mga miyembro hingpit nga moapil sa pagsuporta sa mga kandidato ug partido sumala sa ilang pagpili nga gibase sa mga baruganan nga manalipod sa maayong panggobyerno. Ang atong doktrina klaro: kadtong mga maayo, “matinuoron … ug maalamon … kinahanglan nga pangitaon sa tumang kakugi” (D&P 98:10).
Kami adunay dakong pagsalig kaninyo. Ang kapangulohan sa Simbahan sa tinuoray nagtuo nga kamo makatukod sa gingharian nga labaw pa sa nangaging henerasyon. Dili lang ang among gugma ug pagsalig ang among gihatag kaninyo apan ang among mga pag-ampo ug mga panalangin usab. Nasayud kami nga ang kalampusan sa inyong henerasyon importante sa nagpadayon nga pag-establisar sa Simbahan ug sa paglambo sa gingharian. Nag-ampo kami nga inyong buhaton og maayo ang inyong bahin samtang maglikay kamo sa pagmaskara, molihok sumala sa inyong tinuod nga pagkatawo, mohimo og angay nga mga tumong, ug motukod sa inyong nasud ug komunidad.
Litrato ni Elder Quentin L. Cook pinaagi ni Craig Dimond; mga paghulagway sa litrato pinaagi ni Scott Davis
Si Elder L. Tom Perry mitarung og buhat sa iyang bahin samtang na-assign sa Japan.
Litrato ni Elder L. Tom Perry © IRI
Si Presidente Boyd K. Packer napanalangin tungod sa paghimo og matarung nga mga tumong.
Litrato ni Presidente Boyd K. Packer, dili mahimong pakopyahan