Pagdala sa Primary ngadto sa Panimalay

Akong Ipakigbahin ang Ebanghelyo ngadto sa Tanang Anak sa Dios

Nakakaon ba kamo og lamian kaayo nga gusto ninyo kining ipakigbahin? Si propeta Lehi kausa nagdamgo nga siya nagkaon og lamian nga bunga. Lamian kaayo nga kini “mipuno sa [iyang] kalag sa tuman nga hingpit nga kalipay” (1 Nephi 8:12). Gusto ni Lehi nga makatilaw usab ang iyang pamilya nianang lamian kaayo nga bunga.

Ang bunga sa damgo ni Lehi sama sa gugma sa Langitnong Amahan. Gusto ni Lehi nga ang iyang pamilya mobati sa gugma sa Langitnong Amahan. Gusto siya nga mopakigbahin sa ebanghelyo ngadto kanila tungod kay siya nasayud nga kini makapalipay nila.

Sa kasagaran ang mga bata maayo kaayo mopakigbahin sa ebanghelyo ngadto sa uban.

Ang otso anyos nga si Maria nakakita sa mga misyonaryo sa kadalanan sa Ecuador. Mihangyo siya kanila nga tudloan siya sa ebanghelyo. Miadto ang mga misyonaryo sa balay ni Maria sa pagtudlo sa iyang pamilya. Si Maria mao ang una sa iyang pamilya nga nagpabunyag. Nalipay kaayo siya sa dihang ang iyang tibuok pamilya nagpasakop usab sa Simbahan.

Naghinam-hinam kaayo ang nuybe anyos nga si Eric mahitungod sa pasundayag sa Primary sa sakrament miting nga iyang giimbitar ang iyang mga silingan. Miabut sila.

Kining duha ka mga bata mipakigbahin og butang nga bililhon sa mga tawo nga ilang gimahal. Kon kamo mopakigbahin sa ebanghelyo, motubo ang inyong pagpamatuod. Sama ni Lehi, bation ninyo ang “hingpit nga kalipay.”

Kanta ug Kasulatan

• “We’ll Bring the World His Truth,” Children’s Songbook, 172–73

• Mateo 5:16

Magsulti Ta

Mahimo ninyong ipa-drawing sa kada sakop sa pamilya ang litrato sa iyang paborito nga mga bunga. Dayon sa luyo sa drawing, ang kada tawo mahimong mosulat kon sa unsang paagi nga ang ebanghelyo nakapanalangin sa ilang kinabuhi. Dayon maghisgot kamong tanan sa mga paagi nga inyong ipakigbahin ang ebanghelyo sa mga higala ug mga silingan.

Mga Kard nga Ipaambit

Makahimo kamo sa pagpakigbahin sa ebanghelyo pinaagi sa pagpakigbahin og pass-along card. Ipapilit lang ang mga kard sa sunod nga pahina sa baga nga papel. Dayon guntinga ang mga kard ug isulat ang inyong kaugalingong mga mensahe sa pikas bahin.

“Ayaw kahadlok, kay ako anaa uban kanimo.”

Genesis 26:24

“Bulahan ang mga tigpasiugda sa kalinaw.”

Mateo 5:9

“Magmapuanguron kamo ang usa ngadto sa usag usa, mga malulot og kasingkasing, nga magpinasayloay kamo ang usa sa usa.”

Mga Taga-Efeso 4:32

“Pagmapasalamaton kamo sa tanang higayon.”

1 Mga Taga-Tesalonica 5:18

Wala: paghulagway pinaagi ni Mark Jarman; tuo, tuyok padulong sa tuo gikan sa ibabaw sa wala: mga paghulagway pinaagi ni Jim Madsen, Jared Beckstrand, si Eric Barclay ug Celeste Smith