Anaa ko sa Panimalay

Steven Sainsbury, California, USA

Lakip sa usa ka proyekto sa pagserbisyo, mibiyahe ko ngadto sa Rwanda uban sa pipila ka mga doktor aron sa pagtabang sa medikal nga mga panginahanglan. Human sa duha ka semana, sa hapit na matapos ang akong biyahe, misugod ko sa pagbati og kamingaw. Gimingaw ko sa akong pamilya, akong komportable nga higdaanan, ug sa akong panimalay.

Sa akong katapusang Dominggo sa Africa, nahan-ay nako ang akong iskedyul aron makasimba. Bisan tuod ang Simbahan dili pa pormal nga giila sa Rwanda, nakit-an nako ang iskedyul ug direksyon pinaagi sa website sa Simbahan.

Ingon og dili sagad kini nga mga direksyon: “Lakaw sa sementadong dalan atbang sa Ministry building. Pangitaa ang abli nga gate. Dayon kanaog subay sa hagdanan.”

Samtang akong gisunod kini nga direksyon, nakadungog ko sa klarong koru sa usa ka pamilyar nga himno. Nanaug ko subay sa hagdanan, ug akong nadungog ang mga pulong sa “Unsa Kalig-on ang Tukuranan” (Mga Himno ug mga Awit sa mga Bata, nu. 6). Sa katapusan sa hagdanan adunay gamay nga building, diin daghang mapahiyumon nga mga tawo ang nagbarug sa may pultahan. Bisan ako usa ka estranyo sa kongregasyon, mibati ko dayon diha-diha nga dili na iglain kanila. Daghan sa mga kaigsoonan nga Rwandan miduol aron sa pakiglamano nako, ug samtang ila kining gibuhat, nawala ang akong gibati nga tumang kamingaw—anaa ko sa panimalay!

Pagsulod sa building, mitambong ko sa sagad nga tulo ka oras nga miting nga walay kalainan sa akong home ward didto sa California. Ang mga naghupot sa Aaronic Priesthood nagpaambit sa sakrament, ang mga pakigpulong nakasentro sa Manluluwas, ug gani ang mga leksyon sa Sunday School susama sa gitudlo sa akong home ward niana nga semana.

Ang pinakaimportante, ang Espiritu sa Ginoo anaa sa mga tulumanon. Klaro, ang Ginoo pabor nga mipahiyom niining buotan nga mga tawo nga naningkamot kutob sa ilang mahimo sa pagserbisyo Kaniya. Akong nasayran nga sa miaging tuig, gamay ra nga mga Rwandan ang manimba dinhi. Apan akong giihap nga adunay sobra sa 100 ka mga nanambong, katunga kanila mapahiyumon nga mga bata.

Karon nga ang Rwanda naabli na para sa misyonaryo nga buhat, nagtuo ko nga ang mga misyonaryo magmalampuson samtang ang Espiritu nagpamatuod ngadto sa nagkadaghang mga Rwandan nga investigator nga ang gipahiuli nga Simbahan mao ang gingharian sa Dios sa tibuok yuta—alang sa tanang kontinente, sa tanang katawhan, ug sa tanang mga anak sa Dios. Mapasalamaton kaayo ko sa Simbahan, makita man diha sa sentro sa baybayon sa California o sa sementadong dalan sa central Africa.