Pagdapit sa Manluluwas
“Tan-awa, nagatindog ako sa pultahan ug nagatuktok: kon may magapatalinghug sa akong tingog ug moabli sa pultahan, kaniya mosulod ako” (Pinadayag 3:20).
Sa bata pa ako, panahon sa Pasko ang akong mama mobutang og litrato sa Manluluwas nga nanuktok sa pultahan. Dili pa kami mga miyembro sa Simbahan, ug kanunay akong mangutana, “Nganong si Jesus nanuktok sa pultahan? Kinsa ang anaa sa pikas?”
Pipila ka tuig ang milabay akong nahibaloan nga walay gunitanan sa gawas sa pultahan nga gituktukan sa Manluluwas. Ang tawo nga anaa sa sulod mao ang moabli sa pultahan. Karon nakahibalo na ko kinsa ang anaa sa pikas bahin sa pultahan. Kita! Ang Manluluwas nanuktok, ug kinahanglan natong ablihan ang pultahan ug modapit Kaniya sa pagsulod sa atong mga kinabuhi.
Sa tin-edyer pa ko, nakahukom ko sa pagdapit sa Manluluwas sa akong kinabuhi pinaagi sa pagpabunyag ug sa pagpamiyembro sa Simbahan. Ang akong mga higala maayong mga ehemplo ngari kanako. Mao usab ang akong lola. Siya usa ka temple worker sa Los Angeles California Temple. Mobiya siya sa among balay sa alas 4:00 sa buntag sa pagserbisyo sa Ginoo diha sa templo.
Duha lamang ka tuig human ako mabunyagi, mihukom ko nga moserbisyo sa Ginoo isip full-time nga misyonaryo. Sa akong misyon, mitabang ko sa daghang mga tawo nga makat-on mahitungod sa Manluluwas aron sila makadapit Kaniya sa ilang kinabuhi.
Sa wala madugay, nagserbisyo ko isip presidente sa misyon sa Samoa. Kanunay kong mangutana sa bag-ong mga misyonaryo kon kanus-a sila nakahukom nga moserbisyo og misyon. Daghan miingon nga sa Primary pa sila nakahukom nga moserbisyo!
Ang Primary motabang kaninyo nga maandam alang sa misyonaryo nga pagserbisyo. Pagkat-on kutob sa mahimo. Paghimo og tumong sa pagserbisyo og misyon. Dayon kamo usab makatabang sa mga tawo sa pagdapit sa Manluluwas sa ilang kinabuhi. Ang pagkamisyonaryo makapausab sa inyong kinabuhi—nakapausab kini nako.
Paghulagway pinaagi ni Jennifer tolman