Mensahe sa Unang Kapangulohan
Ang Atong Responsibilidad sa Pagluwas
Alang sa mga Santos sa Ulahing mga Adlaw, ang panginahanglan sa pagluwas sa atong mga kaigsoonan kinsa, sa usa ka rason o sa lain, nahisalaag sa dalan sa pagkaaktibo sa Simbahan adunay mahangturong kamahinungdanon. Kita ba adunay kaila nga sama niining mga tawhana nga kausa midawat sa ebanghelyo? Kon mao, unsa ang atong responsibilidad sa pagluwas kanila?
Ikonsiderar ang nawala sa mga tigulang, sa biyuda, ug sa masakiton. Kasagaran sila anaa sa uga kaayo ug awaaw nga kamingawan nga gitawag og pag-inusara. Kon magkatigulang na, magkasakit na, magkaluya na, ang kahayag sa paglaum magkaawup na, sila mahimong tabangan ug suportahan sa kamot nga motabang ug sa kasingkasing nga manggiloloy-on.
Siyempre, aduna pay uban nga kinahanglang luwason. Ang uban nanlimbasug sa sala samtang ang uban nahisalaag sa kahadlok o kakulang sa pagbati o pagka-ignorante. Sa bisan unsang rason, sila nahilayo sa mga kalihokan sa Simbahan. Ug siguro sila magpabiling mawala gawas kon kita—aktibo nga mga miyembro sa Simbahan—makaangkon og tinguha sa pagluwas kanila.
Usa ka Tawo nga Mopakita sa Dalan
Kaniadto nakadawat ko og sulat gikan sa usa ka tawo kinsa nahilayo sa Simbahan. Kini naghulagway sa kadaghanan sa atong mga miyembro. Human og hulagway kon sa unsang paagi siya nahimong dili aktibo, siya misulat:
“Ako abunda kaayo sa una ug karon adunay gamay na lang. Dili ko malipayon ug mibati nga daw pakyas ko sa tanang butang. Ang ebanghelyo nagpabilin sa akong kasingkasing, bisan tuod wala ko magpakabuhi sumala niini. Ako naghangyo sa imong mga pag-ampo.
“Palihug ayaw kalimti kadtong nahimutang sama sa akong sitwasyon—ang nawala nga mga Santos sa Ulahing mga Adlaw. Ako nasayud kon asa ang Simbahan, apan usahay naghunahuna ko nga kinahanglan ko og usa ka tawo nga mopakita kanako sa dalan, moawhag kanako, modasig sa pagpawala sa akong kahadlok, ug mopamatuod ngari kanako.”
Samtang nagbasa ko niini nga sulat, nakahinumdom ko sa akong pagbisita sa usa sa talagsaong galariya sa art sa kalibutan—ang inilang Victoria ug Albert Museum sa London, England. Didto, nindot kaayong pagka-frame, ang obra nga gi-paint ni Joseph Mallord William Turner niadtong 1831. Ang painting nagpakita sa baga kaayo nga mga dag-om ug grabeng kapintas nga dagat nga nagpasabut og kakuyaw ug kamatayon. Gikan sa layo usa ka kahayag sa natanggong nga barko ang nagsidlak. Sa atubangan, usa ka dakong lifeboat ang misaka tungod sa nagsingabut nga mga balud sa nagbula-bula nga tubig. Gikontrolar og maayo sa mga lalaki ang mga bugsay sa dihang ang lifeboat giigo sa unos. Sa baybayon nagbarug ang usa ka asawa ug duha ka mga bata, nabasa sa ulan ug gihuros sa hangin. Sila nabalakang nagtan-aw sa kadagatan. Naghunahuna ko nga pamub-an ang ngalan sa painting. Alang nako kini nahimong To the Rescue.1
Taliwala sa mga unos sa kinabuhi, anaa ang kakuyaw. Mga lalaki ug babaye, batang mga lalaki ug babaye matanggong ug mag-atubang sa kalaglagan. Kinsa ang mogiya sa mga lifeboat, mobiya sa kaharuhay sa panimalay ug pamilya, ug moluwas?
