Sa Tibuok Simbahan

Ang Mongolia Nagsaulog sa 20 ka Tuig sa Simbahan

Niadtong Lunes, Abril 15, 2013, kapin sa 300 ka mga miyembro sa Simbahan nagpundok sa Zaisan Hill sa Ulaanbataar, Mongolia, aron sa pagsaulog sa ika-20 nga anibersaryo sa Simbahan sa nasud. Ang 50 ka miyembro nga choir mikanta, ug ang grupo naminaw sa rekord ni Elder Neal A. Maxwell (1926–2004) samtang siya mipahinungod sa Mongolia alang sa pagsangyaw sa ebanghelyo niadtong 1993.

Si Elder Tai Kwok Yuen, kanhi sakop sa Asia Area Presidency nga mikuyog ni Elder Maxwell sa Mongolia niadtong 1993, nakamatikod kon sa unsang paagi “ang mga kamot sa Ginoo walay hunong nga naglihok niini nga bahin sa Iyang ubasan.”

Nagkalain-laing mga kalihokan sa tibuok semana nagtimaan sa anibersaryo. Ang mission reunion nakapundok og 200 ka mga returned missionary. Labaw sa 1,000 ka mga Mongolian nagserbisyo isip full-time nga mga misyonaryo — hapit 1 sa matag 10 nga mga miyembro sa Mongolia. Mga tulumanon sa bunyag gipahigayon sa tibuok Mongolia sa Biyernes sa gabii; 24 ka mga tawo ang nabunyagan nianang adlawa. Si Mary N. Cook, bag-ohay lang nga gi-release gikan sa kinatibuk-ang kapangulohan sa Young Women, namulong sa debosyonal sa Young Women, ug ang open house sa family history mipasalida og video nga naghatag og instruksyon alang sa proyekto sa bag-ong Family Tree. Usa ka extravaganza sa kultura nagpakita sa buhong nga kultura sa Mongolia ug sa mga talento sa daghang mga miyembro sa Simbahan.

Ang mga Santos sa Ulahing mga Adlaw sa Haiti Nagsaulog sa Anibersaryo, Pagtabang sa Pagtanom og mga Kahoy.

Niadtong Mayo 1, 2013, ang mga miyembro sa Simbahan sa Haiti miapil sa dako, tibuok nasud nga proyekto sa pagpananom og kahoy. Dili maihap nga gagmayng mga kahoy ang natanom sa unang adlaw sa proyekto, ug daghan pa ang mosunod. Kon mahuman na ang proyekto, mga 400,000 ka bag-ong mga kahoy magtubo sa Haiti, lakip ang lemon, orange, mga lubi, kapayas, ug tugas.

Ang Simbahan mipalit sa mga kahoy isip kabahin sa padayon nga suporta sa pagpalambo gikan sa linog sa Haiti. Ang proyekto naghatag usab sa mga miyembro og proyekto sa serbisyo sa pagsaulog sa ika-30 nga anibersaryo sa Simbahan niining isla nga nasud. Tulo ka dekada ang milabay si Presidente Thomas S. Monson kanhi sakop sa Korum sa Napulog Duha ka mga Apostoles mibisita sa Haiti ug mipahinungod sa yuta alang sa pagsangyaw sa gipahiuli nga ebanghelyo.

Si Elder Neil L. Andersen sa Korum sa Napulog Duha ka mga Apostoles didto sa Haiti sa panahon sa kasaulogan sa anibersaryo ug midumala sa pagpakita sa usa ka commemorative plaque nga nagtimaan sa sinugdanan sa Simbahan sa Haiti.

Ang Simbahan Midonar og Usa ka Milyon ka mga Libra sa Pagkaon ngadto sa Feeding America

Niadtong Mayo 2013 ang Simbahan, pinaagi sa humanitarian nga grupo sa Latter-day Saint Charities, midonar og labaw sa usa ka milyon ka libra nga pagkaon ngadto sa Feeding America, ang pinakadako nga non-profit hunger-relief nga organisasyon sa Estados Unidos. Ang mga donasyon naglakip og linata sama sa mga prutas, mga utanon, ug mga batong, nga iapud-apod sa mga pamilya nga nanginahanglan pinaagi sa nagkalain-laing komunidad sa tibuok Estados Unidos.

Si Bob Aiken, presidente ug chief executive officer sa Feeding America, miingon nga ang donasyon moabut og 625,000 ka kan-anan.

Mga mananayaw nga dunay mga paypay miporma sa numero “20” atol sa usa ka pasundayag nga gipahigayon sa pagsaulog sa ika-20 nga anibersaryo sa Simbahan sa Mongolia.

Litrato sa maayong kabubut-on sa Mongolia Ulaanbaatar Mission

Ang mga misyonaryo ug mga miyembro sa Haiti nananom og mga kahoy sa kabukiran sa ibabaw sa siyudad sa Port au Prince, nga makita sa background.

Gilitratohan ni Jason Swensen