Hangtud Kita Magkita Pag-usab
Ako Nanumpa o Namalikas [Swear] …
Ang pagpamalikas mipilit na nako sama sa amorsiko nga mopilit sa sinina.
Ang tinan-awan sa akong inahan nakapasubo nako. Nakugang. Nadismaya. Nasagmuyo. Kining tanan makita diha sa iyang mga mata ug dayon natingub sa usa ka emosyon—pagbudhi.
Bisan pa sa iyang pagtudlo nako sulod sa 15 ka tuig sa pagtahud sa Langitnong Amahan sa pulong ug buhat, diha ako nagbarug, sad-an nga migawas sa akong ba-ba ang dili maayo nga pulong.
Wala nako tuyoa nga mamalikas. Sa wala pa kanang tuiga, wala gayud ako makagamit og law-ay nga pulong. Apan niana nga ting-init nga ako nagtrabaho sa Utah Fish and Game Department ug nakakuha og kinaiya gikan sa ubang mga batan-on nga nagtrabaho uban nako.
Ang among labing importante nga trabaho mao ang pagputol sa amorsiko sa kilid sa mga dalan. Diha-diha dayon kami nakahukom nga ang Arctium minus dili maayo nga sagbut. Daghan ang motubo niini bisan asa, ug mopatay sa ubang mga tanom. Ang kahait niini mopilit sa bisan unsa nga maduol.
Ginamit ang pala, among gipangibut kana nga sagbut sa tibuok ting-init hangtud nga kapuyon kami—ug makasulti og hugaw nga pulong. Sa sinugdanan akong namatikdan nga ang mga pulong sa akong kauban dili maayo.Gipasagdan lang nako ni. Sa katapusan, nakasunod ako niini. Sa hinapos sa ting-init, ang pagpamalikas mipilit na nako sama sa pagpilit sa amorsiko nga mopilit sa sinina.
Ang reaksyon sa akong inahan sa akong dili maayo nga pulong, nakakombinser nako nga kinahanglan kong mag-usab.
Dili kadto sayon. Ang pagpamalikas dili lang usa ka pagpili sa mga pulong. Sumbanan usab kini sa hunahuna. Ang pag-istoryahanay nga atong gitugutan sa atong kinabuhi, ang mga pulong nga atong mabasa, ug ang mga imahen nga atong tan-awon mohulma sa atong mga hunahuna. Wala madugay akong nahibaloan nga kinahanglan nakong usbon unsay akong gisulod sa hunahuna kon gusto nakong usbon ang mga pulong nga akong gamiton.
Maayo gani, aktibo ako nga motambong sa simbahan ug seminary. Ang pagpamalikas nakaali sa mas maayong mga hunahuna, apan kay ako nahimutang sa dapit diin anaa ang maayong mga hunahuna nakapagamot kini pag-usab. Naningkamot ako sa pagbasa sa mga kasulatan matag adlaw ug nag-ampo. Nagpalayo ako sa mga salida sa sine ug mga programa sa telebisyon nga nagpasiugda og dili maayong mga hunahuna.
Hinay-hinay, akong namatikdan nga nagkanindot na ang akong pinulungan. Sa katapusan sa tuig, nawala na ang akong pagpamalikas.
Sukad niana nga kasinatian, akong nakat-unan ang mahitungod sa gahum sa mga pulong. Ang mga pulong makaayo o makalaglag. Makapasakit kini, o makaayo. Makapahigawad kini sa mga tawo, o makatanom kini sa liso sa paglaum ug gugma.
Akong nakita nga makapaikag nga ang Manluluwas Mismo, ang Tiglalang sa langit ug yuta, gipasabut nga mao ang Pulong (tan-awa sa Juan 1:1–4; D&P 93:6–11).
Akong nakat-unan nga ang swearing adunay positibo nga kahulugan [manumpa] ingon man usab negatibo nga kahulugan [mamalikas]. Manumpa kita sa pagsulti sa kamatuoran diha sa korte sa balaod. Ligdong kitang mosaad, o manumpa, sa pagsunod sa mga sugo sa Dios sa dihang gibunyagan kita. Sa samang paagi, maghimo kita og sagrado nga mga saad sa pagsunod sa atong mga pakigsaad sa templo aron madawat ang labing mahinungdanon nga mga panalangin sa Langitnong Amahan.
Sa katapusan mao kini: Kita mahimong mas mahisama sa Pulong kon ang atong mga pulong motahud Kaniya ug mopakita sa Iyang himaya.
Gilitratohan ni anna laurent