Ang atong buluhaton dili kaayo lisud. Kita anaa sa buluhaton sa Ginoo; kita may katungod sa Iyang panabang.
Atol sa pangalagad sa Agalon, Iyang gisugo ang mga mangingisda sa Galilea nga ibilin ang ilang mga pukot ug mosunod Kaniya, namahayag, “Himoon ko kamong mangingisdag tawo.”2 Unta moapil kita sa mga pundok sa mga mangingisda sa mga lalaki ug babaye, nga kita makatabang sa unsay atong mahimo.
Atong responsibilidad ang pagtabang sa pagluwas niadtong kinsa mibiya sa pagkaaktibo, nga sila madala ngadto sa lamesa sa Ginoo aron sa pagbusog diha sa Iyang pulong, sa pagtagamtam sa pakig-uban sa Iyang Espiritu, ug mahimong “dili na mga langyaw ug mga dumuloong, kondili mga katagilungsod sa mga balaan ug mga sakop sa panimalay sa Dios.”3
Ang Baruganan sa Gugma
Ako nakakaplag og duha ka mahinungdanong rason nga makaapekto gayud sa pagpaaktibo og balik ug sa mga kausaban sa kinaiya, mga batasan ug mga lihok. Una, ang mga indibidwal maaktibo og balik tungod kay may usa ka tawo nga nagpakita kanila sa ilang mahangturong mga posibilidad ug nagtabang nila sa pagdesisyon sa pagkab-ut niini. Ang dili kaayo aktibo nga miyembro sa kadugayan dili makontento sa ordinaryong binuhatan kon ilang makita nga ang kalampusan hapit na nilang makab-ut.
Ikaduha, ang uban mobalik tungod kay may mga minahal o “mga katagilungsod sa mga balaan” misunod sa tambag sa Manluluwas, naghigugma sa ilang mga silingan sama sa ilang kaugalingon,4 ug nagtabang sa uban aron matuman ang ilang mga damgo ug makab-ut ang ilang mga ambisyon.
Ang pinakaimportante niini nga proseso sa una pa—ug magpadayon pa—mao ang baruganan sa gugma.
Sa tinuoray, kadtong mga tawo sa painting ni Turner nga natanggong sa bagyo sama sa kadaghanan sa atong dili kaayo aktibo nga mga miyembro kinsa nagpaabut nga luwason niadtong mogiya sa mga lifeboat. Ang ilang kasingkasing nangandoy og tabang. Mga inahan ug amahan nag-ampo alang sa ilang mga anak. Mga asawa nangamuyo ngadto sa langit nga ang ilang mga bana matabangan. Usahay ang mga bata nag-ampo para sa ilang mga ginikanan.
Akong pag-ampo nga unta kita makabaton og tinguha sa pagluwas sa dili kaayo aktibo ug sa pagdala kanila balik sa hingpit nga kalipay sa ebanghelyo ni Jesukristo, nga sila unta makaambit uban nato sa hingpit nga pagpakigdait nga gitanyag niini.
Unta kita motabang sa pagluwas sa nangawala nga naglibut kanato: ang tigulang, biyuda, masakiton, kadtong may kakulangan, ang dili kaayo aktibo ug kadtong wala magsunod sa mga sugo. Hinaut nga kita makapaabut ngadto kanila sa kamot nga motabang ug sa kasingkasing nga manggiloy-on. Sa pagbuhat niini, kita makapalipay sa ilang mga kasingkasing, ug kita makasinati og katagbawan kon kita motabang sa uban diha sa dalan padulong sa kinabuhing dayon.
Pagtudlo Niini nga Mensahe
Ikonsiderar sa pagpangutana sa mga tawo nga inyong gibisitahan kon aduna ba silay kaila nga nanlimbasug sa pagsimba. Makapili kamo og usa ka tawo ug hisguti ang mga pamaagi sa pagpakita og gugma, sama sa pagdapit kaniya sa pag-apil sa family home evening o moadto alang sa pagpangaon.
Life-Boat and Manby Apparatus Going Off to a Stranded Vessel Making Signal (Blue Lights) of Distress, ni Joseph Mallord William Turner © Victoria and Albert Museum, London, www.vandaimages.com